Lehiendu Vietkaŭskaha muzieja, viadomaha krajaznaŭcu asudzili ŭ Homieli — vyrak vynosiŭ były śledčy
Były supracoŭnik Vietkaŭskaha muzieja staraabradnictva i biełaruskich tradycyj imia Šklarava, ekskursavod Alaksandr Nikicin byŭ asudžany da pazbaŭleńnia voli pa abvinavačvańni va ŭdziele ŭ pratestach, piša «Fłahštok».
Pavodle «Viasny», Alaksandra asudzili ŭ kancy vieraśnia pa č. 1 art. 342 KK (arhanizacyja i padrychtoŭka dziejańniaŭ, jakija hruba parušajuć hramadski paradak, albo aktyŭny ŭdzieł u ich). Prysud vynosiŭ Dzianis Kuzieniek, jaki staŭ sudździom litaralna niekalki miesiacaŭ tamu. Prynamsi, u kancy traŭnia 2024 hoda Kuzieniek byŭ jašče stažoram sudździ.
Da hetaha jon šmat hadoŭ pracavaŭ śledčym. Pavodle zhadak u dziaržaŭnaj presie, u 2017 hodzie Kuzieniek byŭ načalnikam Homielskaha rajonnaha adździeła Śledčaha kamitetu, a jak minimum da pačatku 2023 hoda zajmaŭ pasadu načalnika Rečyckaha RASK, byŭ pałkoŭnikam justycyi. Vidavočna, palityčnaja sprava stała adnoj ź pieršych, jakuju były śledčy vioŭ užo ŭ jakaści sudździ.
Dakładny termin, jaki jon prysudziŭ Nikicinu, pakul nie nazyvajecca. Viadoma, što da hetaha chłopca sudzili pa administracyjnym artykule za padpisku na staronku, abvieščanuju «ekstremisckaj». Heta adbyłosia ŭ pačatku maja. Z taho času staronki Alaksandra ŭ sacsietkach nie adnaŭlajucca.
Vierahodna, spačatku chłopca zatrymali za «padpiski», a pry praviercy telefona mahli znajści zdymki z pratestaŭ 2020 hoda, za što ŭrešcie zaviali kryminalnuju spravu.
Alaksandra nazyvali «lehiendaj Vietkaŭskaha muzieja», «lubimym ekskursavodam». Jon zachaplaŭsia krajaznaŭstvam jašče ź junactva, lubiŭ byvać u ekśpiedycyjach i źbirać staradaŭnija rečy. Niekatoryja navat vykuplaŭ za ŭłasnyja hrošy.
Apošni čas Alaksandr nie pracavaŭ u muziei. Jaho zabrali ŭ vojska ŭ kancy 2022 hoda, a paśla taho, jak jon adsłužyŭ, u muziej nie viartaŭsia. Pa źviestkach Fłahštoka, niezadoŭha da zatrymańnia chłopiec paśpieŭ papracavać na dziaržaŭnym telebačańni. Da hetaha jon nie raz davaŭ kamientary dziaržaŭnaj presie.
Ciapier čytajuć
«Adhuknuŭsia na 95% abjaŭ — i ŭsie admovili». Rasijaninu nie chočuć zdavać kvateru ŭ Hrodnie8
Kamientary