U karparacyi Stadler raskazali, jakaja situacyja ź jaje zavodam u Biełarusi
Zavod «Štadler Minsk» pa-raniejšamu naležyć šviejcarskaj karparacyi Stadler. Pra heta havorycca ŭ jaje hadavoj spravazdačy, zaŭvažyła «Lusterka». U karparacyi zajavili, što zachoŭvajuć zavod u Biełarusi, «kab mieć mahčymaść adkryć jaho znoŭ, jak tolki buduć źniatyja sankcyi».
«Ahresiŭnaja vajna Rasii suprać Ukrainy i źviazanyja ź joj sankcyi suprać Biełarusi praciahvali ŭpłyvać na Stadler i zavod u Fanipali ŭ minułym finansavym hodzie», — adznačajuć u karparacyi.
Jak paviedamlaje Stadler, kampanija zachoŭvaje zavod u Biełarusi, «kab mieć mahčymaść adkryć jaho znoŭ, jak tolki buduć źniatyja sankcyi».
«Zavod praciahvaje akazvać pasłuhi pa vytvorčaści kuzavaŭ i kampanientaŭ aŭtamabilaŭ, a taksama ŭ halinie inžynirynhu ŭ strohaj adpaviednaści z usimi sankcyjami», — tłumačać u karparacyi.
U vieraśni 2024 hoda ŭ Ministerstvie transpartu Biełarusi zajavili, što źbirajucca raźvivać «biełaruskaje pradpryjemstva» «Štadler Minsk» u supracoŭnictvie z rasijskimi inviestarami.
Na zapyt «Lusterka» ŭ šviejcarskaj karparacyi Stadler, jakoj naležyć «Štadler Minsk», tady zajavili, što im nie paviedamili pra pieramovy z rasijskimi kampanijami i jany nie ŭdzielničajuć u ich.
«Zavod u Minsku na 100% naležyć Stadler, taksama karparacyja ŭ poŭnaj miery vykonvaje patrabavańni mižnarodnych sankcyj. Prodaž nie płanujecca», — zapeŭnili ŭ Stadler.
U 2022 hodzie ŭ «Štadler Minsk» paviedamili pra skaračeńnie štata, pieravod niekatorych rabotnikaŭ na zavody ŭ inšych krainach, tłumačačy heta sankcyjami. Ale tady papiaredzili, što całkam zakryvać biełaruskaje pradpryjemstva nie płanujecca. Paśla źniaćcia sankcyj na zavodzie ŭ Fanipali źbiralisia naraścić abjomy vytvorčaści minułych hadoŭ.
U 2023-m šviejcarskija inviestary paćvierdzili, što nie źbirajucca pakidać Biełaruś i što zavod «Štadler Minsk» u Fanipali praciahvaje pracavać. U sakaviku hetaha hoda ŭ spravazdačy kampanii paviedamlałasia, što pradpryjemstva pracuje na minimalnaj zahruzcy, a taksama što tam źbirajucca adnavić pracu, jak tolki buduć źniatyja sankcyi.
«Štadler» nie maje namieru pradavać zavod u Fanipali. Choć biełaruskija čynoŭniki śćviardžali inšaje
10 hadoŭ «Štadleru»: raboty niama, a inžynieraŭ vyvoziać u Jeŭropu i Kazachstan
«Štadler Minsk» admoviŭsia pastaŭlać ciahniki dla staličnaha mietro
«Štadler» nie źbirajecca sychodzić ź Biełarusi, kivajučy na intaresy «nasielnictva ŭ cełym»
«Štadler Minsk» adpraŭlaje 60 čałaviek u prastoj na šeść miesiacaŭ
Što viadoma pra viciebčuka, jakoha vinavaciać u sprobie padryvu samalota ŭ Hiermanii15
Kamientary