U aŭtazaku i RUUS byŭ źbity 14-hadovy školnik, a ciapier jamu nie vydajuć nakiravańnie na sudmiedekśpiertyzu
Jak raspavioŭ Maksim siamji, za siem hadzin zatrymańnia jaho trojčy źbili: adrazu bili «ludzi ŭ zialonaj formie», paśla bili ŭ aŭtazaku i ŭ Centralnym RUUS. Jak i inšych zatrymanych, padletka prymušali kryčać «Ja lublu AMAP. Słava AMAPu», piša TUT.BY.
Ciapier blizkija Maksima chočuć pryciahnuć da adkaznaści tych, chto jaho źbiŭ, ale praz zahružanaść u milicyi padletku nie dajuć nakiravańnie na sudova-miedycynskuju ekśpiertyzu.
«Vosiem hadzin my pralažali va ŭnutranym dvoryku milicyi, nas było kala 100 čałaviek. Spać niemahčyma, vakoł ciabie ŭvieś čas chodziać, nie tak rassunuŭ nohi — bjuć kirzačami ŭ pach. Bjuć tak, što potym ty dakładna nohi ŭžo nie ssunieš. Praviarali asabistyja rečy, u 14-hadovaha chłopca znajšli małatok u zaplečniku, za heta jaho bili hadzinu. Heta była ciažkaja noč. Bili ŭsich. Ranicaj pastavili da ściany, my zamiarzali, prasili, kab dazvolili prysiadać, tak stanaviłasia ciaplej», — tak toje, što adbyvałasia ŭ Centralnym RUUS Minska, apisvaŭ TUT.BY zatrymany Alaksandr.
TUT.BY adšukaŭ siamju 14-hadovaha Mikity, u intaresach dziciaci jaho imia źmienienaje, ale ŭsie dadzienyja jość u redakcyi. Uviečary 11 žniŭnia školnik išoŭ dadomu paśla akcyi salidarnaści kala stancyi mietro «Puškinskaja» i tam ža byŭ zatrymany ŭ 22.10.
«Kim mienavita, jon nie viedaje, kaža, heta byli «ludzi ŭ zialonaj formie». Brat adrazu skazaŭ, što jamu 14 hadoŭ, bo kali sadžajuć u aŭtazak, pytajucca proźvišča, imia, datu naradžeńnia i adras prapiski, — raspaviadaje TUT.BY siastra chłopca Natalla. — Mikitu bili pry zatrymańni, u aŭtazaku i ŭ Centralnym RUUS. Ale ja chaču adznačyć: małatok u zaplečniku ŭ jaho znajšli tolki pry ahladzie rečaŭ u RUUS. Ubačyli i razzłavalisia. My potym pytalisia, navošta jon uziaŭ hety małatok, adkazaŭ, što išoŭ baranić krainu. U zaplečniku jašče znajšli hamburhier, miedycynskija maski, binty, survetki i vadu».
Kali viečaram siamja nie zmahła datelefanavacca da Mikity, stała nabirać 102, tam dapamahčy nie zmahli. U 5 ranicy z Centralnaha RUUS pazvanili i paviedamili: treba pryjechać i zabrać padletka. Na toj momant prajšło ŭžo 7 hadzin.
«U brata hłybokija rany na kaleniach, łokciach, ślady na łbie i padbarodku — heta ŭsio ad pozy, u jakoj jon doŭha stajaŭ. Ich apuskali na kaleni, ruki za śpinaj abo za hałavoj, tvaram u asfalt. Jašče ślady ad dubinak na jahadzicach, śpinie, nahach, a na ruce zastalisia ślady čužych palcaŭ, mabyć, jaho ŭtrymlivali, — Natalla pieraličvaje traŭmy školnika. — Brat skazaŭ, što pabyvaŭ u piekle, samaje strašnaje i balučaje było stajać na kaleniach u hetaj pozie. U aŭtazaku ich prymušali śpiavać himn, kryčać: «Ja lublu AMAP. Słava AMAPu ». Pytalisia ŭ jaho: «Za kaho, s…, budzieš hałasavać?». Jamu ž 14 hadoŭ! Kali mama pryjechała zabirać Mikitu z RUUS, joj vynieśli na podpis niejki pratakoł, kopiju nie dali. Z taho, što jana zapomniła, tam było ŭkazana: Mikita ŭdzielničaŭ u antyŭradavym mitynhu, u jaho znajšli małatok. Skazali, nijakija dakumienty mamie na pracu nie pojduć, u škołu taksama, tolki treba prynieści charaktarystyku.
Pa słovach Natalli, siamja ŭžo źviartałasia ŭ Śledčy kamitet z pytańniem ab prachodžańni sudova-miedycynskaj ekśpiertyzy, tam adpravili ŭ RUUS pa miescy žycharstva.
«Adkazali, što ciapier usie zaniatyja, treba telefanavać paśla 19 žniŭnia i, maŭlaŭ, nie varta chvalavacca, paboi nie syduć. My sfatahrafavali ŭsie traŭmy i źviarnulisia da traŭmatołaha, kab usio zafiksavać. Chočam pryciahnuć da adkaznaści tych, chto biŭ brata, — dadaje Natalla. — Kali chtości byŭ vidavočcam taho, što adbyvałasia ź Mikitam paśla zatrymańnia, my prosim adhuknucca».
Kamientary