Śpiakotnaje nadvorje achapiła bolšaść jeŭrapiejskaha kantynientu ŭ kancy minułaha tydnia — ułady mnohich krain vypuścili ekstrannyja papiaredžańni, u toj čas jak tempieratura praciahvaje raści i moža pabić novyja rekordy, piša Bi-bi-si.
Dziaržaŭnaje mietearałahičnaje ahienctva Ispanii (AEMET) paviedamiła, što ŭ subotu ŭ horadzie El-Hranada ŭ pravincyi Uelva (aŭtanomnaja supolnaść Andałusija) na paŭdniovym zachadzie krainy tempieratura pavietra dasiahnuła 46 hradusaŭ Celsija — heta moža stać rekordam dla červienia za ŭsiu historyju nazirańniaŭ (papiaredni byŭ zafiksavany ŭ 1965 hodzie ŭ Sievilli).
U niekatorych rajonach Partuhalii, Italii i Charvatyi dziejničaje čyrvony ŭzrovień niebiaśpieki; papiaredžańni taksama abvieščany ŭ Francyi, Aŭstryi, Bielhii, Vienhryi, Sierbii, Słavienii, Šviejcaryi i inšych krainach.
Ekśpierty papiaredžvajuć, što padobnyja ekstremalnyja źjavy nadvorja stanoviacca ŭsio bolš častymi z-za źmianieńnia klimatu na płaniecie.
«Ja liču, što takaja śpiakota nienarmalnaja dla hetaha času hoda. Z hadami ŭ mianie stvarajecca adčuvańnie, što ŭ Madrydzie stanovicca ŭsio haračej i haračej, asabliva ŭ centry horada», — skazaŭ AFP fatohraf Dyjeha, žychar ispanskaj stalicy, dzie tempieratura nabliziłasia da 40 hradusaŭ Celsija.
U Italii 21 horad na vychodnych znachodziŭsia ŭ stanie pavyšanaj hatoŭnaści z-za ekstremalnaj śpiakoty, u tym liku Miłan, Nieapal, Vieniecyja, Fłarencyja, Rym i Katanija.
«My pavinny byli naviedać Kaliziej, ale maja mama amal straciła prytomnaść», — skazała brytanskaja turystka Hanna Biekier, jakaja pryjechała ź joj u Rym z «śpiakotnaj Viarony».
U Barsiełonie žančyna, jakaja prybirała vulicy, pamierła paśla zakančeńnia źmieny ŭ subotu na fonie mocnaj śpiakoty. Ułady rasśledujuć jaje śmierć.
U Italii balnicy pa ŭsioj krainie paviedamili pra rost kolkaści vypadkaŭ ciepłavoha ŭdaru, asabliva siarod pažyłych ludziej, tych, chto pakutuje ad ankałahičnych zachvorvańniaŭ, i biazdomnych, paviedamiŭ AFP vice-prezident Italjanskaha tavarystva nieadkładnaj i ekstrannaj miedycyny (SIMEU) Marya Huaryna.
U Bałońni adkryli siem «klimatyčnych prytułkaŭ» z kandycyjanierami i pitnoj vadoj, a ŭłady Ryma zabiaśpiečyli biaspłatny dostup u haradskija basiejny dla ludziej starejšych za 70 hadoŭ.
Sierbija na vychodnych zafiksavała rekordnyja tempieratury z momantu pačatku nazirańniaŭ u XIX stahodździ. U Słavienii ŭ subotu była zafiksavana samaja vysokaja tempieratura ŭ červieni.
U niekatorych krainach śpiakotnaje nadvorje zachavajecca da siaredziny tydnia — u bližejšyja dni tempieratura pavysicca ŭ Francyi, Hiermanii, Italii i Vialikabrytanii.
U Łondanie na pačatku tydnia tempieratura moža pieravysić 34 hradusy Celsija, paviedamlajuć mietearołahi. U niadzielu dniom u centry brytanskaj stalicy zafiksavali +31°C.
Ciapier čytajuć
Małodšy syn Sachaščyka abvieščany źnikłym bieź viestak. Vyhladaje, jon vajavaŭ za Rasiju88
Kamientary