«U maim asiarodździ šmat ludziej, u jakich elemientarna niama seksu miesiacami, a to i hadami»

«U maim asiarodździ šmat ludziej abodvuch pałoŭ (30 i starejšyja), u jakich elemientarna niama seksu miesiacami, a to i hadami. Nie kažučy ŭžo pra paŭnavartasnyja adnosiny. Pryčyny banalnyja — ciažkaści ŭ kamunikacyi, niehatyŭny vopyt u siemjach z baćkami», — dzielicca čytač «Našaj Nivy».

Jon raskazvaje historyi svaich znajomych. Adzin pryjaciel skardzicca, što žančynam patrebnyja tolki bahaciei. Tamu dziaŭčynu da siabie jon kliča tolki tady, kali jość hrošy — raz na miesiac.

U inšaha šlub raspaŭsia praź finansavuju niestabilnaść. Žonka zarablała ŭ dva razy bolš. I z novaj dziaŭčynaj adnosiny nie skłalisia, bo jana bolš zarablała. 

Jašče ŭ adnaho nie składvajecca z adnahodkami. Tamu seks u jaho zvyčajna z žančynami našmat starejšymi — ad 50 da 60 hod. I nie tak časta, jak chaciełasia b. Letaś jon pačaŭ chadzić da psichaterapieŭta i pić antydepresanty. 

«Ad mužčyn patrabujuć usio mienš spantannaści»

Čamu ŭ mnohich mužčyn nie składvajucca intymnyja adnosiny? Biełaruski psichaterapieŭt i seksołah (pa prośbie śpiecyjalista, jaho imia nie ŭkazvajecca) nazyvaje niekalki pryčyn. Adna ź ich — novyja zapyty hramadstva. 

«Socyum patrabuje ad mužčyn navykaŭ, jakija nie charakternyja dla hetaha hiendaru. Naprykład, rabić upor u bok raźvićcia intelektualnych resursaŭ, šmatviektarnaha myśleńnia i ŭsio mienš spantannaści, momantaŭ, źviazanych z emacyjnaj aktyŭnaściu. Za košt hetaha, viadoma, mužčynu šmat u čym davodzicca strymlivać svaje paryvy, ​​i z-za hetaha cierpić dola seksualnaj aktyŭnaści.

Jak vynik: u mužčyn raźvivajecca šmat składanych nieŭratyčnych prablem. Asabliva tut «pracujuć» tryvožnaści, fobii, sacyjalnyja strachi. Takija psichałahičnyja składanaści ciahnuć za saboj prablemy ŭ seksualnaj kamunikacyi», — dzielicca nazirańniami śpiecyjalist.

Seksualnaje žyćcio ščylna zaviazanaje z emacyjnym stanam. Kali čałaviek u stresie, pryhniečany, heta nie spryjaje tamu, kab pačynać adnosiny.

Pieraškodaj stanovicca taksama nievysoki ŭzrovień kultury kamunikacyi.

«Ludzi banalna nie ŭmiejuć razmaŭlać adno z adnym, słuchać, vytrymlivać paŭzy, danosić svaje pieražyvańni», — zaŭvažaje psichaterapieŭt. 

Pavialičyć

Pa jaho słovach, adsutnaść seksu z partnioram doŭhi čas — nie adchileńnie ad normy. 

«Heta całkam moža ŭkładvacca ŭ partniorskuju formu. Masturbacyja, u niejkim płanie, źjaŭlajecca taksama seksam. A joj bolšaść ludziej zajmajecca jak padčas adsutnaści ŭ žyćci partniora, tak i pry jaho prysutnaści. Kali mužčyna i žančyna dastatkova doŭha znachodziacca biez seksualnych adnosin, ale pry hetym praciahvajuć seksualnuju aktyŭnaść, źviazanuju z samazadavalnieńniem, to nijakich prablem tut niama.

Kali ŭsio ž taki čałaviek admaŭlajecca pa jakich-niebudź pryčynach ad seksualnaj aktyŭnaści, to tady, viadoma, heta adbivajecca na arhaniźmie i na psichałahičnym stanie. Naprykład, mohuć mianiacca harmony, emacyjny stan.

