Patracili pa $1000 na čałavieka. Jak siamja biełarusaŭ adpačyła ŭ Kyrhyzstanie
Minčanka Alena razam ź siamjoj u žniŭni adpačyła ŭ Kyrhyzstanie. Na arandavanym aŭto jany 10 dzion jeździli pa samych pryhožych miescach krainy. Što ŭbačyli i kolki patracili, žančyna raskazała Myfin.by.
«Kali chočacca pahladzieć hornyja aziory, lepš brać krasovier»
Kyrhyzstan siamja vybrała pa dźviuch pryčynach: pa-pieršaje, razhladali tolki biaźvizavyja kirunki, a pa-druhoje, chacieli pabyvać u novaj krainie z pryhožaj pryrodaj. Na ŭsiu pajezdku na traich płanavali vydatkavać $3000.
Z Maskvy minčuki prylacieli ŭ stalicu Biškiek, trochi pahladzieli horad i na nastupny dzień adpravilisia ŭ padarožža. Pačali z kurortnaha horada Čałpon-Ata, jaki znachodzicca na bierazie voziera Isyk-Kul. Pa darozie zajazdžali pahladzieć na kańjony Kok-Majnok.
«Uziali naprakat siedan Kia Rio. Dziakujučy tamu, što mašyna była na hazie, atrymałasia aščadzić. Za 10 dzion vyjšła kala $500, braniravali za miesiac. Chacieli zrabić vybar na karyść bolš vysokich aŭtamabilaŭ i, adpaviedna, z bolšaj prachodnaściu, ale takich užo nie zastavałasia. Dla našaha maršrutu ŭ cełym chapiła nievysokaha aŭto, ale kali chočacca pahladzieć hornyja aziory, lepš brać krasovier.
Jak my pierakanalisia, braniravać aŭto treba našmat raniej, čym za miesiac».
U Čałpon-Acie vandroŭniki praviali try dni, tam u ich byŭ plažny adpačynak na bierazie Isyk-Kula, jaki ŭvachodzić u 30 najbujniejšych azior śvietu.
Dniom kupalisia i zaharali, paśla jeździli ŭ roznyja cikavyja miescy.
«Naviedali haračyja krynicy — u Kyrhyzstanie ich mnostva, źjeździli ŭ muziej pietrohlifaŭ. U apošni dzień pabyvali ŭ Hryhorjeŭskaj ciaśninie i Siamionaŭskaj ciaśninie — na ich treba nie mienš, čym paŭdnia. Ujezd u Hryhorjeŭskuju ciaśninu za troch čałaviek i aŭtamabil kaštavaŭ kala $5. U miascovych tam biznes: katańnie na koniach, fota z sokałam. Jak tolki bačać turystaŭ, adrazu atačajuć i prapanujuć svaje pasłuhi — heta nie vielmi nam padabałasia.
U ciaśninie mnostva jurtaŭ, dzie možna paabiedać. Miesca turystyčnaje, tamu ceńnik niemaleńki, ale smačna i porcyi vialikija. U cełym kyrhyzskaja kuchnia vielmi sytnaja i kałaryjnaja».
«Z płatnych zabaŭ — katańnie na koniach i asłach. Ź biaspłatnych — zornaje nieba»
Dalej minčuki pajechali ŭ horad Karakoł, tam było dźvie načoŭki. Naviedali haračyja krynicy «Ak-Suu Kienč», adna hadzinu za dvaich darosłych i dzicia kaštavała kala $12. U Čałpon-Acie košt termalnych krynic byŭ troški daražejšym — kala $14.
Źjeździli ŭ Džety-Aahuz, što pierakładajecca jak «Ciaśnina siami bykoŭ». Nazva pajšła z-za čyrvonych skał, jakija zdaloku padobnyja na siem lažačych na travie bykoŭ.
«Jašče naviedali harnałyžnuju bazu, padnialisia na haru 3040 mietraŭ nad uzroŭniem mora. Košt padjomu na siamju nam abyšoŭsia ŭ rajonie $25. Z Karakoła pajechali ŭ Barksonskuju ciaśninu, tam vadaspady. Płacić za ŭjezd było nie treba. Darečy, z usich pryrodnych turystyčnych miescaŭ, dzie my byli, za ŭjezd brali płatu tolki ŭ Hryhorjeŭskaj ciaśninie».
