Kamandzir RDK Dzianis Kapuścin žyvy. Jaho śmierć była insceniroŭkaj
Hałoŭnaje ŭpraŭleńnie raźviedki Ukrainy praviało składanuju apieracyju padmanu rasijskich śpiesłužb.
Zabojstva kiraŭnika rasijskich dobraachvotnikaŭ, jakija vajujuć suprać režymu Pucina, zamovili z Maskvy. Vykanaŭcu paabiacali za heta paŭmiljona dalaraŭ. U vyniku śpiecapieracyi HUR, jakaja doŭžyłasia bolš za miesiac, žyćcio Kapuścina zachavanaje, paviedamili ŭ Hałoŭnym upraŭleńni raźviedki Ukrainy. A hrošy pojduć na patreby abarony Ukrainy.
Dzianis Kapuścin, viadomy pad svaim pazyŭnym «WhiteRex», źjaviŭsia na videa z kiraŭnikom HUR Kiryłam Budanavym.
«Spadar Dzianis, vinšuju vas ź viartańniem, jak toj kazaŭ, da žyćcia. Heta zaŭsiody, napeŭna, pryjemna, — pažartavaŭ Budanaŭ. — Rady, što srodki, atrymanyja za zakaz vašaj likvidacyi, pajšli na dapamohu našaj baraćbie. Zyču nam usim i vam asabista pośpiechaŭ. Viartajciesia, kali łaska, da vykanańnia słužbovych zadač. Tam vas čakajuć. Karystajučysia vypadkam, usich vinšuju z Novym hodam! Heta dakładna budzie naš hod!» — skazaŭ Budanaŭ.
Hetaja navina natchnić tych rasijan, jakija vajujuć suprać režymu sa zbrojaj u rukach.
Raniej RDK paviedamiŭ, što Kapuścin zahinuŭ u noč na 27 śniežnia na zaparožskim kirunku. Pryčynaj śmierci nazvali prylot bieśpiłotnika padčas vykanańnia bajavoha zadańnia.
Dzianis Kapuścin naradziŭsia ŭ 1984 hodzie ŭ Maskvie. Kali jamu było 17 hadoŭ, siamja pierajechała ŭ Kioln.
Dzianis byŭ fanatam maskoŭskaha CSKA, ultrapravym aktyvistam, zajmaŭsia spartovymi adzinaborstvami. Padtrymaŭ Majdan, z 2017 hoda žyŭ va Ukrainie.
U 2022 hodzie jon zasnavaŭ va Ukrainie Ruski dobraachvotnicki korpus. U Rasii zavočna prysudžany da pažyćciovaha źniavoleńnia.
Ciapier čytajuć
Kaleśnikava: U 2020‑m ja zmahałasia nie suprać Łukašenki, a za ludziej, svabodu i svabodnyja vybary65
Kamientary