Pačali pryjom zajavak na premiju imia Michała Aniempadystava za najlepšy dyzajn knižnaj vokładki
Premija zasnavanaja ŭ 2019 hodzie ŭ pamiać mastaka, paeta, fatohrafa, dyzajniera, publicysta, kulturołaha Michała Aniempadystava. Sioleta adbudziecca ŭručeńnie dźviuch premij: za vokładku knihi, vydadzienaj u 2022 hodzie, i za vokładku knihi, vydadzienaj u 2023-m.
«Sioleta, raspačynajučy novy siezon, my robim heta ŭ dzień pamiaci Michała Aniempadystava, chacia i dahetul niepamysna havaryć pra jaho ŭ minułym časie. Abirajučy simvaličnyja daty dla premii, my namahajemsia ŭšanavać jak asobu i darobak Michała, tak i važnuju dla jahonaha žyćcia śfieru — vokładku biełaruskaj knihi, što vyžyvaje ciapier nasupierak usim abstavinam. Vizuał nie mienš (zrešty, i nie bolš) važny za słova — apošnija hady adnoj ź mišeńniu represij stali vyjavy i kolery, jakija praciahvajuć havaryć, kali słovy ŭžo (ci jašče) maŭčać. Kniha, pieršaje ŭražańnie pra jakuju daje vokładka, siońnia ŭ centry našaj uvahi», — raskazała staršynia Biełaruskaha PENa Taćciana Niadbaj.
Aceńvacca budzie nie tolki dyzajn i palihrafičnaje vykanańnie vokładki, ale i ich adpaviednaść źmiestu knihi. Tamu ŭ žury premii ŭvojduć tvorcy, jakija pracujuć i ź vizualnymi vobrazami, i sa słovam.
Da ŭdziełu ŭ konkursie zaprašajucca biełaruskija dyzajniery, jakija stvaryli vokładki da papiarovych knih, što vyjšli ŭ 2022 i 2023 hodzie i adpaviadajuć chacia b adnamu z nastupnych kryteryjaŭ:
— kniha vydadziena ŭ biełaruskim vydaviectvie;
— napisana biełaruskim aŭtaram;
— napisana pa-biełarusku;
— raspaviadaje pra Biełaruś ci biełaruskuju kulturu.
Kab padać vokładku na konkurs, treba da 6 lutaha zapoŭnić formu.
Prapanavać knihu na konkurs mohuć sami dyzajniery, piśmieńniki, siabry žury, arhkamitet premii, vydaviectvy i naohuł luby čytač.
Premiju atrymaje aŭtar abo kamanda aŭtaraŭ vokładki. Sioleta adbuducca dźvie cyrymonii: viasnoj budzie abvieščany pieramožca premii za knihi, vydadzienyja ŭ 2022 hodzie; vosieńniu, na fiestyvali «Bardaŭskaja vosień», abvieściać najlepšuju vokładku knih, vydadzienych u 2023-m.
Hienieralnym partnioram premii źjaŭlajecca telekanał Biełsat.
Michał Aniempadystaŭ pracavaŭ u žanrach hrafiki, ilustracyi, fatahrafii. Jak dyzajnier stvaraŭ płakaty, paštoŭki, łahatypy, vokładki dla muzyčnych albomaŭ i navat etykietki śpirtnych napojaŭ pa-biełarusku. U pačatku 1990-ch ilustracyi Michała Aniempadystava vyznačali zapaminalny styl časopisa «Biarozka», dzie jon byŭ mastackim redaktaram. U 2011 hodzie mastak prailustravaŭ knihu Siarhieja Vituški «Dziń-dziliń: para hulać u kazki». Vokładki, stvoranyja Michałam Aniempadystavym, upryhožvajuć pierakłady Źbihnieva Hierbierta i Česłava Miłaša, knihi Andreja Chadanoviča, Taćciany Niadbaj, Siarhieja Chareŭskaha, Natałki Babinaj dy inšych biełaruskich aŭtaraŭ.
Čytajcie taksama:
Aniempadystaŭ: Šery koler — samy pryhožy. A ściah — bieła-čyrvona-bieły
Premiju Aniempadystava prysudzili Anatolu Łazaru za vokładku knihi «NIErasstralanyja»
Ciapier čytajuć
Na kanviercie Cichanoŭskaj napisana «Miedviediu O.V.» Što heta za čałaviek?12
Na kanviercie Cichanoŭskaj napisana «Miedviediu O.V.» Što heta za čałaviek?
Chrysta Hrozieŭ: ad ramantyka-radyjoamatara da čałavieka, jaki vykryŭ samyja zmročnyja tajamnicy HRU i FSB. Jak jaho vierbavała śpiecsłužba Luksiemburha i jak jon vymušany chavacca ciapier
Kamientary