«Kola ŭziaŭ usio blizka da serca». Na «Mazyrsoli» rabočy pamior paśla taho, jak dyrektar pryhraziŭ jamu nie padoŭžyć kantrakta
1 śniežnia na pradpryjemstvie AAT «Mazyrsol» pamior rabočy. Jak raskazaŭ vydańniu «Fłahštok» znajomy pamierłaha, rabotnika zvali Mikałaj Zajac, i jon staŭ mižvolnaj achviaraj zaviedzienych dyrektaram pradpryjemstva «vajskovych paradkaŭ».
«Paśla ŭviadzieńnia zabarony na kureńnie rabočyja solzavoda chavalisia i kuryli ŭ cechach. Mikałaja złaviŭ načalnik i dałažyŭ kiraŭnictvu. Dyrektar jamu pryhraziŭ, što jamu nie padoŭžać kantrakta. Kola ŭziaŭ usio blizka da serca. Pierad zakančeńniem toj ža źmieny pamior», — raskazaŭ znajomy Zajca.
U 2020 hodzie adnym z hierojaŭ pieradačy telekanała «Mazyr» byŭ sušylščyk cecha № 2 AAT «Mazyrsol» z takim samym imieniem i proźviščam. Miarkujučy z kamientara, jaki Mikałaj Zajac daŭ tady televizijnikam, na pradpryjemstvie jon prapracavaŭ nie adzin dziasiatak hadoŭ.
Błohier Andrej Pavuk pieradaŭ u redakcyju «Fłahštoka» zapis zvanka, u jakim kiraŭnik pradpryjemstva Uładzimir Dvornik adkazvaje na pytańnie ab hibieli rabotnika.
«Nie zahinuŭ. Prosta sardečnaja niedastatkovaść. Pamior», — skazaŭ Dvornik, a paśla kinuŭ słuchaŭku.
Raniej Uładzimir Dvornik uvioŭ na pradpryjemstvie žorstkija miery, skiravanyja suprać kurcoŭ. Zhodna ź jaho zahadam toj, chto nie kuryć na terytoryi zavoda, atrymlivaje materyjalnaje štomiesiačnaje zaachvočvańnie. Pry hetym na «Mazyrsoli» dziejničaje kalektyŭnaja adkaznaść: dastatkova adnamu čałavieku z bryhady trapicca na kureńni ŭ nienaležnym miescy, kab spahnańnie było nakładziena na ŭsiu bryhadu. Dla kantrolu rabotnikaŭ u arhanizacyjnaj struktury pradpryjemstva stvorana «kamisija pa kultury vytvorčaści», jakuju ŭznačalvaje hałoŭny inžynier.
Ciapier čytajuć
Kalekcyju karcin Viktara Babaryki raspradajuć ź vialikimi źnižkami. Ale biez samaha darahoha dla jaho tvora4
Kamientary