Biełaruski papularny komik Słava Kamisaranka ŭ adnym sa svaich apošnich stendapaŭ raspavioŭ, što padaŭsia na mižnarodnuju abaronu ŭ Polščy.
Paru hadoŭ tamu Kamisaranka atrymaŭ talent-vizy ŭ ZŠA i Vialikabrytaniju. Ź lehalizacyjaj u inšych krainach uźnikali składanaści.
«Niamiecki konsuł mnie admoviŭ u humanitarnaj vizie, bo nie ličyć, što mnie niebiaśpiečna jechać u Rasiju ci Biełaruś, a ŭ Ispanii mnie nie dali lehalizavać maje srodki, tamu što, mabyć, heta brudnyja babki za brudnyja žarty. Uvohule, u niejki momant pa dakumientach byŭ adziny varyjant — heta jechać u Biełaruś i zdavacca «Čyk-čyryku». Voś tam ja i pa dakumientach prachodziŭ, i pa terminach mianie čakali — idealna!» — žartavaŭ Kamisaranka ŭ svaich videa.
Pryčym talent-viza ŭ ZŠA dałasia jamu taksama niaprosta: daviałosia sabrać šmat rekamiendacyj i vodhukaŭ pra tvorčyja pośpiechi, jakija pa vyniku zaniali 600 staronak. Taksama treba było dakazać, što ŭ ZŠA ŭ Kamisaranki sapraŭdy budzie praca — u vypadku komika heta byŭ hrafik z hastrolami.
«Ciapier, pa-mojmu, jany [talent-vizy] užo nie dziejničajuć, mnie tam usio paanulavali», — raskazaŭ humaryst padčas svajho niadaŭniaha vystupu.
Ahułam jon razhladaŭ tyja vizy najpierš dla mahčymaści pašyreńnia hieahrafii hastrolaŭ. Ciapier komik znoŭ pasprabuje lehalizavacca ŭ Polščy, i ŭžo padaŭsia na mižnarodnuju abaronu. Chacia adna z hladačak paraiła jamu nie čakać razhladu spravy, a adrazu napisać na imia polskaha prezidenta i paprasić hramadzianstva na padstavie papularnaści i najaŭnaści humarystyčnaha talentu.
Nahadajem, letaś MUS Biełarusi ŭnios Kamisaranku ŭ śpis «ekstremistaŭ», a paźniej i «terarystaŭ». Na radzimie jon za svaje žarty ŭ adras Łukašenki byŭ zavočna asudžany da 6 hadoŭ źniavoleńnia. Pa inicyjatyvie FSB jon taksama byŭ pazbaŭleny rasijskaha hramadzianstva.
Ciapier čytajuć
Pamiłavanyja 15 čałaviek, siarod jakich 13 palitviaźniaŭ11
Pamiłavanyja 15 čałaviek, siarod jakich 13 palitviaźniaŭ
Najbujniejšaj u śviecie fan-supolnaściu Łedzi Hahi kiruje chłopiec ź Minska, jaki adsiedzieŭ za pratesty. Rasijanie paśpiašalisia zapisać jaho ŭ svaje1616
Kamientary