Popyt na kvatery ŭ Minsku i inšych bujnych haradach astyvaje. Čaho čakać u 2025-m hodzie
Minuły hod akazaŭsia rekordnym dla rynku staličnaj nieruchomaści. Čerhi pa novieńkija kvatery vystrojvajucca i ciapier, ale ŭ apošnija miesiacy nazirajecca źnižeńnie popytu. Čamu tak adbyvajecca i čaho čakać u 2025 hodzie?
Pa vynikach 11 miesiacaŭ 2024 hoda ŭ Minsku było pradadziena kvater bolš, čym kali-niebudź.
Pikavy popyt pryjšoŭsia na viasnu — u krasaviku było zarehistravana 2100 ździełak kupli-prodažu.
Ale z prychodam vosieni popyt na nieruchomaść u stalicy pačaŭ padać. U śniežni ŭ Minsku zaklučyli krychu bolš za 1400 ździełak. Mienš u minułym hodzie było tolki studzieni, kali prodažy tradycyjna znachodziacca na samym nizkim uzroŭni.
U paraŭnańni z anałahičnym pieryjadam 2023 hoda śniežańskija prodažy byli na 20% nižejšymi.
Charakterna, što ŭ apošnija miesiacy popyt źnižajecca va ŭsich bujnych haradach za vyklučeńniem Bresta, dzie prodažy ŭ listapadzie vyraśli na 0,4%. U Hrodnie kolkaść ździełak za listapad prasieła na 27%, a Viciebsku, Homieli i Mahilovie na 13-15%.
Čamu popyt staŭ padać?
Ekśpiert BEROC Anastasija Łuzhina nazyvaje niekalki pryčyn, čamu z vosieni popyt pačaŭ prasiadać.
«Popyt i ceny pavyšajucca, kali rastuć dachody, a ŭmovy kredytavańnia zastajucca dobrymi. U Biełarusi da hetaha dadajecca kursavy faktar, pakolki ceny na nieruchomaść tradycyjna ŭkazvajuć u dalarach», — źviartaje ŭvahu ekanamist.
«Što tyčycca kredytavańnia, to apošnim časam my bačym choć i nievialiki, ale ŭsio-taki rost pracentnych stavak. Heta abmiažoŭvaje abjomy kredytavańnia. Što tyčycca tempaŭ rostu dachodaŭ, to jany bližej da kanca hoda zamarudzilisia, a kurs rubla da dalara pačaŭ prasiadać», — adznačaje Łuzhina.
Čaho čakać u 2025-m?
Što tyčycca prahnozaŭ na 2025 hod, to, na dumku Anastasii Łuzhinoj, abvału rynku čakać nie varta, ale nievialikaje źnižeńnie kolkaści ździełak, a razam ź im i źnižeńnie cany ŭsio ž adbudziecca.
«Letaś dachody biełarusaŭ sapraŭdy chutka raśli, i ludzi dumali, kudy im układvacca, a hety vybar u Biełarusi dosyć abmiežavany. Adna z takich mahčymaściaŭ — kupla nieruchomaści. Voś hetuju mahčymaść biełarusy dosyć aktyŭna i realizoŭvali.
U biahučym hodzie rost dachodaŭ zamarudzicca, jak u naminalnym, tak i ŭ realnym vyražeńni, što budzie adbivacca na popycie.
Taksama možna adznačyć, što na vysoki popyt u 2023-2024 hadach upłyvaŭ adkładzieny popyt 2022 hoda, kali prodažy abvalilisia z-za abmiežavanaści kredytavańnia, źnižeńnia dachodaŭ i ŭ cełym ekanamičnaha spadu. Hety faktar užo vyčarpaŭ siabie. Tamu minuły hod zastaniecca pikavym pa abjomach», — ličyć ekśpiert.
Aproč hetaha, nielha vyklučać, što ŭ biahučym hodzie moža adbycca čarhovaje pavyšeńnie kredytnych stavak, što praciahnie astudžać cikavaść da kupli kvater u kredyt.
Siaredni košt pradadzienych u Minsku kvater za śniežań skłaŭ $1604 za kvadrat. Daražej, čym ciapier, mietr u Minsku kaštavaŭ u kastryčniku 2013 hoda, kali cana ŭ siarednim dachodziła da $1841. A pikavym pa-raniejšamu zastajecca kaniec 2007 — pačatak 2008 hoda, kali kvadrat u stalicy krychu pieraadoleŭ adznaku ŭ 2000 dalaraŭ.
Ciapier čytajuć
Krynicy: Usava i Kraŭcova vykraślili polskija śpiecsłužby. Ź Dzikavickim inšaja situacyja20
Kamientary