Makiej pra Hieraščanku: Nie zhodny z palitykaj krainy — nie miesca ŭ dziaržsłužbie
«Na žal, časam traplajucca ludzi, jakija pačynajuć zajmać, miakka kažučy, dziŭnuju pazicyju».
«Na žal, časam traplajucca ludzi, jakija, znachodziačysia na dziaržaŭnaj słužbie, publična pačynajuć zajmać, miakka kažučy, dziŭnuju pazicyju, jakaja idzie ŭ razrez z palitykaj i intaresami Biełarusi», — adznačyŭ kiraŭnik Administracyi prezidenta Uładzimir Makiej na respublikanskim sieminary naradzie ideałahičnych rabotnikaŭ, što adbyŭsia 19 sakavika ŭ piatnicu.
«Niaŭžo dazvolena niejkamu supracoŭniku haradskoha adździeła pa spravach moładzi razhortvać ŭ Internecie kampaniju, ź jakoj vynikaje, što ŭ Biełarusi ledź nie pryhniatajuć rasiejcaŭ i pryhniatajuć rasiejskuju movu? Taki vypadak byŭ niadaŭna ŭ Viciebskaj vobłaści», — pryvioŭ prykład kiraŭnik prezidenckaj administracyi.«I nie tolki jon u apošni čas zachapiŭsia pisaninaj ŭ Internecie zamiest taho, kab jakasna pracavać na svaim pracoŭnym miescy», — dadaŭ Uładzimir Makiej. Jon padkreśliŭ:
«Publičnyja vystupleńni dziaržaŭnaha čynoŭnika nie mohuć być vyklučna jaho pryvatnaj spravaj. Nichto nie zabaraniaje vykazvać ułasnaje mierkavańnie i adstojvać jaho, adnak va ŭmovach vostraha sacyjalnaha prociborstva pradstaŭniki dziaržaparatu nie mohuć stanavicca na alternatyŭnuju pazicyju. Chaciełasia b kateharyčna papiaredzić adnosna padobnych vypadkaŭ. Čałaviek pavinien vyznačycca: kali jon nie zhodny z palitykaj, jakaja pravodzicca ŭ krainie, značyć jamu nie miesca ŭ dziaržsłužbie».
Nahadajem, što paśla publikacyi ŭ NN artykuła pra vykazvańni viciebskaha čynoŭnika Andreja Hieraščanki rasijskamu partału «Matierik», apošni raźviŭ cełuju teoryju zmovy, nazvaŭšy siarod inšaha Uładzimira Makieja «idiejno blizkim čiełoviekom» «v litvinskich kruhach».
Vykazvańni Andreja Hieraščanki znajšli svoj vodhuk u jahonaj pracoŭnaj karjery. Spačatku jamu prapanavali spynić pracoŭny kantrakt, a potym vynieśli vymovu za parušeńnie normaŭ słužbovaj etyki.
Kamientary