U Iranie aficyjna pryznali, što padčas zadušeńnia pratestaŭ zahinuli tysiačy ludziej
Viarchoŭny lidar Irana ajatała Ali Chamieniei ŭpieršyniu publična pryznaŭ, što padčas masavych pratestaŭ u krainie zahinuli tysiačy ludziej. Pry hetym jon uskłaŭ adkaznaść za padziei na ZŠA i Izrail, abvinavaciŭšy ich u padbuchtorvańni narodnych vystupleńniaŭ, asobna zhadaŭšy prezidenta ZŠA Donalda Trampa, piša Reuters.
Pa słovach Chamieniei, zamiežnyja siły nibyta nanieśli Iranu vialikuju škodu i stali pryčynaj hibieli niekalkich tysiač čałaviek.
U adkaz Donald Tramp u intervju Politico zajaviŭ, što ličyć ciapierašni momant prydatnym dla pošuku novaha kiraŭnictva dla Irana. Jon abvinavaciŭ Chamieniei ŭ tym, što toj trymaje ŭładu vyklučna praz represii i hvałt, a taksama nazvaŭ jaho vinavatym u razbureńni krainy.
Tramp padkreśliŭ, što sapraŭdnaje lidarstva pavinna hruntavacca na pavazie, a nie na strachu i śmierci, i acharaktaryzavaŭ Iran jak adnu z najhoršych krain dla žyćcia z-za drennaha kiravańnia.
U pačatku studzienia pratesty ŭ Iranie, jakija pačalisia 28 śniežnia 2025 hoda, dasiahnuli najbolšaha maštabu: masavyja vystupleńni achapili amal usie pravincyi, miljony ludziej vyjšli na vulicy z patrabavańniami źviaržeńnia režymu. Najbolš žorstkija sutyknieńni adbylisia z 8 pa 12 studzienia, kali siły biaśpieki, pavodle roznych acenak, zabili ad niekalkich tysiač da dziasiatkaŭ tysiač čałaviek.
Paśla chvali represij aktyŭnaść pratestaŭ značna źniziłasia: u haradach źjavilisia ŭzbrojenyja patruli, a infarmacyja z krainy amal pierastała pastupać. Na fonie hetych padziej ZŠA razhladali mahčymaść vajennaha ŭdaru pa Iranie, adnak paźniej Tramp admoviŭsia ad takoha kroku, zajaviŭšy, što atrymaŭ zapeŭnieńni ab spynieńni masavych zabojstvaŭ.
Jak Iran adklučyŭ internet? I jak tady irancy zmahli pieradać infarmacyju?
Syn iranskaha šacha Reza Piechlevi zaklikaje da dalejšych pratestaŭ
«Nivodnaha zvanka ŭnutr». Jak vyhladaje internet u Iranie i jak kraina ŭžo tydzień žyvie bieź jaho padčas pratestaŭ
Pratesty ŭ Iranie, vierahodna, užo kančatkova zadušyli
Čym ciapierašnija pratesty ŭ Iranie adroźnivajucca ad papiarednich
Kamientary
Kali b sam pasiadzieŭ va ŭładzie stolki, kolki dyktatary siadziać, to było b toje samaje, što i ŭ ich.
Dobra, što choć nie abvinavaciŭ svoj narod, bo jon "nie toj".