Kiraŭnica arhanizacyi «Naš dom» Volha Karač zajaŭlaje, što jaje muža Aleha Barščeŭskaha departujuć ź Litvy ŭ Biełaruś. «Departamient mihracyi pačaŭ praces», — pierakonvaje jana. Vyśviatlajem, što nie tak z hetaj zajavaj.
Što piša Volha Karač? Jana davodzić, što Litva admoviła ŭ palityčnym prytułku jaje mužu Alehu Barščeŭskamu i pačała jaho «praces departacyi». Prašeńnie dać palityčny prytułak Barščeŭski padavaŭ u vieraśni 2022 hoda.
«25 sakavika 2024 hoda jon atrymaŭ list z Departamienta mihracyi z prapanovaj dobraachvotna pakinuć Litvu, inakš budzie padvierhnuty pracesu prymusovaj departacyi ŭ Biełaruś, a značyć — u biełaruskuju turmu», — śćviardžajecca na sajcie arhanizacyi Karač «Naš dom».
Čamu Barščeŭski nie moža zastavacca ŭ Litvie i ci maje jon dakumienty, jakija dazvalali b znachodžańnie ŭ hetaj krainie (viza ci dazvoł na žycharstva), Karač nie ŭdakładniaje.
Kamientavać situacyju «Našaj Nivie» Volha nie stała.
U Departamiencie mihracyi Litvy «Našaj Nivie» adkazali, što bieź piśmovaj zhody Aleha Barščeŭskaha nie majuć prava razhałošvać jaho piersanalnyja źviestki.
Adnak zajava pra pačatak «pracesu departacyi» Aleha Barščeŭskaha nie moža być praŭdaj.
Pa-pieršaje, sama Karač na sajcie paźniej užo piša, što jaje muž «moža być departavany ŭ Biełaruś», a nie toje, što heta dakładnaje rašeńnie, jak jana śćviardžała spačatku.
Pa-druhoje (i heta bolš važna), Litva zvyčajna nie departuje ludziej u Biełaruś prymusova. Jak tłumačać litoŭskija jurysty,
u vypadku, kali ad čałavieka patrabujuć pakinuć Litvu, jon samastojna moža vylecieć u inšuju krainu na svoj vybar. Kali ŭ jaho niama vizy, to ŭ Hruziju ci Ałbaniju, naprykład.
Pytańnie jašče ŭ tym, što za pryčyna, pa jakoj čałaviek nie moža znachodzicca ŭ Litvie. Kali prablema ŭ tym, što ŭ jaho skončyłasia viza ci dazvoł na žycharstva i jon nie paśpieŭ ich praciahnuć, to, vylecieŭšy ŭ inšuju krainu, jon moža adkryć litoŭskuju vizu i viarnucca, kab dalej vyrašać pytańnie lehalizacyi.
Inšaja reč, kali čałavieka pryznali pahrozaj nacyjanalnaj biaśpiecy. Ale znoŭ ža — navat u hetym vypadku, jak pakazvaje situacyja z samoj Volhaj Karač, čałaviek, jakomu niebiaśpiečna viartacca na radzimu, moža zastacca ŭ Litvie, pakul u jaho dziejničaje humanitarny dazvoł na žycharstva. U Karač jon da žniŭnia 2024 hoda.
Kamientary
Hołodajet, pobirajetsia ....