Ukraina ŭviała abaviazkovaje i publičnaje dekłaravańnie dachodaŭ i majomaści dziaržaŭnymi čynoŭnikami i deputatami. Adnym z samych bahatych čynoŭnikaŭ akazaŭsia prezident Piatro Parašenka.
Prezident Ukrainy Piatro Parašenka zadekłaravaŭ prava ŭłasnaści ŭ 104 kampanijach va Ukrainie, Rasii, Polščy, Ispanii, Vienhryi, Litvie, Kitai, Brytanii, Niderłandach, na Kipry i Brytanskich Virhinskich astravach. Jon pakazaŭ za 2015 hoda atrymańnie zarobku ŭ sumie 121 tys. hrn, pracentaŭ u sumie 12.375 młn hryvień i inviestycyjnych dachodaŭ u sumie 49.665 hryvień. Razam u pieraliku — kala 2,5 młn dalaraŭ dachodu za hod.
Adpaviednyja dadzienyja ŭtrymlivajucca ŭ elektronnaj dekłaracyi kiraŭnika dziaržavy za 2015 hod, jakaja źjaviłasia na sierviery nacyjanalnaha antykarupcyjnaha ahienctva ŭ apošni dzień padačy dekłaracyj.
Najaŭnymi Parašenka zadeklaravaŭ 60 tys. dalaraŭ i 900 tys. hrn.
Na bankaŭskich rachunkach Parašenka trymaje 540 tys. hrn, 26,3 młn dalaraŭ, 14 tysiač jeŭra.
Taksama prezident zadekłaravaŭ 3,85 młn dalaraŭ i 1,1 młn hrn u jakaści srodkaŭ, pazyčanych trecim asobam.
Karparatyŭnyja pravy, nazvanyja ŭ dekłaracyi — 93,93% u TAA «Firma» Ekran «(Ukraina). Akramia hetaha, Parašenka źjaŭlajecca ŭładalnikam akcyj u PAT «ZNKIF «Prajm Eśsiets Kepitał», AAT «Akcyjanierny kamiercyjny pramysłova-inviestycyjny bank» i Prime Asset Partners Limited.
Prezident zadekłaravaŭ kalekcyju karcin ŭkrainskich i rasijskich majstroŭ XIX—XX stahodździaŭ u kolkaści 65 adzinak, kalekcyju karcin starych majstroŭ u kolkaści 15 adzinak, kalekcyju karcin sučasnych mastakoŭ impresijanistaŭ i siurrealistaŭ (4 adzinki), kalekcyju skulptur XIX—XX stahodździa ŭ kolkaści 6 adzinak, skulpturu «Chłopčyk-rybak» Huljelma Puhi (Guglielmo Pugi; 1870—1915).
Taksama ŭ dekłaracyi pakazanyja mebla, harnitury, lustry, technika, hadzińnik, rajal Schimmel, dyvany. Parašenka zadekłaravaŭ 3 naručnyja hadziny Hublot, 1 Patek Phillip, i 2 — Breguet. U dekłaracyi taksama pakazana juvielirnyja vyraby i ŭpryhožvańni — branzalety, kolcy, zavušnicy, kułony, karali, mužčynskija zapanki, trymalnik dla halštuka. Taksama Parašenku naležyć 2 norkavyja futra, paŭšubak sabaliny, skuranoje palito, žanočaja skuranaja sumka ružovaha koleru Fendi koštam 4 tysiačy dalaraŭ i čornyja skuranyja žanočyja sumki Dior i Chanel.
Žonka prezidenta maje na bankaŭskich rachunkach usiaho 71 tys. hrn i 8,9 tysiač jeŭra, jaje zarpłata pa miescy pracy ŭ TAA «Intierstarč Ukraina» skłała 11 tys. hrn (500 dalaraŭ), u TAA «Handlovy Dom» Intierstarč Ukraina» — prykładna stolki sama, u dabračynnaj arhanizacyi «Dabračynny fond Piatra Parašenki» — kala 2000 dalaraŭ.
U dekłaracyi taksama pakazana prava ŭłasnaści Piatra Parašenki na žyły dom płoščaj 1331 kv.m. i 3 ziamielnych ŭčastki ŭ Kozinie pad Kijevam ahulnaj płoščaj bolš za 4 hiektary, a taksama na try ziamielnyja ŭčastki ŭ Kijevie płoščami 10, 63 i 52 sotki, dźvie kvatery ŭ Kijevie (134 i 82 kv.m. ), kvateru ŭ Vińnicy (68 kv.m), niežyłoje pamiaškańnie ŭ Adesie (35 kv.m), kompleks «Baza adpačynku Lebiedź» u horadzie Liman Adeskaj vobłaści.
Akramia taho, žonka Parašenki maje va ŭłasnaści ziamielny ŭčastak na 19 sotak i dačny dom na 344 kv.m. pad Kijevam i haraž u Kijevie.
Parašenka zadekłaravaŭ Mercedes-benz 2010 h.u, BMW i Range Rover 2011 h.v., Jaguar 2008 h.v., i kater Bayliner 2005 h.v.
U svaim fejsbuku Piatro Parašenka padkreśliŭ, što «ŭsiu kaštoŭnuju ruchomuju i nieruchomuju majomaść: žyllo, ziamielnyja ŭčastki, aŭto, karciny, žanočyja ŭpryhažeńni — ja nabyŭ da prezidenctva. Bolš za toje, zbolšaha majomaść była nabyta ŭ toj čas, kali ja nie byŭ na dziaržaŭnaj słužbie».
«Pra kampanii — usie jany stvorany ŭ toj čas, kali ja zajmaŭsia biznesam. U 2014 była stvoranaja tolki adna novaja kampanija, jakoj ja vałodaju — dla prodažu Roshen. Ja pryncypova zachoŭvaju srodki ŭ bankach — 27 młn dalaraŭ, z kožnaha centa jakich vypłačanyja padatki ŭ biudžet Ukrainy. Usio heta adlustravana ŭ majoj dekłaracyi za 2015 hod. Liču, što palityki pavinny demanstravać prykład i daviarać bankaŭskaj sistemie», — zajaviŭ Parašenka.
Taksama Parašenka adznačyŭ, što na dabračynnaść i padtrymku armii ŭ 2014—2016 hadach im i pradpryjemstvami, dzie jon vystupaje kančatkovym bienieficyjaram, pieraličana kala 20 młn dalaraŭ.
Kamientary