Ina Kulej: Milinkievič pakul lažačy chvory, ale pilna sočyć za navinami
Ina Kulej, žonka viadomaha biełaruskaha palityka i hramadskaha dziejača Alaksandra Milinkieviča, raskazała ŭ fejsbuku, jaki ciapier stan jahonaha zdaroŭja paśla praviedzienaj 25 listapada minułaha hoda apieracyi, jakuju jon pieranios tak ciažka, što daktary zmahalisia za jahonaje žyćcio.
Pa słovach Iny Kulej, Milinkievič pa-raniejšamu znachodzicca ŭ balnicy, dzie jamu nie tak prosta, bo ŭ dadatak da asnoŭnaj chvaroby ŭvieś čas čaplajucca «ŭnutryšpitalnyja bakteryi». Tamu davodzicca lažać pa čarzie ŭ roznych adździaleńniach.
«Ale, vialiki dziakuj daktaram, paŭsiul prychodzili śpiecyjalisty fizijaterapieŭty i dapamahali z reabilitacyjaj. Asabliva dziakujem doktarcy Anastasii, jakaja nie tolki lačyła Alaksandra, ale i prosta razmaŭlała ź im pa-biełarusku, bo jana naša, ź Biełarusi. Na toj čas bolš havaryła jana, a Alaksandr tolki słuchaŭ. Siońnia i jon havoryć, pakul šeptam i, na žal, my nie ŭsio zdolnyja zrazumieć», — piša Kulej.
Pa jaje słovach:
«Pakul muž — lažačy chvory. Jon sprabuje sieści, ale ŭtrymać hety stan ciažka, ciahlicy słabyja. U jaho ruchajecca ŭsio, akramia levaj ruki, jana čujnaja, ale pakul amal nieruchomaja. Ź im možna kamunikavać — dzie słovami, dzie žestami, dzie vačyma.
Alaksandr słuchaje padkasty i intervju, my pierakazvajem jamu naviny, pakazvajem videa i fota. Zastajecca jašče šmat špitalnych asablivaściaŭ, ale dzień pa dniu, vielmi pavolna, navat marudna, idzie praces adužvańnia».
Karaciej, reabilitacyja Alaksandra Milinkieviča budzie składanaj i doŭhaterminovaj, a nakolki ŭdałaj — «viedaje tolki Hospad Boh».
Alaksandru Milinkieviču ciapier 78 hadoŭ. Jon sam z Hrodna, u 1990 — 1996 hodzie byŭ namieśnikam staršyni Hrodzienskaha harvykankama, u toj čas mocna paspryjaŭ biełarusizacyi ŭ horadzie. U 2006 hodzie byŭ kandydatam ad demakratyčnaj apazicyi sa statusam «adzinaha» na prezidenckich vybarach. Paśla stvaryŭ hramadski ruch «Za Svabodu» i da 2016 hoda byŭ jahonym kiraŭnikom. U apošnija hady źjaŭlajecca pazaštatnym daradcam Śviatłany Cichanoŭskaj, adnym z arhanizataraŭ «Volnaha biełaruskaha ŭniviersiteta».
25 listapada 2025 hoda Alaksandru Milinkieviču rabili apieracyju pa vydaleńni tromba, jaki zakryvaŭ 80% sonnaj arteryi. Padčas apieracyi ŭtvaryŭsia mocny kryvaciok, paśla čaho palityk trapiŭ u vielmi ciažkim stanie ŭ reanimacyju. Daktary ŭviali jaho ŭ miedykamientozny son i ŭrešcie zdoleli stabilizavać situacyju dy jaje palepšyć. Ale z taho času palityk znachodzicca na stacyjanarnym lačeńni ŭ balnicy.
Kamientary