Insajdar raskazaŭ, što Chataba atrucili «Navičkom». Pamior i kupleny ahient, jaki pieradaŭ jamu list

Zasnavalnik telehram-kanała «VČK-OHPU», jaki da vydaleńnia ŭ pačatku krasavika 2025 hoda mieŭ bolš za miljon padpisčykaŭ i śpiecyjalizavaŭsia na publikacyi ekskluziŭnaj infarmacyi ab dziejnaści rasijskich siłavych struktur, Alaksandr Švaraŭ daŭ intervju Ruskaj słužbie Bi-bi-si. U minułym Švaraŭ pracavaŭ u infarmacyjnym ahienctvie «Rosbałt», jakoje mieła reputacyju blizkaha da siłavych struktur. Niekatoryja ŚMI nazyvajuć jaho adnym z hałoŭnych insajdaraŭ Rasii.

U intervju Švaraŭ zhadvaje vypadki zabojstva rasijskimi śpiecsłužbami palavych kamandziraŭ i śćviardžaje, što zadoŭha da viadomaha skandału z atručvańniem z dapamohaj «Navička» Skrypaloŭ u sakaviku 2018 hoda hety srodak byŭ vykarystany ŭ śpiecapieracyi pa zabojstvie mižnarodnaha terarysta, lidara arabskich najmitaŭ u Čačni Chataba ŭ 2002 hodzie.

Uradženiec Saudaŭskaj Aravii Samier Salech as-Suviejlem, bolš viadomy jak Chatab, byŭ vielmi aściarožnym palavym kamandziram. Jon chavaŭsia ŭ harach ź nievialikaj hrupaj ciełaachoŭnikaŭ, časta mianiaŭ miescy stajanak i paźbiahaŭ vykarystańnia mabilnaj abo spadarožnikavaj suviazi.

Dla znosin z navakolnym śvietam, uklučajučy svaich zastupnikaŭ z arabskich krain, Chatab vykarystoŭvaŭ tradycyjnaje listavańnie. Listy dastaŭlali praz składanuju sietku kurjeraŭ i schovanak. Złavić jaho było tak składana, što rasijskija śpiecsłužby abjavili bujnuju ŭznaharodu za infarmacyju, jakaja dapamoža jaho likvidavać.

Adzin z kurjeraŭ, jaki časam atrymlivaŭ listy dla Chataba, vyrašyŭ zarabić na hetym. Jon pahadziŭsia supracoŭničać sa śpiecsłužbami i čakać zručnaha momantu. U sakaviku 2002 hoda pryjšoŭ novy list z Saudaŭskaj Aravii. U śpiecsłužbaŭ było ŭsiaho 24 hadziny, kab dziejničać, pakul list nie syšoŭ dalej pa łancužku.

Z Maskvy terminova dastavili ekśpierta pa atrutach. Jon apracavaŭ list niervova-paralityčnym rečyvam, jakoje pačynała dziejničać tolki praz 2-3 dni, maskirujučy śmierć pad charčovaje atručeńnie. Heta pavinna było abaranić kurjera ad padazreńniaŭ. Apracavany list byŭ źmieščany ŭ kanviert i praciahnuŭ svoj šlach da adrasata.

Paźniej, paśla zatrymańnia adnaho ź ciełaachoŭnikaŭ Chataba, stała viadoma, što adbyłosia dalej. Achoŭnik dastaviŭ pasłańnie kamandziru. Chatab dastaŭ z kanvierta list, pračytaŭ i adrazu spaliŭ u vohniščy. Nijakich prykmietaŭ niedamahańnia ŭ jaho nie było ni ŭ toj dzień, ni na nastupny.

Praź dzień bajeviki znajšli ŭ harach hryby, padobnyja na smaržki, i pasmažyli ich na vohniščy. Na nastupnuju ranicu Chatabu stała drenna: jaho stan rezka pahoršyŭsia, pačalisia sutarhi, i nieŭzabavie jon pamior.

Ciełaachoŭniki vyrašyli, što ich kamandzir atruciŭsia hrybami, paličyŭšy, što siarod hryboŭ była pahanka. Jany abvinavačvali adzin adnaho, nie padazrajučy, što Chatab staŭ achviaraj śpiecapieracyi. Praŭda ŭspłyła tolki praź niekalki dzion, kali tyja ž simptomy źjavilisia ŭ ciełaachoŭnikaŭ, jakija trymali ŭ rukach list, a zatym i ŭ kurjeraŭ. Usie jany taksama pamierli.

U vyniku ad atruty, jakoj byŭ nasyčany list, pamierła piać čałaviek, uklučajučy samoha Chataba i infarmatara śpiecsłužbaŭ.

Pa słovach žurnalista, śpiecsłužby nie raźličyli abjom atrutnaha rečyva. Jano prasačyłasia praz kanviert i zabiła ŭsich, chto ź im kantaktavaŭ. Choć kancentracyja jadu ŭ kurjeraŭ była nižejšaj, čym u Chataba, jaje chapiła dla śmiarotnaha vyniku.

Doŭhi čas padrabiaznaści apieracyi byli zasakrečanyja. I tolki ŭ studzieni 2018 hodzie Švaraŭ sa spasyłkaj na ananimnuju krynicu raskazaŭ padrabiaznaści. Ciapier jon ahučyŭ i srodak, z dapamohaj jakoha byŭ zabity teraryst.

• 6
• 0
• 0
• 4
• 18
• 1
• 3
• 0