U Abchazii pieradača dziaržaŭnaj dačy pad rezidencyju Pucinu vyklikała biesparadki
Apazicyja Abchazii vystupiła suprać ratyfikacyi pahadnieńnia z Rasijaj ab pieradačy ŭ arendu budynkaŭ dziaržaŭnaj dačy «Picunda». Parłamientaryi praviali hałasavańnie nočču.
Historyja ź dziaržaŭnaj dačaj pačałasia jašče ŭ 1995 hodzie. Tady kompleks budynkaŭ u Picundzie (Bičvincie) z prylehłaj terytoryjaj u 186 hiektaraŭ na ŭźbiarežžy Čornaha mora razam z 115 hiektarami «marskoj prastory» byŭ pieradadzieny ŭ arendu Fiederalnaj słužbie achovy Rasii na 49 hadoŭ.
Chacia termin dziejańnia damovy nie skončyŭsia, u studzieni 2022 hoda jana była tajemna praciahnutaja i adpraŭlena na ratyfikacyju ŭ parłamient. Pra heta stała viadoma tolki praź niekalki miesiacaŭ.
U lipieni 2022 hoda prajšli pieršyja pratesty. A Hramadskaja pałata na list deputataŭ Picundskaha haradskoha schoda vykazałasia ab praviadzieńni ekśpiertyzy pahadnieńnia.
Jak zajaŭlaŭ prezident niepryznanaj Abchazii Asłan Bžanija, Pucin choča, kab abjekt pracavaŭ jak paŭnavartasnaja rezidencyja prezidenta Rasijskaj Fiederacyi. I ŭ hetym jon nie bačyŭ ničoha drennaha. Samoj dačy kala 60 hadoŭ. Jana niekali była letniaj rezidencyjaj Mikity Chruščova. Z taho času kapitalny ramont ni razu nie pravodziŭsia.
Na pohlad jurystaŭ, z prajekta pahadnieńnia vynikaje, što na terytoryi abjektu mahčymaje praviadzieńnie dziaržaŭnych mierapryjemstvaŭ orhanami dziaržaŭnaj ułady Rasijskaj Fiederacyi biez apaviaščeńnia i ŭdziełu orhanaŭ ułady Abchazii. Heta pryviadzie da parušeńnia terytaryjalnaha viaršenstva apošniaj. Akramia taho, pahadnieńnie praduhledžvaje, što orhany ŭłady Abchazii zmohuć patrapić na terytoryju abjektaŭ tolki sa zhody pradstaŭnika Rasii. A heta parušaje suvierennyja pravy Abchazii.
Ekśpierty ŭžo ŭ toj čas dapuskali, što ŭ vypadku ratyfikacyi parłamientam pahadnieńnia situacyja moža pryvieści da masavych vystupleńniaŭ. Z hruzinskaha boku tady z asudžeńniem namieru ŭ Ch (Twitter) vystupiła prezidentka Sałomie Zurabišvili.
Praz paŭtara hoda stała viadoma, što parłamientaryi hatovyja da hałasavańnia.
Na vulicy 26 śniežnia vyjšła apazicyja, jakaja zajaviła, što budzie pravodzić biesterminovuju akcyju, bo ličyć, što dakumient supiarečyć kanstytucyi.
Kab abchitryć apazicyju, jakaja źbirałasia prysutničać na pasiadžeńni, deputaty sabralisia dla hałasavańnia nočču. A hałasavańnie adbyłosia rankam u 5:30.
Jak paviedamlajecca, u dakumient byli ŭniesieny źmieny, jakich patrabavała apazicyja. U pryvatnaści, mahčymaść skasavańnia damovy, kali Fiederalnaja słužba Rasii «padaryć, pradaść ci pieradaść dziaržaŭnuju daču» treciamu boku. Akramia hetaha, arandatar pavinien atrymlivać zhodu ŭłaśnika na budaŭnictva novych abjektaŭ i budynkaŭ.
Jak paviedamlajecca, za prahałasavała 25 parłamientaryjaŭ z 28 prysutnych (usiaho parłamient Abchazii naličvaje 35 deputataŭ).
Prezident niepryznanaj respubliki, jakaja faktyčna finansujecca Rasijaj, apieratyŭna padpisaŭ zakon ab ratyfikacyi damovy.
Rasijski bok nie pakinuŭ biez uvahi pratesty apazicyi. Pa słovach staršyni Kamiteta Savieta Fiederacyi pa mižnarodnych spravach Ryhora Karasina, jany padahravajucca zvonki.
«Heta pačynajuć tak zvanyja siabry buču arhanizoŭvać. Pobač tam znachodziacca siakija-takija krainy, jakija zacikaŭleny ŭ hetym», — zajaviŭ sienatar.
Čytajcie jašče:
U Abchazii chočuć dałučycca da Sajuza Rasii i Biełarusi
Rasija raźmieścić jašče adnu vajskovuju bazu ŭ Abchazii
Biełarusam dazvolili daŭžej znachodzicca ŭ niepryznanaj Abchazii
Prakuratura pra śmierć Miełkaziorava: žurnalist mieŭ chraničnuju chvarobu17
Prakuratura pra śmierć Miełkaziorava: žurnalist mieŭ chraničnuju chvarobu
Fiaduta — Kaleśnikavaj: Mašańka, ci viarniciesia na Miesiac, ci nie vučycie žyć tych, chto stamiŭsia nabivać huzy ad čarhovaha nastupańnia na hrabli3535
Kamientary