«Płakaŭ vielmi, kazaŭ, što jaho ŭsie paznajuć»: padpałkoŭnik-učastkovy dabiŭsia, kab jaho byłuju žonku sudzili
Učastkovy inśpiektar Baraŭlanskaha adździeła milicyi Minskaha RUUS Alaksiej Hubič napisaŭ zajavu na byłuju žonku. Siłavik paskardziŭsia na razhałošvańnie jaho piersanalnych dadzienych.
Na staroncy Anžaliki Varabjovaj u Threads razhortvajecca sapraŭdny sieryjał. Žančyna raspaviadaje ci to dramu, ci to kamiedyju — jak zakachałasia ŭ siłavika i dumała, što budzie za im jak za kamiennaj ścianoj. Ale ž akazałasia, što padpałkoŭnik — mamčyn synok, jaki bieśpierapynku pierapisvajecca z mamaj i starejšaj siastroj.
Anžalika apisvaje, jak jaje śviakroŭ (da jaje maładziony pavinny byli jeździć na lecišča dapamahać z ramontam) prychodziła ŭ pakoj da pary zranku i pačynała całavać svajho syna, jaki lažaŭ u łožku z žonkaj.
Apošniaj sprobaj zachavać šlub stała sumiesnaja pajezdka ŭ sanatoryj. Žančyna spadziavałasia «skleić toje, što tresnuła». Ale ž i tam siłavik uvieś čas dasyłaŭ maci i siastry spravazdačy. Anžalika viarnułasia z rašeńniem padać na razvod — ale niečakana vyśvietliłasia, što jana ciažarnaja.
U vyniku šlub ničym dobrym nie skončyŭsia. Sioleta ŭ studzieni para pajšła ŭ sud afarmlać razvod, apisvaje byłaja žonka. Ciapier Anžalika abvinavačvaje Alaksieja ŭ šmat čym: ad taho, što jon vynosiŭ słužbovyja dakumienty z pracy, da chatniaha hvałtu.
Žančyna śćviardžaje, što šmat hadoŭ siłavik ździekavaŭsia z žonki i dačok, starejšaje dzicia (heta dačka Anžaliki ad pieršaha šlubu) davioŭ da sproby suicydu: «Kali chapaŭ mianie za horła, ja kazała: «Bi!». Jon kazaŭ: «Ja źnišču ciabie tak, u mianie suviazi i pahony».
Adbyłosia, ź jaje słovaŭ, užo niekalki sudoŭ. Anžalika piša, što jaje były muž prajhraŭ usie pracesy i ciapier abaviazan spłacić joj 15 400 rubloŭ — ale prosić u suda rasterminoŭku na dva hady.
Treba adznačyć, što raniej karjera Alaksieja išła ŭhoru. Pa infarmacyi ad Belpol, da 2018 hoda Hubič pracavaŭ u Departamiencie vykanańnia pakarańniaŭ i hałoŭnym upraŭleńni ŭnutranych spraŭ Minskaha harvykankama.
U 2020 hodzie (tady para paznajomiłasia) mužčyna byŭ padpałkoŭnikam u centralnym aparacie MUS, pracavaŭ va ŭpraŭleńni mižnarodnaha supracoŭnictva staršym inśpiektaram pa asablivych daručeńniach.
Jašče ŭ 2024 hodzie Hubič siadzieŭ na ideałahičnaj lekcyi dla kiraŭnictva i supracoŭnikaŭ padraździaleńniaŭ centralnaha aparata i centralnaha padparadkavańnia Ministerstva ŭnutranych spraŭ — słuchaŭ pra Sajuznuju dziaržavu.
A letaś jon lataŭ pa pracoŭnych pytańniach u Vjetnam.
Ale niešta ŭ karjery Alaksieja złamałasia — jaho panizili i adpravili pracavać učastkovym.
Anžalika śćviardžaje, što ŭsio heta praź jaje namahańni. Žančyna dajšła da ministra ŭnutranych spraŭ — paśla čaho Hubič atrymaŭ strohaje dyscyplinarnaje spahnańnie i byŭ panižany na słužbie.
Siłavik ža na svaju niečakanuju papularnaść u sacsietkach pakryŭdziŭsia. Anžalika raspaviadała, što čatyry hadziny praviała ŭ pastarunku — akazvajecca, były muž napisaŭ na jaje zajavu za razhałošvańnie asabistych źviestak.
Ciapier ža jana paviedamiła, što adbyŭsia sud: Anžaliku aštrafavali na 5 bazavych (heta 225 rubloŭ). Kaža, što były muž «płakaŭ vielmi, kazaŭ, što jaho ŭsie paznajuć».
Žančyna ličyć, što ničoha nie parušyła, bo artykuł ź imiem, proźviščam i pasadaj jaje byłoha ŭžo apublikavała hazieta «Prystaličča». Plus da taho, imia i proźvišča ŭčastkovaha źmieščanyja na roznych stendach.
Kamientary