Hałoŭny rasijski raźviedčyk zaklikaŭ praanalizavać mahčymaść padziełu Ukrainy pamiž susiednimi dziaržavami
Dyrektar Słužby źniešniaj raźviedki Rasii Siarhiej Naryškin na kruhłym stale Rasijskaha histaryčnaha tavarystva zajaviŭ, što, maŭlaŭ, nieabchodna pravieści dakładny histaryčny analiz mahčymaści terytaryjalnaha padziełu Ukrainy pamiž prylehłymi dziaržavami, piša «Interfaks».
Pavodle słoŭ Naryškina, ciapier va Ukrainie adbyŭsia «krach dziaržaŭnaści».
«U hetych umovach zahučali mierkavańni, što ŭ siłu nieminučaha raspadu Ukrainy jaje ziemli niepaźbiežna adyduć sumiežnym krainam», — skazaŭ Naryškin i dadaŭ, što takaja mahčymaść «pavinna być padvierhnutaja dakładnamu histaryčnamu analizu».
Jon ličyć, što nieabchodna praanalizavać z histaryčnaha punktu hledžańnia «pracesy i tendencyi, jakija pryviali sumiežnyja terytoryi ŭ skład dziaržavy Ukraina, jakaja nie adbyłasia».
Na dumku Naryškina, «najbolš paśladoŭna» na terytoryi sučasnaj Ukrainy pretenduje Polšča, jakaja nibyta «ŭvohule niebiespadstaŭna» pryhladajecca da Lvova. Taksama jon zhadaŭ pra refierendum u Zakarpackaj vobłaści u 1991 hodzie, na jakim žychary prahałasavali za nadańnie hetaj terytoryi aŭtanomii, ale, maŭlaŭ, «u Kijevie addali pieravahu nie zaŭvažać volevyjaŭleńnia naroda».
Vysokapastaŭlenyja rasijskija čynoŭniki, jak i prapahandysty, uvohule lubiać čas ad času zhadać, što, maŭlaŭ, nie tolki Rasija nibyta choča dałučyć da siabie častku Ukrainy, ale i inšyja susiedzi ad jaje ničym nie roźniacca. Heta adzin sa sposabaŭ apraŭdać ułasnuju ahresiju suprać Ukrainy i anieksiju častki jaje mižnarodna pryznanaj terytoryi.
Były ministr kultury Rusłan Čarniecki znajšoŭ sabie padpracoŭku9
Kamientary