Ministr zamiežnych spraŭ Rasii Siarhiej Łaŭroŭ nazvaŭ «tryźnieńniem» zajavu Kijeva ab tym, što Rasija źbirajecca padarvać Zaparožskuju atamnuju stancyju. Ale za šeść dzion na napadu na Ukrainu jon nazyvaŭ «tryźnieńniem» i papiaredžańni zachodnich raźviedak, što taki napad rychtujecca.
Pa słovach Łaŭrova, padobnyja zajavy robiacca ŭ ramkach infarmacyjnaj vajny suprać Maskvy.
«Heta biazhłuździca, my ŭžo šmatrazova ŭsio heta kamientavali», — skazaŭ ministr u adkaz na prośbu prakamientavać adpaviednyja zajavy.
«Toje, što hetaje zaciahanaje papiaredžańnie ŭžo šmatrazova ŭspłyvaje ŭ miedyjnaj prastory, pierš za ŭsio vusnami pradstaŭnikoŭ kijeŭskaha režymu, havoryć tolki ab adnym: usie hetyja ludzi natreniravanyja, u tym liku dla viadzieńnia infarmacyjnaj vajny, pierš za ŭsio anhłasaksami, palakami i navat prybałtami, jakija dla Ukrainy stali starejšymi tavaryšami», — adznačyŭ Łaŭroŭ.
«Kali vyniki hetych trenirovak nastolki žałasnyja, nastolki niepierakanaŭčyja, to mnie škada tych hrošaj, jakija zachodnija padatkapłacielščyki marnujuć na vypłatu zarobkaŭ nastaŭnikam, jakija trenirujuć takich absalutna niazdolnych, nie pomniačych siabie vučniaŭ», — dadaŭ kiraŭnik MZS Rasii.
Jak viadoma, kryzis na Zaparožskaj AES pačaŭsia ŭ suviazi ź jaje akupacyjaj rasijskimi vojskami 3-4 sakavika 2022 hoda. 11 vieraśnia minułaha hoda jana była całkam spynienaja.
Adnak dva reaktary znachodzilisia ŭ režymie «haračaha spynieńnia», zabiaśpiečvajučy paraj i ciapłom stancyju i horad Enierhadar. Na pačatak červienia hetaha hoda ŭ takim stanie znachodziŭsia tolki adzin enierhabłok.
22 červienia prezident Ukrainy Uładzimir Zialenski vystupiŭ z ekstrannym videazvarotam, u jakim zajaviŭ, što Rasija, vierahodna, rychtujecca ździejśnić terakt na Zaparožskaj atamnaj stancyi, jaki moža pryvieści da vykidu radyjacyi.
U intervju The New Statesman, jakoje vyjšła 23 červienia, kiraŭnik Hałoŭnaha ŭpraŭleńnia raźviedki Ukrainy Kiryła Budanaŭ padkreśliŭ, što Rasija zaviaršyła padrychtoŭku da teraktu. Načynienaja vybuchoŭkaj technika raźmieščanaja kala čatyroch z šaści enierhabłokaŭ stancyi.
25 červienia Uładzimir Zialenski zajaviŭ, što razmaŭlaŭ z prezidentam ZŠA Džo Bajdenam, premjer-ministram Kanady Džaścinam Trudo i prezidentam Polščy Andžejem Dudaj.
Pa jaho słovach, siarod inšaha jon abmierkavaŭ ź imi situacyju na Zaparožskaj atamnaj stancyi.
«Uvaha śvietu da najaŭnaj rasijskaj pahrozy na Zaparožskaj stancyi, na žal, pakul niedastatkovaja. Jak była niedastatkovaj i reakcyja na rasijski padryŭ Kachoŭskaj hidraelektrastancyi i śviadomuju sprobu rasijskich terarystaŭ trapić u dambu inšaha vadaschovišča ŭ Kryvym Rohu. Davioŭ partnioram infarmacyju, jakaja jość u nas, u našaj raźviedki ab rasijskim scenary ź miniravańniem Zaparožskaj AES, jaki dla terarystaŭ, vidavočna, zaćvierdžany», — zajaviŭ Zialenski.
Pakul Rasija ničoha nie ździejśniła. Ale treba pamiatać, što 18 lutaha 2022 hoda z takoj ža ŭpeŭnienaściu Łaŭroŭ nazyvaŭ biazhłuździcaj śćviardžeńni Zachadu i Kijeva ab padrychtoŭcy napadu na Ukrainu. Praz šeść dzion Rasija heta zrabiła.
Čytajcie jašče:
Zialenski paćvierdziŭ, što Ukraina pačała kontrnastupleńnie
Akupacyjnaja administracyja Zaparožža zajaviła, što vyvoziła ŭkrainskich dziaciej u Biełaruś
Rasijskija vojski mahli zaminiravać Zaparožskuju AES — The Insider
Kamientary