«Upadabałasia — i skrali». Dyzajn sukienki-vycinanki na mižnarodny konkurs pryhažości śpisali z tvora biełaruskaj majstrycy
16 maja ŭ Majami projdzie konkurs «Mis Suśvietu». Jak heta zvyčajna byvaje na takich konkursach, adno z defile pryśvieciać nacyjanalnym uboram. Udzielnica ad Ukrainy Lizavieta Jastremskaja ŭžo pachvaliłasia svajoj sukienkaj z tradycyjnaj ukrainskaj vycinankaj. Tolki akazałasia, što vycinanka taja — biełaruskaja. I dyzajn uziali biez dazvołu aŭtara. Vycinanku zrabiła narodnaja majstryca z Maładziečna Lizavieta Čyrvoncava.
Tak vyhladaje sukienka.
A na hetym fota — aŭtarskaja vycinanka Lizaviety Čyrvoncavaj.
Sama Lizavieta daviedałasia pra heta piać dzion tamu ad biełaruskich i ŭkrainskich kaleh — jany zaŭvažyli znajomy dyzajn i stali pytać u majstrycy, ci nie jaje heta praca.
«Mnie skinuli infarmacyju pra firmu Rada.Ethno, jakaja šyła sukienku. I jaje dyzajnier Natalla Šaŭčuk napisała, što ŭ volnym dostupie ŭ internecie znajšła vyjavu majoj vycinanki. Jany nibyta nie zmahli adšukać ni aŭtara tvora, ni krainu, adkul heta. Heta tak śmiešna: kali jany pradstaŭlajuć na konkursie svaju krainu, dyk čamu nie źviarnulisia da svaich majstroŭ? U ich jość sajt ukrainskaj vycinanki, nieskładana prakansultavacca z sajuzam mastakoŭ. Upadabałasia — i skrali».
Kanflikt tak i nie vyrašyli. Udzielnica konkursu pryhažości ŭžo adpraviłasia ŭ ZŠA sa svaim harderobam. Chutčej za ŭsio defilavać dziaŭčyna budzie ŭ sukiency ź biełaruskaj vycinankaj.
«Kali ja napisała pra kampiensacyju, u dyzajnierskaj firmie adrazu zamaŭčali. Prajšło try dni — jany tak ničoha i nie adkazali.
Ciažka dabicca praŭdy, asabliva ŭ čužoj krainie. Kali ja źviarnułasia da jurystaŭ, jany skazali, što kab heta było na terytoryi Biełarusi, možna było b zajavu padać. A pakolki heta za miažoj, treba jechać tudy, tracić hrošy na kansultacyi z ukrainskimi jurystami, prysutničać na sudach. Na hety momant dla mianie heta vielmi składana.
Kali ŭ mianie minuły raz była niepryjemnaja situacyja, ź inšaj ukrainskaj dyzajnierkaj, my vyrašyli heta pytańnie da suda. Paśla doŭhaj pierapiski jana spłaciła mnie kampiensacyju».
Čytajcie pra heta: Viadomaja ŭkrainskaja dyzajnierka skarystałasia malunkami biełaruskaj mastački, a ŭ znak padziaki prysłała joj chustku
Vycinanka, dyzajn jakoj skarystali dla sukienki na konkurs pryhažości, była zroblena ŭ 2016 hodzie. Heta centralnaja častka trypcicha, u jakim majstryca pieradała svajo adčuvańnie spadčyny. Na joj — Maci Božaja, jakaja molicca za našu krainu. Na bakavych častkach źmiaščalisia simvaličnyja vobrazy rodnaj chaty i radavodu.
«Hety trypcich raźjechaŭsia ŭ roznyja kancy śvietu. Centralnaja praca zaraz znachodzicca ŭ Amierycy ŭ asabistaj kalekcyi», — dzielicca majstryca.
Jana tłumačyć, što tyja vycinanki, jakija možna pabačyć u nas, pieravažna aŭtarskija.
«Sučasnaja biełaruskaja vycinanka bazujecca na narodnych tradycyjach, ale ŭ nas ža amal nie zastałosia vyrabaŭ, starejšych za 1950-ja hady. Taki materyjał — štości spalili, štości struchnieła. Raniej nie źviartali ŭvahu na hety vid mastactva, jon ža adradžacca pačaŭ u 1970-ja hady. Amal usie majstry, jakija zaraz zajmajucca vycinankaj, majuć mastackuju adukacyju.
Ciapier rychtujucca dakumienty, kab pryznać vycinanku historyka-kulturnaj kaštoŭnaściu. Moža, heta budzie spryjać abaronie tvorčaści ad płahijatu».
Čytajcie taksama: Mastačka Lizavieta Čyrvoncava z Maładziečna prapanuje stvaryć jašče adzin brend Biełarusi
Biełaruskaje mastactva vycinanki atrymaje status historyka-kulturnaj kaštoŭnaści
Ciapier čytajuć
Čerhaŭ na miažy ciapier nie budzie? Čaho čakać ad adkryćcia «Bruzhoŭ» i «Bierastavicy»4
Kamientary