Pieranačavali ŭ siale Bakanbajeva, a ranicaj pajechali pahladzieć kańjon «Kazka» ź piasku i kamieniu čyrvonaha koleru.
Da hetaha času maršrut biełarusaŭ budavaŭsia vakoł voziera Isyk-Kul, dalej jany pajechali ŭ bok hornaha voziera Son-Kul.
«Tam jurtavyja łahiery, miesca turystyčnaje, tamu i ceny nie maleńkija. Z płatnych zabaŭ — katańnie na koniach i asłach. Ź biaspłatnych — strašenna pryhožaje zornaje nieba. U našym jurtavym łahiery, akramia nas, byli italjancy, ispancy i chłopiec ź Indyi. Sustrakali ŭsich restaranam u jurcie.
Na nastupny dzień my pajechali ŭ bok Biškieka, ź jakoha nazaŭtra vylatali. Daroha išła praź pieravał «33 papuhai», zajechali na vadaspad. Pa darozie pieranačavali i na nastupny dzień byli ŭžo ŭ Biškieku, adkul palacieli ŭ Maskvu. Taksi ź Biškieka ŭ aeraport kaštavała $8».
Načleh u jurcie pa 56 jeŭra
Pa charčavańni padarožniki addavali pieravahu miascovym aŭtentyčnym kaviarniam. Časta jeli za $ 10‑20 na traich, ale zdarałasia i tańniej, i daražej. Śniadanki ŭsiudy ŭvachodzili ŭ košt arendy žylla, viačeru časam brali ŭ haspadaroŭ za dadatkovuju płatu.
Najbolš darahim finansavym punktam stała daroha: «Łastaŭka» da Maskvy i pieralot u abodva baki na traich abyšlisia ŭ $1558. Na druhim miescy akazałasia arenda aŭtamabila, na trecim — arenda žylla: za 12 dzion addali $460. Dzieści žyli ŭ chostele i było całkam kamfortna, uličvajučy, što patrebien byŭ tolki načleh.
«Samym darahim varyjantam žylla stali apartamienty ŭ Čałpon-Acie, za try nočy addali €220. Jurta na Son-kuli kaštavała 56 jeŭra za noč, ale kali vybirała, bačyła, što i pa €100 jość. U sumu ŭvachodzili śniadanak i viačera. Kvatera ŭ Biškieku — €35, u inšych miescach spynialisia ŭ chostełach — u siarednim pa €30-35. Usiudy było vielmi kamfortna, a pryjaznyja haspadary ŭsio raskazvali i pakazvali».
I choć adpačynak nielha nazvać biudžetnym, Alena kaža, što jany zastalisia vielmi zadavolenyja: pabyvali ŭ kałarytnaj krainie z pryrodaj Šviejcaryi i Alpaŭ, naciešylisia cudoŭnymi vidami i nabrali mnostva ŭražańniaŭ. Tamu ličać, što vydatkavanyja srodki całkam apraŭdanyja.
Tanna, biaźviz, pryhoža. Biełaruska katałasia na łyžach u Kazachstanie i Kyrhyzstanie — i joj vielmi spadabałasia
«Ciapier u nas jość ideja pajechać kali-niebudź u Paŭnočnuju Kareju». Biełarusy raskazali pra svaje niezvyčajnyja padarožžy
U jakija krainy biełarusy mohuć adpravicca na adpačynak bieź vizy? Śpis vialiki, ale jość niuansy
34‑hadovaja biełaruska pamierła na adpačynku ŭ Kyrhyzstanie. Jana była rekanstruktarkaj
Ad Zanzibara da Kyrhyzstana. Dzie adpačyvajuć praŭładnyja śpiavački i prapahandysty
Ciapier čytajuć
Biaspałaŭ kančatkova rassvaryŭsia ź Cichanoŭskim: Dla jaho dobry tolki adzin čałaviek — Prakopjeŭ12
Kamientary