U akupavanym Krymie na niekalki dzion całkam spyniajecca prodaž bienzinu za najaŭnyja hrošy. Pra heta paviedamiŭ pryznačany Maskvoj kiraŭnik paŭvostrava Siarhiej Aksionaŭ.
Pa słovach kiraŭnika rasijskaj akupacyjnaj administracyi, tałony na paliva ŭ Krymie bolš nie pradajucca i ŭ najbližejšy čas u adkrytym prodažy nie źjaviacca. Tyja ž, chto nabyŭ tałony raniej, zmohuć atrymać nie bolš za 20 litraŭ bienzinu na adzin aŭtamabil.
Dla kantrolu situacyi na kožnaj zapraŭcy buduć dziažuryć pradstaŭniki miascovych akupacyjnych uładaŭ i dziaržaŭnych struktur, jakija stanuć fiksavać numary mašyn, što zapraŭlajucca pa tałonach. Razam z tym kamunalnyja słužby, chutkaja dapamoha, siłavyja struktury i hramadski transpart, jak śćviardžajuć čynoŭniki, buduć zabiaśpiečvacca palivam u poŭnym abjomie.
Abmiežavańni ŭviedzienyja na fonie surjoznaha deficytu na anieksavanym paŭvostravie paliva. Prablemy źviazanyja z udarami ŭkrainskich bieśpiłotnikaŭ pa rasijskich naftapierapracoŭčych pradpryjemstvach i łahistyčnaj infrastruktury, źviazanaj z pastaŭkami ŭ Krym. Ukrainskija bieśpiłotniki faktyčna ŭziali pad kantrol dronami trasu, jakaja zabiaśpiečvała «suchaputny kalidor» u Krym praź inšyja akupavanyja ŭkrainskija terytoryi. U vyniku značna skaracilisia abjomy pierapracoŭki nafty i pastaŭki bienzinu.
Uvohule ž z pačatku hoda mnohija rasijskija naftapierapracoŭčyja zavody padviarhalisia atakam, a častka ź ich časova spyniła abo istotna abmiežavała pracu. Heta pryviało da źmianšeńnia prapanovy bienzinu na rynku i rostu cen.
Na hetym fonie ŭłady Kryma taksama papiaredzili pra kryminalnuju adkaznaść za zdymku i publikacyju infarmacyi pra pieramiaščeńnie bienzavozaŭ. Za takija dziejańni moža pahražać surovaje pakarańnie pavodle rasijskaha zakanadaŭstva.
Kamientary