Пачалі прыём заявак на прэмію імя Міхала Анемпадыстава за найлепшы дызайн кніжнай вокладкі
Прэмія заснаваная ў 2019 годзе ў памяць мастака, паэта, фатографа, дызайнера, публіцыста, культуролага Міхала Анемпадыстава. Сёлета адбудзецца ўручэнне дзвюх прэмій: за вокладку кнігі, выдадзенай у 2022 годзе, і за вокладку кнігі, выдадзенай у 2023-м.
«Сёлета, распачынаючы новы сезон, мы робім гэта ў дзень памяці Міхала Анемпадыстава, хаця і дагэтуль непамысна гаварыць пра яго ў мінулым часе. Абіраючы сімвалічныя даты для прэміі, мы намагаемся ўшанаваць як асобу і даробак Міхала, так і важную для ягонага жыцця сферу — вокладку беларускай кнігі, што выжывае цяпер насуперак усім абставінам. Візуал не менш (зрэшты, і не больш) важны за слова — апошнія гады адной з мішэнню рэпрэсій сталі выявы і колеры, якія працягваюць гаварыць, калі словы ўжо (ці яшчэ) маўчаць. Кніга, першае ўражанне пра якую дае вокладка, сёння ў цэнтры нашай увагі», — расказала старшыня Беларускага ПЭНа Таццяна Нядбай.
Ацэньвацца будзе не толькі дызайн і паліграфічнае выкананне вокладкі, але і іх адпаведнасць зместу кнігі. Таму ў журы прэміі ўвойдуць творцы, якія працуюць і з візуальнымі вобразамі, і са словам.
Да ўдзелу ў конкурсе запрашаюцца беларускія дызайнеры, якія стварылі вокладкі да папяровых кніг, што выйшлі ў 2022 і 2023 годзе і адпавядаюць хаця б аднаму з наступных крытэрыяў:
— кніга выдадзена ў беларускім выдавецтве;
— напісана беларускім аўтарам;
— напісана па-беларуску;
— распавядае пра Беларусь ці беларускую культуру.
Каб падаць вокладку на конкурс, трэба да 6 лютага запоўніць форму.
Прапанаваць кнігу на конкурс могуць самі дызайнеры, пісьменнікі, сябры журы, аргкамітэт прэміі, выдавецтвы і наогул любы чытач.
Прэмію атрымае аўтар або каманда аўтараў вокладкі. Сёлета адбудуцца дзве цырымоніі: вясной будзе абвешчаны пераможца прэміі за кнігі, выдадзеныя ў 2022 годзе; восенню, на фестывалі «Бардаўская восень», абвесцяць найлепшую вокладку кніг, выдадзеных у 2023-м.
Генеральным партнёрам прэміі з’яўляецца тэлеканал Белсат.
Міхал Анемпадыстаў працаваў у жанрах графікі, ілюстрацыі, фатаграфіі. Як дызайнер ствараў плакаты, паштоўкі, лагатыпы, вокладкі для музычных альбомаў і нават этыкеткі спіртных напояў па-беларуску. У пачатку 1990-х ілюстрацыі Міхала Анемпадыстава вызначалі запамінальны стыль часопіса «Бярозка», дзе ён быў мастацкім рэдактарам. У 2011 годзе мастак праілюстраваў кнігу Сяргея Вітушкі «Дзінь-дзілінь: пара гуляць у казкі». Вокладкі, створаныя Міхалам Анемпадыставым, упрыгожваюць пераклады Збігнева Герберта і Чэслава Мілаша, кнігі Андрэя Хадановіча, Таццяны Нядбай, Сяргея Харэўскага, Наталкі Бабінай ды іншых беларускіх аўтараў.
Чытайце таксама:
Анемпадыстаў: Шэры колер — самы прыгожы. А сцяг — бела-чырвона-белы
Прэмію Анемпадыстава прысудзілі Анатолю Лазару за вокладку кнігі «НЕрасстраляныя»
Сустрэчу Рыжанкова з Сікорскім папрасіў Мінск. Што каманда Ціханоўскай абмяркоўвала з палякамі да і пасля яе11
Каментары