Palitviazień Vacłaŭ Areška sustreŭ za kratami 71‑y dzień naradžeńnia. Kaladnuju paštoŭku jamu vizualna apisvali inšyja
18 studzienia dzień narodzinaŭ adznačaje palitviazień Vacłaŭ Areška. Siońnia jamu spoŭniŭsia 71 hod. Čaćviorty raz palitviazień sustrakaje dzień narodzinaŭ za kratami. Arešku pravaabaroncy ŭklučyli ŭ śpis palitviaźniaŭ ź vielmi uraźlivym stanam zdaroŭja, piša «Svaboda».
Areška vielmi drenna bačyć, u kalonii ŭ jaho taksama abvastrylisia inšyja chvaroby. Pavodle krynicy, daśviedčanaj u spravach palitviaźnia, za apošni hod zrok u palitviaźnia pahoršyŭsia nastolki, što jon nia moža paŭnavartasna čytać i pisać, akulary bolš nie dapamahajuć. Krynica kaža, što drenny stan zdaroŭja Vacłava Areški adbivajecca na jahonym psychalahičnym stanie.
«Sumuje, bo ničoha nia bačyć. Zdaroŭje nie palapšajecca, zrok jašče horšy, kaladnuju paštoŭku jamu vizualna apisvali inšyja, bo jon nia bačyć, što na joj vyjaŭlena. Kali jon sam piša listy, to razabrać u ich možna litaralna pracentaŭ 20, nastolki niečytelna», — paviedamiła pra Vacłava Arešku krynica.
Pavodle krynicy, Vacłaŭ Areška nia skardzicca na staŭleńnie da jaho ŭ kalonii.
Svajaki i siabry palitviaźnia spadziajucca, što jon trapić u čarhovy śpis na vyzvaleńnie i nastupny dzień narodzinaŭ adznačyć na voli.
Aktyvist niezaležnaha prafsajuzu REP, palitolah, historyk kultury i hramadzki dziajač Vacłaŭ Areška za kratami z krasavika 2022 hodu. Sud pryznaŭ Vacłava Arešku vinavatym pavodle troch artykułaŭ Kryminalnaha kodeksu ŭklučna z artykułam 361‑1 — «stvareńnie ekstremisckaha farmavańnia abo ŭdzieł u im».
Aktyvista asudzili na 8 hadoŭ źniavoleńnia. Vacłaŭ Areška adbyvaje pakarańnie ŭ kalonii № 22 u Ivacevičach. Kalehi ŭ kiraŭnictvie niezaležnymi prafsajuzami Hienadź Fiadynič, Alaksandr Jarašuk i Vasil Bieraśnieŭ, kaho zatrymlivali razam z Areškam ŭ miežach adnoj «prafsajuznaj spravy», letaś vyjšli na volu.
U minskim handlovym centry Palazzo sabrałasia daŭžeznaja čarha. Pa darmovych miadźviedzikaŭ!5
Kamientary