U Nacbanku raskazali, na kolki častak moža być razarvanaja banknota, kab jaje abmianiali na cełuju
Namieśnik načalnika Hałoŭnaha ŭpraŭleńnia najaŭnaha hrašovaha abaračeńnia Nacyjanalnaha banka Biełarusi Raman Citoŭ raskazaŭ vydańniu «Narodnaja hazieta», na kolki častak moža być razarvanaja banknota biełaruskaha rubla, kab jaje abmianiali na cełuju.
Pa słovach Ramana Citova, usio vyznačajecca instrukcyjaj №211 rehulatara ab paradku vyznačeńnia płaciežnaści i abmienu banknot i maniet. I hałoŭnaje dla pryjomu ŭ banku papiarovych hrošaj, jakija majuć paškodžańni — toje, kab jany stracili nie bolš za 45% pieršapačatkovaj płoščy.
Siudy ž adnosiacca, zaŭvažyŭ Citoŭ, i «źleplenyja z častak (biez uliku ich kolkaści), jakija biezumoŭna naležać adnoj banknocie i składajuć nie mienš za 55% ad pieršapačatkovaj płoščy banknoty».
«Pry daśledavańni takoj kupiury nieabchodna ŭličvać, što jana padlahaje abmienu ŭ tym vypadku, kali majecca adna častka, jakaja zajmaje nie mienš za 55% ad jaje płoščy, abo niekalki frahmientaŭ, biassprečna prynaležnych adnoj banknocie, płošča jakich u sukupnaści składaje nie mienš za 55% ad pieršapačatkovaha farmatu banknoty. Kolkaść častak, na jakija razarvanaja abo razrezanaja banknota, značeńnia nie maje», — skazaŭ pradstaŭnik Nacbanka.
Raman Citoŭ zaŭvažyŭ, što pry analizie frahmientaŭ banknoty taho ci inšaha naminału biełaruskaha rubla ŭličać linii razryvu abo razrezu, vadzianyja znaki, hrafičnyja vyjavy, pamiery paloŭ, numary sieryj.
«Kali banknota składzienaja ź dźviuch častak, u tym liku roznych naminałaŭ, i płošča kožnaj składaje nie mienš za 55% ad pieršapačatkovaha farmatu kupiury, jakaja adpaviadaje vyznačanamu naminału, to kožnaja častka razhladajecca jak asobnaja banknota i padlahaje abmienu», — dadaŭ Raman Citoŭ.
Ciapier čytajuć
U biełaruskija pašparty buduć upisvać hrupu kryvi11
Kamientary