Kali seksualnaja aktyŭnaść nievysokaja, to ŭ arhaniźmie tyja sistemy i miechanizmy, jakija adkazvajuć za heta, buduć niezapatrabavanyja. Arhanizm budzie ich abiastočvać i, kab viarnuć seksualnuju ciahu, jakasnaje ŭzbudžeńnie, treba budzie prykładvać šmat namahańniaŭ.

Plus heta zaležyć ad uzrostu, seksualnaha tempieramientu, asablivaściaŭ asoby», — tłumačyć surazmoŭca.

«Žančynam navat spakajniej, kali jany zarablajuć na ŭzroŭni mužčyny»

Kali mužčynu nie zadavalniaje, što žančyna choča bačyć pobač z saboj tolki zamožnaha spadarožnika, to ci nie varta pašukać inšuju, razvažaje śpiecyjalist.

«Jość ludzi z roznymi kaštoŭnaściami, vychavańniem. U tym liku i tyja, jakija hatovyja vykarystoŭvać seksualnaść i seks jak instrumient adnosin, jakimi možna karystacca ŭ ramkach damoŭlenaściaŭ i manipulavać».

Ź inšaha boku, pobač z žančynaj, jakaja zarablaje bolš, mužčyna moža adčuvać siabie niekamfortna praz sacyjalnyja stereatypy. Chacia mnohim žančynam navat spakajniej, kali jany zarablajuć na ŭzroŭni mužčyny. Tady źjaŭlajecca svaboda, mahčymaść isnavać nie ŭ miežach finansavaj zaležnaści, a ŭ narmalnych adnosinach.

«Ale ci hatovy mužčyna zarablać bolš, kali ŭ hetym budzie nieabchodnaść? Tamu što žančyna, jak ni kruci, kali začynaje dzicia, tracić šmat resursaŭ, a ŭ mužčyny jany iduć na samaraźvićcio, pracoŭnuju dziejnaść. I hipatetyčna mužčyna moža pajści na ŭzrovień vyšej i palepšyć uzrovień dachodaŭ. Dumaju, što pieražyvać jamu, što jon zarablaje mienš za žančynu, davoli nierazumna. 

Tut pytańnie matyvacyi i ŭzroŭniu žyćcia. Usie my ź siemjaŭ z roznym materyjalnym dastatkam, da jakoha pryvykajem i potym padtrymlivajem u žyćci, ale heta nie aznačaje, što kali budzie nieabchodnaść, my nie zmožam jaho pavysić». 

Seks — nie tolki dola maładych, źviartaje ŭvahu naš surazmoŭca na jašče adzin stereatyp.

«Na žal, u našaj krainie i krainach blizkaha zamiežža znoŭ-taki z pryčyny nizkaha ŭzroŭniu kłopatu pra seksualnaje zdaroŭje ludzi pačynajuć zdavać pazicyi raniej, čym heta praduhledžvaje pryroda.

Ideja taho, što ŭ cełym, kali my padtrymlivajem jakaść seksualnaha žyćcia da 50 hadoŭ, to dalej pažynajem toj nazapašany dośvied, jaki jość. Kali niama surjoznych prablem sa zdaroŭjem, seksualnaje žyćcio nie mocna mianiajecca i całkam adekvatna dazvalaje realizoŭvać seksualnyja funkcyi i padtrymlivać jakaść uzajemaadnosin. Dla hetaha treba kłapacicca pra zdaroŭje i vałodać minimalnymi viedami pra toje, jak pracuje arhanizm», — raić śpiecyjalist.

Čytajcie taksama: 

U Biełarusi antyrekord naradžalnaści. Spytali ŭ maładych ludziej, čamu jany nie hatovyja da dziaciej

Ci sapraŭdy dla zdaroŭja karysna prachodzić 10 tysiač krokaŭ štodzień? Nie, tolki 7500

Ci dastatkova mienš jeści, kab pachudzieć? Usio nie tak prosta

• 26
• 0
• 10
• 8
• 1
• 2
• 5
• 0