«Mnie stolki hadoŭ, jak Isusu Chrystu, kali jon pamior i ŭvaskros». Dzianis Kapuścin daŭ pieršaje intervju paśla insceniroŭki jahonaj śmierci

Dzianis Kapuścin u intervju ź ironijaj adznačyŭ, što jamu ciapier 33 hady — «jak Isusu Chrystu, kali jon pamior i ŭvaskros». 

Pavodle słoŭ Kapuścina, apieracyja pa insceniroŭcy hibieli rychtavałasia niekalki miesiacaŭ i pra jaje viedali tolki čatyry—piać čałaviek. Jon pryznaŭsia, što śviadoma dazvoliŭ śvietu pavieryć u svaju śmierć, razumiejučy, što staŭki byli nadzvyčaj vysokija.

«Ty nikomu nie kažy: ja chutka zahinu, ale nie pa-sapraŭdnamu, bo potym uvaskresnu», — ź ironijaj pierakazaŭ jon svaje tahačasnyja dumki.

Pakul infarmacyja pra jaho «śmierć» zastavałasia ŭ sile, Kapuścin paśpieŭ pračytać dziasiatki niekrałohaŭ, napisanych siabrami, paplečnikami i navat vorahami. Jon pryznaŭsia, što byŭ uražany maštabam reakcyi: ludzi, jakija nikoli nie bačyli jaho asabista, pisali, što płakali, jak pa členie siamji. Pa ŭsim śviecie źjaŭlalisia hrafici, płakaty, drony z nadpisami «Za Dzianisa», a ŭ roznych krainach aktyvisty vychodzili na vulicy ŭ jaho honar.

«Ja nikoli nie imknuŭsia da papularnaści, — skazaŭ jon, — ale raptam zrazumieŭ, nakolki maštabnaj akazałasia maja fihura dla ludziej».

Pry hetym jon adznačyŭ, što asabliva jaho kranuła reakcyja bajcoŭ Rasijskaha dobraachvotnickaha korpusa (RDK) i tych, chto ŭ dni jaho «hibieli» ŭzmacniŭ udary pa praciŭniku, usprymajučy heta jak akt pomsty.

Kapuścin padkreśliŭ, što jahonaja «śmierć» adyhrała i stratehičnuju rolu: pra RDK daviedalisia mnohija ludzi, u tym liku ŭ Rasii, dzie pošuk infarmacyi pra korpus užo moža paciahnuć jurydyčnyja nastupstvy.

«Infarmacyjnaja nakryŭka začyniajecca, i ludzi bajacca navat huhlić, chto my takija», — adznačyŭ jon.

Asobna jon paprasiŭ prabačeńnia ŭ siabroŭ i znajomych, jakim daviałosia pieražyć sapraŭdnuju horyč straty. Jon raskazaŭ, jak niezadoŭha da «hibieli» razdavaŭ aŭtohrafy, fatahrafavaŭsia z prychilnikami i razumieŭ, što dla mnohich hety viečar stanie apošnim uspaminam pra jaho «ŭžyvuju».

Kapuścin taksama paćvierdziŭ, što jahonaja słužba prachodzić u struktury Hałoŭnaha ŭpraŭleńnia raźviedki Ukrainy i što apieracyja była vykananaja pa pramym zadańni kiraŭnictva. Jon nazvaŭ heta aktam maksimalnaha davieru i padkreśliŭ, što «kali heta było patrebna dla pieramohi Ukrainy — značyć, tak i pavinna było być».

Dzianis Kapuścin naradziŭsia ŭ Maskvie. Kali jamu było 17 hadoŭ, siamja pierajechała ŭ Kioln. 

Dzianis byŭ fanatam maskoŭskaha CSKA, ultrapravym aktyvistam, zajmaŭsia spartovymi adzinaborstvami. Padtrymaŭ Majdan, z 2017 hoda žyŭ va Ukrainie.

U 2022 hodzie jon zasnavaŭ va Ukrainie Ruski dobraachvotnicki korpus. U Rasii zavočna prysudžany da pažyćciovaha źniavoleńnia.

Ranicaj 27 śniežnia 2025 hoda RDK paviedamiŭ, što Kapuścin zahinuŭ hetaj nočču na zaparožskim kirunku. Pryčynaj śmierci nazvali prylot bieśpiłotnika padčas vykanańnia bajavoha zadańnia.

Adnak praź niekalki dzion, 1 studzienia 2026 hoda, stała viadoma, što na samaj spravie Kapuścin žyvy, prytym jon sam źjaviŭsia na videa z tahačasnym kiraŭnikom HUR Kiryłam Budanavym. Akazałasia, što insceniroŭka jahonaha zabojstva była častkaj śpiecapieracyi HUR. 

Zabojstva kiraŭnika rasijskich dobraachvotnikaŭ, jakija vajujuć suprać režymu Pucina, jak paviedamlałasia, zamovili z Maskvy. Vykanaŭcu paabiacali za heta paŭmiljona dalaraŭ. Bolš taho, hetyja hrošy byli navat pieradadzienyja, i ich paabiacali pieradać na patreby abarony Ukrainy.

• 5
• 0
• 0
• 0
• 0
• 0
• 0
• 1