«Jon u žachlivym stanie». Adam Kadyraŭ trapiŭ u avaryju niedaloka ad Doma ŭračystaściej u Pucinskim rajonie
Jon moh urezacca ŭ adbojnik, žychary Hroznaha bačyli kłuby dymu.
Pra padrabiaznaści DTZ, u jakoje trapiŭ 18‑hadovy syn kiraŭnika respubliki i sakratar Rady biaśpieki Čačni, vydańniu «Možiem objaśniť» raspavioŭ pradstaŭnik apazicyjnaha ruchu (i adnajmiennaha kanała) Niyso, jaki pieršym paviedamiŭ pra avaryju ŭ Hroznym.
Pa ich słovach, incydent adbyŭsia ŭ rajonie restarana i Doma ŭračystaściej «Safija» na Starapramysłovaj šašy. Hetaje miesca znachodzicca pobač z praśpiektam imia Uładzimira Pucina, u Pucinskim rajonie. Dom uračystaściej — elitny kompleks, jaki ŭ 2016 hodzie adkryvaŭ Ramzan Kadyraŭ. Hałoŭnym inviestaram ŚMI nazyvali nabližanaha da ŭładaŭ miljardera Rusłana Bajsarava.
«Asnoŭnaja viersija na hety momant — strata kiravańnia ŭ vyniku pieraškody na darozie i praźmierna vysokaj chutkaści. Aŭtamabili ŭ kartežy pačali sutykacca adzin z adnym. Chutčej za ŭsio, Adam jechaŭ pieršym», — raspaviadaje surazmoŭca vydańnia.
Pavodle jaho słoŭ, najbolš imavierna, što aŭtamabil urezaŭsia ŭ adbojnik (aharodžu), što i spravakavała łancuhovuju avaryju.
Surazmoŭca «MO» pieradaŭ paviedamleńni ad vidavočcy z balnicy: stan Adama paśla avaryi byŭ nadzvyčaj ciažki, i «jaho było ciažka paznać».
U Niyso adznačajuć: terminovaja evakuacyja ŭ Maskvu moža śviedčyć pra surjoznaść traŭmaŭ.
Z Hroznaha ŭ Maskvu sapraŭdy vylatali niekalki samalotaŭ — u tym liku džet Kadyrava i tak zvany latučy špital. «Viazuć tudy, vidavočna, z-za vialikaj roźnicy va ŭzroŭni miedycyny. Niahledziačy na apoviedy prapahandy, ni sam Kadyraŭ, ni inšyja pradstaŭniki režymu ŭ Čačni nie lečacca», — padkreślivaje surazmoŭca.
U atačeńni Adama, pavodle infarmacyi Niyso, časta byvajuć dzieci inšych vysokapastaŭlenych čačenskich čynoŭnikaŭ — u tym liku ź siemjaŭ Delimchanava i Daudava. «Pierasoŭvańnie ŭ kartežy — heta panty i adnačasova pastajanny strach. Kadyravy i inšyja pradstaŭniki režymu razumiejuć, što nasielnictva ich nienavidzić, tamu pieramiaščacca jak zvyčajnyja ludzi jany nie mohuć».
Jak vyśvietliŭ «MO», Adamu Kadyravu naležyć asabniak płoščaj 2 tysiačy kv. m, raźmieščany niepasredna nasuprać rezidencyi kiraŭnika Čačni. Jaho košt składaje kala 750 młn rubloŭ (kala 10 młn dalaraŭ). U 2025 hodzie pierad pałacam Adama źnieśli dom, jaki zasłaniaŭ vid na rezidencyju baćki.
Kamientary
- jość jašče prynamsi adziny padobny "narodny prezident" z rekordnaj kolkaściu słužby biaśpieki
Supadzieńnie? Vierahodna, što nie.