Rola KDB u medyčnych dyjahnazach

Pavodle rašeńnia pryzyŭnoj kamisii mahiloviec Kalita budzie nieści słužbu Radzimie u Vajskova‑pavietranych siłach u častcy №30151, što mieścicca ŭ horadzie Fanipal.

Jašče ŭ krasaviku hetaha hodu rašeńniem Mahiloŭskaj rajonnaj kamisii lidera moładzi BNF pryznali nieprydatnym da słužby ŭ vojsku ŭ mirny čas praz defekt serca — u chłopca znajšli aneŭmatyčnaje vypukleńnie mižprysieńnievaj piaretyki pamieram 16 milimetraŭ. Adnak praz dva miesiacy z Mahilova ŭ Miensk nachapilisia dva supracoŭniki KDB i ŭčastkovy, jakija naŭprost zatrymali Alesia na vulicy dy pieradali pozvu ŭ Vajenny kamisaryjat dla paćviardžeńnia dyjahnazaŭ na abłasnym uzroŭni.

18 červienia kamisija na čale sa sp. Uruchnovaj nakiravała pryzyŭnika Alesia Kalitu na dadatkovaje abśledavańnie ŭ abłasnuju bolnicu, dzie admysłovyja specyjalisty zafiksavali biaz źmienaŭ ŭsio ž toj dyjahnaz — zachvorvańnie serca. Ale i hetaja pastanova medykaŭ nia stałasia kančatkovaju. Paśla čarhovaha ŭmiašalnictva u spravu moładzievaha lidera apazycyi supracoŭnikaŭ Kamitetu dziaržbiaśpieki rašeńnie adnosna pryzyvu Alesia Kality musiła pryniać Centralnaja vajskova‑lekarskaja kamisija (CVŁK) u Miensku. Vyrak dadzienaj instancyi staŭsia vidavočnym — litaralna za paŭtara tydni vypukleńnie źmienšyłasia da 5 milimetraŭ i chłopiec adpaviedna byŭ pryznany prydatnym da słužby ŭ vojsku ź niaznačnymi abmiežavańniami. Rašeńnie prymałasia Mahiloŭskaj abłasnoj pryzyŭnoj kamisijaj na časie z Anatolem Hłasam u zakrytym paradku.

Aleś Kalita adrazu dla siabie pastanaviŭ ab svaim namiery abskardzić rašeńnie pryzyŭnoj kamisii i dyjahnaz CVŁK u vajskovaj prakuratury i sudach: «Vidavočna, što niejkija daktary dakładna sfalsyfikavali dyjahnaz, i ja chaču daviedacca chto.

Aleś Kalita ličyć rašeńnie ab svaim pryzyvie niepravamiernym, «bo jano zasnoŭvajecca tolki na dvuch supiarečlivych abśledavańniach».

U pryncypie — rucinnaja historyja supiarečlivych dyjahnazaŭ, ale mižvoli ŭźnikajuć paraleli z historyjaj pryzyvu jašče adnaho aktyvista Partyi BNF Źmitra Žaleźničenki z Homiela, jaki, admoviŭšysia ad pryniaćcia prysiahi, słužyć u vojsku ŭžo bolš za paŭhodu: «Ja budu prymać prysiahu niezaležna ad taho, jakoje rašeńnie prymie sud. Maja sytuacyja nie takaja jak u Žaleźničenki: mianie vyklučyli ŭžo davoli daŭno i ja nidzie dahetul nie navučajusia. U pryncypie ŭłada zrabiła ŭsio pa zakonie. Adzinaje, u čym by ja chacieŭ razabracca, heta chto stolki času ŭ mianie adabraŭ, kab hetyja ludzi adkazali za toje, što jany absalutna hrebliva pastavilisia da majho času, — kaža Kalita. ‑‑ Naturalna, ja budu nieści słužbu pa‑biełarusku i budu taho patrabavać i ad tych, chto budzie addavać prykazy. Akramia hetaha, na siońniašni dzień ja maju šerah napracovak niekatorych prapanovaŭ pa palapšeńni słužby ŭ vojsku, kab jano było nasamreč biełaruskim, niezaležnym, zasnavanym na nacyjanalnych kaštoŭnaściach».

23 lipienia z rodnaha Mahilovu pryzyŭnik Aleś Kalita nakirujecca ŭ vajskovuju častku ŭ Fanipal na pieršyja zbory pierad pačatkam słužby.

• 0
• 0
• 0
• 0
• 0
• 0
• 0
• 0