Urad Polščy ŭchvaliŭ stratehiju supraćdziejańnia nielehalnaj mihracyi. Stali viadomyja novyja detali
Polski ŭrad na pasiadžeńni 15 kastryčnika ŭchvaliŭ mihracyjnuju stratehiju na 2025—2030 hady, jakaja, siarod inšaha, praduhledžvaje prypynieńnie prava na prytułak dla mihrantaŭ i miechanizmy dla viartańnia dyjaspary. Pra heta paviedamiła vydańnie money.pl, jakoje aznajomiłasia z tekstam stratehii, piša «Jeŭrapiejskaja praŭda».
Dakumient pad nazvaj «Kompleksnaja i adkaznaja mihracyjnaja stratehija Polščy na 2025-2030 hady» maje bolš za 30 staronak i składajecca z vaśmi raździełaŭ. U ich razhladajucca takija pytańni, jak prava mihrantaŭ na prytułak, dostup da rynku pracy i intehracyja.
Stratehija, jak piša money.pl, praduhledžvaje ŭmacavańnie pamiežnaj infrastruktury i nadańnie pamiežnikam i palicyi mahčymaściaŭ «bolš efiektyŭna supraćdziejničać pieramiaščeńniu ludziej praz terytoryju Polščy». Dla kaardynacyi mihracyjnaj palityki prapanujecca stvaryć asobny orhan ułady.
Źmieny ŭ stratehii tyčacca vizavaj palityki — jana pavinna stać bolš vybaračnaj, kab pamienšyć kolkaść ujezdaŭ dla inšaziemcaŭ, i stvareńnia nacyjanalnaj prahramy viartańnia inšaziemcaŭ, čyja prysutnaść u Polščy była b «nieapraŭdanaj abo niepažadanaj».
Što ž tyčycca inšaziemcaŭ, jakija ŭsio ž traplajuć u Polšču, to stratehija prapanuje vyznačać ich status u zaležnaści ad stupieni ich intehracyi. Intehracyja budzie abaviazkovaja i dla inšaziemcaŭ, jakija atrymlivajuć prytułak pa humanitarnych mierkavańniach.
Z tekstu, jaki pryvodzić money.pl, paćviardžajecca ahučanaje raniej premjeram Polščy Donaldam Tuskam pałažeńnie ab mahčymym prypynieńni prava na prytułak u vypadku «pahroz hibrydnych dziejańniaŭ» i ŭ dačynieńni da inšaziemca, «u dačynieńni da jakoha jość padstavy ličyć jaho pahrozaj dla hramadstva dziaržavy, jakaja jaho prymaje».
Dadatkova, piša vydańnie, Polšča choča istotna pierahledzieć pracoŭnuju mihracyju, uzmacniŭšy kryteryi dla dazvołu inšaziemcam pryjazdžać dla pracy, i zrabić bolš strohimi patrabavańni dla vydačy dazvołaŭ na navučańnie ŭ polskich VNU.
Asobna ŭdakładniajecca, što dla šerahu krain, u tym liku i Biełarusi, umovy pracaŭładkavańnia inšaziemcaŭ pakul nie mianiajucca, ale nie vyklučany ich pierahlad z 2025 hoda.
Buduć taksama bolš strohimi patrabavańni dla atrymańnia polskaha hramadzianstva: budzie ŭviedzieny «hramadzianski test», spatrebicca viedańnie polskaj movy. Pierahledziać i pracedury nadańnia statusu repatryjanta i «karty palaka», piša money.pl.
U Jeŭrakamisii raniej zajavili, što namiery Polščy ŭ adnabakovym paradku admaŭlać u nadańni prytułku mihrantam pahražajuć parušeńniem abaviazacielstvaŭ krainy ŭ halinie pravoŭ čałavieka.
Paśla hetaha Tusk zajaviŭ, što biaśpieka polskaj miažy nie budzie pradmietam pieramovaŭ.
Kamientary