Asnoŭnaja ŭvaha pry restaŭracyi, inicyjataram jakoj stała miascovaja ŭłada, skancentravana na paŭnočnuju viežu i paŭnočna-ŭschodni korpus.
Dziakujučy dvum hrantam sa śpiecfondu Prezidenta pa padtrymcy kultury i mastactva na praviadzieńnie rabot nakiravany 1 miljon 50 tysiač rubloŭ.
Toj, chto čas ad času byvaje la ścien pomnika architektury, nie moh nie zaŭvažyć źmien, jakija tut adbyvajucca. Šmatlikich turystaŭ užo sustrakaje uznoŭlenaja zvonku vieža, na dachu jakoj krasujecca fluhier z hierbam rodu Sapiehaŭ — «Lisam».
— Pry jaje restaŭracyi, — adznačaje mietadyst pa muziejach i historyka-kulturnaj spadčynie adździeła mietadyčnaj raboty Ašmianskaha rajonnaha centra kultury Siarhiej Žylik, imknulisia pakazać napłastavańni roznych stahodździaŭ, tamu spałučyli cahlany mur i tynkoŭku. I heta pravilna, bo ŭ rozny čas pomnik architektury vyhladaŭ pa-roznamu.
Miž tym, raboty na zamku praciahvajucca. Zaraz vykonvajecca ŭzmacnieńnie i restaŭracyja kałonaŭ i aračnych sklapieńniaŭ paradnaj zały. Častkova vykarystoŭvajecca aŭtentyčnaja cehła — tak zvanaja palčatka, tam ža, dzie patrebna ŭzmacnieńnie, naprykład pad dacham, u chod idzie mocnaja sučasnaja cehła i armiravańnie. Akramia taho, z metaj abarony ad razbureńniaŭ vykonvajecca hidraizalacyja kałonaŭ. Ich vierch, a taksama arki nakryty polikarbanatam, jaki kampiensuje niehatyŭnyja ŭździejańni daždžu i vietru.
Darečy, supraćavaryjnyja i adnaŭlenčyja raboty na paŭnočna-ŭschodnim korpusie nakiravany ŭ pieršuju čarhu na stvareńnie biaśpiečnych umoŭ dla turystaŭ.
Pa słovach Siarhieja Žylika, jašče adzin etap zapłanavanych mierapryjemstvaŭ — stvareńnie muziejnaj ekspazicyi, jakaja raźmieścicca ŭ paŭnočnaj viežy. Jaje navukovaja kancepcyja, darečy, užo zaćvierdžana. Sklep, zhodna z zadumkaj, stanie nośbitam mistyčnaj historyi ź Biełaj pannaj i Čornym manacham. Na pieršym uzroŭni raźmieściacca materyjały archieałahičnych raskopkaŭ, na druhim — makiet zamka Sapiehaŭ i pradmiety tahačasnaha interjeru, partrety byłych uładalnikaŭ zamka, kopii dakumientaŭ. Treci ŭzrovień budzie słužyć naziralnaj placoŭkaj, ź jakoj užo adkryvajecca vid na Halšany.
Kamientary