Ranicaj 21 lipienia ŭ centry ŭkrainskaha horada Łuck uzbrojeny złačynca zachapiŭ pasažyrski aŭtobus, paviedamlaje palicyja Vałynskaj vobłaści.
Pavodle źviestak pravaachoŭnych orhanaŭ, pry sabie jon maje vybuchoŭku i zbroju. U sałonie aŭtobusa znachodziacca kala 20 zakładnikaŭ.
U vobłaści uviedzieny apieratyŭny płan «Zakładnik», centr horada ačepleny palicyjaj.
Miascovaje vydańnie «vałynskija naviny» infarmuje, što vidavočcy čuli streły. Pierad dramteatram znachodzicca aŭtobus z paškodžanymi voknami.
Pa słovach namieśnika ministra ŭnutranych spraŭ Antona Hieraščanki, pravaachoŭniki skancentravany na dyjałohu z napadnikam.
«Asoba, jakaja zachapiła zakładnikaŭ, patelefanavała ŭ 09:25 u palicyju i pradstaviłasia imiem Maksim Płachoj», - adznačyŭ jon.
Jon taksama dadaŭ, što ŭ Internecie jość kniha «Fiłasofija złačynca» aŭtarstva Maksima Płachoha. U joj apisvajecca znachodžańnie aŭtara ŭ miescach źniavoleńnia i jaho pohlady na žyćcio.
11:20
Korrespondent.net paviedamlaje, što pierad zachopam aŭtobusa jon apublikavaŭ dopis u Twitter, u jakim patłumačyŭ svoj učynak.
U pryvatnaści, jon pavinšavaŭ usich z dniom antysistemy i zajaviŭ, što «dziaržava — heta pieršy teraryst».
Jon patrabuje, kab kiraŭniki sudoŭ, ministerstvaŭ, prakuratury, parłamienta, cerkvaŭ zapisali i vykłali ŭ Youtube zajavy ab tym, što mienavita jany - terarysty ŭ zakonie.
«Praŭda z vusnaŭ 24-ch vyratuje žyćci sotniaŭ», - napisaŭ jon.
Miascovyja ŚMI sa spasyłkaj na palicyju paviedamlajuć, što zachopnik zakładnikaŭ źjaŭlajecca byłym udzielnikam ATA. Adnak u kamientary RBK-Ukraina ŭ pravaachoŭnych orhanach hetuju infarmacyju nie paćviardžajuć.
12:15
Teraryst zajaviŭ, što vybuchoŭka moža być schavanaja ŭ ludnym miescy. U mužčyny šmat zbroi. Jon maje hranaty i minu.
«Svaje patrabavańni jon apublikuje ŭ sacsietkach», - havorycca ŭ paviedamleńni.
Na miesca vylecieŭ kiraŭnik MUS krainy, u Łuck pierakidvajuć vajskoŭcaŭ.
12:45
Žycharoŭ Łucka prosiać zastavacca doma i na pracoŭnych miescach pakul u horadzie praciahvajecca śpiecapieracyja pa vyzvaleńni zakładnikaŭ. Pra heta havorycca ŭ zajavie Słužby biaśpieki Ukrainy, paviedamlaje RBK-Ukraina.
Zaraz pravaachoŭniki robiać usio mahčymaje dla vyzvaleńnia kala 10 zakładnikaŭ, jakija znachodziacca ŭ zachoplenym aŭtobusie «Bieraściečka-Krasiłaŭka».
Infarmacyi ab paciarpiełych pakul niama.
12:55
Pradstaŭniki ŭładaŭ paviedamili, što na kantakt mužčyna nie idzie. Krynica «Interfaks-Ukrainy» raspaviała, što mužčyna «pieryjadyčna biare telefon, ale nijakich kankretnych patrabavańniaŭ nie vystaŭlaje, a kaža tolki ahulnyja frazy ab baraćbie ź sistemaj, anarchii i tamu padobnym».
Teraryst, što zachapiŭ aŭtobus z pasažyrami va ŭkrainskim Łucku, akazaŭsia ŭradžencam Rasii
Kamientary