«Ён у жахлівым стане». Адам Кадыраў трапіў у аварыю недалёка ад Дома ўрачыстасцей у Пуцінскім раёне
Ён мог урэзацца ў адбойнік, жыхары Грознага бачылі клубы дыму.
Пра падрабязнасці ДТЗ, у якое трапіў 18‑гадовы сын кіраўніка рэспублікі і сакратар Рады бяспекі Чачні, выданню «Можем объяснить» распавёў прадстаўнік апазіцыйнага руху (і аднайменнага канала) Niyso, які першым паведаміў пра аварыю ў Грозным.
Па іх словах, інцыдэнт адбыўся ў раёне рэстарана і Дома ўрачыстасцей «Сафія» на Старапрамысловай шашы. Гэтае месца знаходзіцца побач з праспектам імя Уладзіміра Пуціна, у Пуцінскім раёне. Дом урачыстасцей — элітны комплекс, які ў 2016 годзе адкрываў Рамзан Кадыраў. Галоўным інвестарам СМІ называлі набліжанага да ўладаў мільярдэра Руслана Байсарава.
«Асноўная версія на гэты момант — страта кіравання ў выніку перашкоды на дарозе і празмерна высокай хуткасці. Аўтамабілі ў картэжы пачалі сутыкацца адзін з адным. Хутчэй за ўсё, Адам ехаў першым», — распавядае суразмоўца выдання.
Паводле яго слоў, найбольш імаверна, што аўтамабіль урэзаўся ў адбойнік (агароджу), што і справакавала ланцуговую аварыю.
Суразмоўца «МО» перадаў паведамленні ад відавочцы з бальніцы: стан Адама пасля аварыі быў надзвычай цяжкі, і «яго было цяжка пазнаць».
У Niyso адзначаюць: тэрміновая эвакуацыя ў Маскву можа сведчыць пра сур’ёзнасць траўмаў.
З Грознага ў Маскву сапраўды выляталі некалькі самалётаў — у тым ліку джэт Кадырава і так званы лятучы шпіталь. «Вязуць туды, відавочна, з-за вялікай розніцы ва ўзроўні медыцыны. Нягледзячы на аповеды прапаганды, ні сам Кадыраў, ні іншыя прадстаўнікі рэжыму ў Чачні не лечацца», — падкрэслівае суразмоўца.
У атачэнні Адама, паводле інфармацыі Niyso, часта бываюць дзеці іншых высокапастаўленых чачэнскіх чыноўнікаў — у тым ліку з сем’яў Дэлімханава і Даудава. «Перасоўванне ў картэжы — гэта панты і адначасова пастаянны страх. Кадыравы і іншыя прадстаўнікі рэжыму разумеюць, што насельніцтва іх ненавідзіць, таму перамяшчацца як звычайныя людзі яны не могуць».
Як высветліў «МО», Адаму Кадыраву належыць асабняк плошчай 2 тысячы кв. м, размешчаны непасрэдна насупраць рэзідэнцыі кіраўніка Чачні. Яго кошт складае каля 750 млн рублёў (каля 10 млн даляраў). У 2025 годзе перад палацам Адама знеслі дом, які засланяў від на рэзідэнцыю бацькі.
Каментары
- ёсць яшчэ прынамсi адзiны падобны "народны прэзідэнт" з рэкорднай колькасцю службы бяспекі
Супадзенне? Верагодна, што не.