Miuzikł, tryler ci prosta doŭhi klip Łedzi Haha: jakim atrymaŭsia novy «Džokier»

Krytyki pastavilisia da novaha «Džokiera» stroha. Sikveł, jakoha śviet čakaŭ piać hadoŭ, maje niečakana nizkija rejtynhi — da prykładu, 33% na resursie z kinavodhukami Rotten Tomatoes ci 5,3 bała z 10 na ŭpłyvovym kinasajcie IMDB. Kinakrytyki z bujnych zachodnich resursaŭ pišuć, što heta film «ni dla kaho» (Time Magazine), što jon marnuje akciorski talent Łedzi Haha (Vulture) dy i prosta źjaŭlajecca «surjozna niecikavym» (The New York Times).

Padobna, što sikveł paŭtoryć historyju pieršaha «Džokiera» ad 2019 hoda, jaki taksama atrymaŭ nieadnaznačnuju reakcyju krytykaŭ — praŭda, anałahičnych nizkich acenak tady nie było. U tym filmie, azdoblenym akciorskaj hulnioj hałoŭnaj zorki — Chaakina Fieniksa, — nas znajomiać ź niaŭdałym komikam Arturam Fłekam. Jon žyvie z maci, pracuje kłoŭnam i pakutuje ad nieŭrałahičnaha razładu, što prajaŭlajecca praź niekantralavany śmiech u napružanych situacyjach. 

Ź ciaham času ŭ Fłeka raźvivajucca i vidavočnyja mientalnyja razłady. Ni ŭ pieršym, ni ŭ druhim filmie nie nazyvajuć jaho dyjahnaz, ale ŭ jahonych pavodzinach prysutnyja rysy cełaha bukieta chvarob — depresii, narcysičnaha i antysacyjalnaha razładaŭ asoby. Hramadstva adrynaje Artura ź jaho asablivaściami, i pad upłyvam chejtu dy chvarobaŭ mužčyna pieratvarajecca ŭ sieryjnaha zabojcu. 

Častku svaich złačynstvaŭ jon robić u vobrazie kłoŭna: apranaje jarki kaścium, farbuje tvar. Tak Artur pieratvarajecca z saramlivaha, skažam adkryta, niaŭdačnika ŭ nachabnaha i cyničnaha Džokiera, jaki nibyta ŭvasablaje jahony ciomny bok.

Pavialičyć

U novym filmie Džokier — ci Artur Fłek — nibyta ačuńvaje ad svajoj mientalnaj chvaroby, i pryčyna hetamu — kachańnie. Fłek (znoŭ Chaakin Fieniks) znachodzicca ŭ «Arkchemie», psichijatryčnaj klinicy dla złačyncaŭ, i čakaje suda za ździejśnienyja zabojstvy. Jaho advakatka nastojvaje, što Fłek pakutuje ad razdvajeńnia asoby: maŭlaŭ, tyja traŭmy, jakija jon pieranosiŭ u dziacinstvie, stymulavali źjaŭleńnie ŭ im druhoj asoby, Džokiera, i mienavita jon adkazny za zabojstvy.

Tym časam Fłek prymaje leki i, zdajecca, jany jamu dapamahajuć, bo niama ŭ jaho chvaravitych prystupaŭ śmiechu, i depresiŭnyja nastroi Fłek zdolny zahnać usiaredzinu siabie. Bolš za toje, u jaho źjaŭlajucca siły, kab pryhledziecca da ludziej navokał i zaŭvažyć Charli Kuin (Łedzi Haha), błandynku ź vialikimi vačyma, jakaja taksama trapiła ŭ ścieny «Arkchema».

Pamiž Fłekam i Kuin uźnikaje pryciahnieńnie, i novaja kachanaja dapamahaje Arturu źbiehčy z kliniki, chacia i zusim nienadoŭha. Dziaŭčyna vychodzić na volu, a ŭ Fłeka napieradzie maštabnaje sudovaje raźbiralnictva z žyvoj tranślacyjaj, pierad jakim jon jašče i kidaje pić leki — niebiaśpiečnaja kambinacyja. 

Usio heta adbyvajecca, nie pavierycie, ź pieśniami dy tancami, bo novy «Džokier» — miuzikł.

I vyhladaje, što ŭ dačynieńni da hetaj historyi vybrać farmat miuzikła było pamyłkovaj idejaj, bo stužka nibyta hojsaje pamiž roznymi farmatami i nie daciahvaje da vydatnaści ni ŭ adnym ź ich. Tam jość i dramatyčnyja, i tryvožnyja momanty, saśpiens i psichałahizm, ale kali nadychodzić ich čas, hučać pieśni, i hradus dziejańnia nieprabačalna mocna spadaje. 

Naprykład, Arturu paviedamlajuć, što kali jon budzie pryznany vinavatym, jaho čakaje elektryčnaje kresła — prostaj movaj, «jaho padpalać». Fłek reahuje na heta pieśniaj. Jak vam?

Pavialičyć

Heta nie adzinaje vymiareńnie, u jakim stvaralniki «Džokier: šalenstva na dvaich» žadali ad filma zanadta šmat i nibyta nie viedali, čym jon musić zdavacca. Kali heta historyja kachańnia, to niepierakanaŭčaja, bo chimii, toj samaj mahičnaj iskry pamiž Džokieram i Charli, u stužcy niama. 

Apovied pra šalenstva? U naźvie filma jość słovy folie à deux, to-bok «šalenstva na dvaich», ale ž Charli Kuin zastajecca tajamničaj piersonaj. Niajasna, chto jana — sapraŭdy dziaŭčyna ź mientalnym razładam, jakaja spaliła baćkoŭskuju kvateru, ci budučaja psichijatarka z manipulatyŭnymi zdolnaściami, apantanaja asobaj Džokiera. Praściej pavieryć u druhoje, bo dziejańni kachanaj Džokiera časam vyhladajuć zanadta pradumanymi i ŭ niečym biezemacyjnymi. 

U stužcy jość svaje zahadki, chacia jany i artykulavanyja tak niahiehła, jak i kancoŭka hetaha filma abo scena seksu pamiž Džokieram i Kuin.

I ŭsio-taki novy «Džokier» nie bieznadziejny: jak by ni hramili jaho krytyki, heta chutčej historyja pra niaspraŭdžanyja čakańni, čym pra poŭny pravał pa ŭsich frantach.

• 0
• 0
• 0
• 4
• 1
• 0
• 0
• 0