«Vielmi-vielmi abmiežavana»: u Kijevie raskazali pra dypłamatyčnuju kamunikacyju ź Biełaruśsiu
Ministr zamiežnych spraŭ Ukrainy Dźmitryj Kuleba zajaviŭ, što adzinym kanałam kamunikacyi Kijeva i Minska źjaŭlajucca dypłamatyčnyja pradstaŭnictvy krain.
«U nas jość pasoł u Biełarusi, u nas jość ambasada ŭ Biełarusi. U ich jość ambasada ŭ Kijevie. Heta adzinyja kanały znosin. To bok vielmi sucha-aficyjna, ale kali vy dumajecie, što tam štodnia razryvajecca paštovaja skrynka ad kamunikacyi, to heta nie tak. Heta vielmi-vielmi abmiežavanyja kantakty», — skazaŭ Dźmitryj Kuleba ŭ intervju ŭkrainskamu vydańniu LB.ua.
Adkazvajučy na pytańnie žurnalista ab mahčymym niepasrednym udziele Biełarusi ŭ vajnie z Ukrainaj, ministr nahadaŭ, što Rasija ŭžo vykarystoŭvaje biełaruskuju terytoryju.
«Kali havorka pra biełaruskuju armiju, miarkuju, što hetyja ryzyki buduć pavialičvacca praparcyjna mahčymym pośpiecham rasijskaj armii na terytoryi Ukrainy. Da taho času, pakul biełaruskaja armija budzie dakładna razumieć, što Uzbrojenyja siły Ukrainy zdolnyja im surjozna «navalać», jany buduć usialak adterminoŭvać svoj zachod. Stanam na siońnia jany heta dakładna ŭśviedamlajuć», — patłumačyŭ Kuleba.
Ukraina za čas rasijskaj vajny i abstrełaŭ z terytoryi Biełarusi nie nakiravała adpaviednaj dypłamatyčnaj noty z prośbaj patłumačyć situacyju. Skaračeńnie kolkaści dypłamatyčnaha piersanału Ukrainy ŭ Biełarusi stała nahodaj adzinaha za ŭvieś čas vajny aficyjnaha pratestu, z nahody jakoha ŭ biełaruskaje MZS Kijeŭ adpraviŭ notu.
U zajavie, ź jakoj Ministerstva zamiežnych spraŭ Ukrainy vystupiła 25 lutaha ab ahresii Rasii, Biełaruś zhadvałasia ŭ šerahu pieraličeńnia kirunkaŭ, ź jakich adbyłasia ataka rasijskich vojskaŭ. Ukrainskija dypłamaty zaklikali krainy Zachadu ŭvieści sankcyi suprać Rasii i dapamahčy zbrojaj dla bolš efiektyŭnaj baraćby z rasijskaj ahresijaj.
U niekalkich krainach Jeŭropy 25 lutaha vyklikali biełaruskich ambasadaraŭ u nacyjanalnyja MZS praz toje, što Biełaruś dapamahaje rasijskaj ahresii.
Dahetul Biełaruś i Ukraina majuć dypłamatyčnyja dačynieńni, chacia biełaruskija dypłamaty amal u poŭnym składzie na čale z ambasadaram Iharam Sokałam vyjechali z Ukrainy.
U Biełarusi ŭkrainskaja ambasada praciahvaje pracavać i dapamahać ukrainskim hramadzianam, jakija vyjechali ŭ Biełaruś dobraachvotna albo ich niezakonna vyvieźli rasijskija vojski pry adychodzie z pamiežnych ź Biełaruśsiu abłaściej Ukrainy.
Dziadok raskazaŭ, jak pavodziŭ by siabie ŭ siońniašniaj Biełarusi i što budzie dalej5
Kamientary