Vieršy rasstralanych u 1937-m paetaŭ prahučać u farmacie śpiektakla-kancerta
Režysiorka Ženia Davidzienka pastaviła novy śpiektakl «Rasstralanyja», jaki nahadvaje pra biełaruskich paetaŭ, što stali achviarami stalinskich represij i žyćcio jakich abarvałasia ŭ strašnuju noč z 29 na 30 kastryčnika 1937 hoda.
Muzyku da vieršaŭ paetaŭ dziaŭčyna stvarała razam sa śviežasabranym hurtom, a vizualizacyju dla śpiektakla i partrety zabitych tvorcaŭ zrabiła mastačka Anastasija Rydleŭskaja. Animacyju stvarała Alaksandra Babkova.
«Ja viedała pra toje, jak u 30-ja pracavała represiŭnaja mašyna, ale tolki niedzie hadoŭ piać tamu hłybiej pahruziłasia ŭ padziei «čornaj nočy». I mianie mocna šturchanuła historyja hetaha zabivańnia kultury, što aktualna i pa siońnia. Na žal, my ŭsio jašče žyviem u taki čas, dzie isnujuć zabojstvy ludziej i adbirańnie ŭ ich mahčymaści vykazvacca. Mianie jak režysiorku heta mocna kłapocić, — dzielicca Ženia Davidzienka. — I jak u režysiorki ŭ mianie jość mahčymaść dać ludziam, u jakich adabrali słovy (nie kažučy pra žyćcio), znoŭ zahučać».
Forma kancerta była abranaja režysiorkaj jak najbolš prydatnaja i jomistaja dla hučańnia sa sceny vieršaŭ.
«Ja jašče kali vučyłasia ŭ škole, to ŭsie vieršy vučyła, składvajučy ich u piesieńki», — kaža aŭtarka.
Pad svaje zadačy jana sabrała novuju muzyčnuju hrupu z bas-hitarysta (Andrej Skunicki), pijanistki (Volha Hachovič) i bubnački (Maryja Pińčuk). Vakalnyja partyi budzie vykonvać sama Ženia Davidzienka, a dadatkovyja histaryčnyja ŭrezki i detali prahučać hałasami siamji akcioraŭ Natalli i Andreja Bibikavych.
«Uvieś hety prajekt staŭ mahčymym, dziakujučy tamu, što hetyja ludzi za biaspłatna pahadzilisia sa mnoj ekśpierymientavać. My ŭsie źlilisia ŭ enierhii ŭzajemarazumieńnia, z žadańniem, kab hety materyjał prahučaŭ sa sceny. Taksama nas padtrymaŭ «Teatr Atelier», daŭšy placoŭku. Ludzi — heta najlepšaja padtrymka».
Śpiektakl byŭ sabrany kamandaj za dva miesiacy. Pakaz, jaki adbudziecca na biełaruskaj movie z polskimi subtytrami, zapłanavany na 31 kastryčnika ŭ Sopacie. Ale tych, chto nie maje mahčymaści pabačyć śpiektakl žyŭcom, u budučyni čakaje videaviersija, a taksama asobny albom z zapisanymi pieśniami na muzyčnych placoŭkach.
«U nastupnym hodzie ja b chacieła zrabić z hetaha jašče bolš poŭnamaštabny śpiektakl u płanie dekaracyj i isnavańnia akcioraŭ, bo pakul jany prosta pravadniki ŭ historyju», — dzielicca płanami režysiorka.
Ženia Davidzienka — vypusknica Biełaruskaj dziaržaŭnaj akademii mastactvaŭ, režysiorka, akciorka, śpiavačka. Pracavała ŭ Centry biełaruskaj dramaturhii. Na jaje rachunku — kala 25 čytak i 8 śpiektaklaŭ. Siarod apošnich prac — pastanoŭka «Da domu naŭprost 10 hadzin jazdy» (historyja troch dziaŭčat-imihrantak, jakija vypadkova sustrakajucca na plažy ŭ Hdańsku), vizualna-muzyčny śpiektakl «Chrybiet», jaki možna pasłuchać na jutubie I Spotify.
Padtrymka, jakuju ŭ Polščy vyłučali i biełaruskim teatram, stała dastupnaj tolki ŭkraincam? Razabralisia, što adbyvajecca i jak žyvie niezaležny teatr za miažoj
Akciory, jakija hrali ŭ RTBD i Vialikim teatry, z partniorami stvarajuć u Varšavie kafe-kamjunici — naviedalisia da ich u hości
Miuzikł, tryler ci prosta doŭhi klip Łedzi Haha: jakim atrymaŭsia novy «Džokier»
Ciapier čytajuć
Staŭ hierojem Mahiloŭskaha ŭniviera, źbiraŭ falkłor, pracavaŭ na biełarusizacyju sadkoŭ — raskazvajem pra Jaŭhiena Bojku, asudžanaha za salidarnaść z palitviaźniami3
Kamientary