U ZŠA ŭ trendach — chryścijanskaja muzyka

Chryścijanskaja muzyka ŭ Złučanych Štatach pieražyvaje niečuvany reniesans, imkliva pašyrajučy svaju aŭdytoryju praź ličbavyja płatformy i admovu ad strohich žanravych ramak.

Jak piša The Wall Street Journal, artysty novaj chvali, uzbrojenyja majsterstvam vykarystańnia ličbavych technałohij, źbirajuć miljardy prasłuchoŭvańniaŭ i prabivajucca ŭ samyja prestyžnyja ahulnanacyjanalnyja čarty. Pa słovach kiraŭnikoŭ muzyčnych łejbłaŭ, takoha bumu ŭ industryi nie było z kanca 90‑ch hadoŭ.

Sakret pośpiechu zaklučajecca ŭ tym, što sučasnyja vykanaŭcy aktyŭna ekśpierymientujuć z hučańniem, lohka zapazyčvajučy elemienty z chip-chopu, kantry, roku i akustyčnaha fołku. Hałoŭnaje, što dapamahło muzycy vyjści ź nišy, — heta strumienievyja servisy i karotkija videapłatformy, takija jak TikTok i Reels.

Raniej, kab adkryć dla siabie vieru, ludzi musili prachodzić praz «chryścijanskija partały» — carkoŭnaje radyjo ci śpiecyjalizavanyja kramy. Ciapier ža słuchač moža trapić na relihijnuju pieśniu, navat nie padazrajučy pra jaje źmiest, prosta šukajučy trek dla papularnaha tanca ci trendavaha fonu.

Samym jarkim tvaram hetaj novaj chvali staŭ Forest Frank. Pieśni raniejšaha ŭdzielnika pop-dueta Surfaces, u jakich spałučajucca chip-chop-bity z nadzvyčaj pazityŭnymi i adkrytymi tekstami pra vieru, nabrali bolš za 1,2 miljarda prasłuchoŭvańniaŭ.

Najbolš cikavy prykład jahonaha virusnaha pośpiechu źviazany ź niaščasnym vypadkam: zvaliŭšysia sa skiejta i złamaŭšy pazvanki, Frank zapisaŭ proma-videa dla svajho novaha treka God's Got My Back, jakoje imhnienna nabrała amal 4 miljony prahladaŭ u TikTok. A jahonaja pieśnia Your Way's Better z zadornym vykazvańniem padziaki była vykarystana ŭ bolš čym 800 tysiač videa ŭ TikTok i stała asnovaj dla virusnaha tanca.

@hiforrestt I FINALLY DID IT!!!! & with the creators of the dance s/o @David Myers & @Bridgette Nicole ♬ YOUR WAY'S BETTER - Forrest Frank

Inšyja artysty taksama demanstrujuć uražlivy rost. Śpiavak Brendan Łejk, jaki źmiešvaje soŭł i kantry, nabraŭ 862 miljony strymaŭ. A 22‑hadovy vykanaŭca akustyčnaha fołku Džasaja Kuin — 515 miljonaŭ.

Pavialičyć

U pieršaj pałovie hoda rost prasłuchoŭvańniaŭ na stryminhavych płatformach novych chryścijanskich trekaŭ apiaredziŭ usie astatnija žanry, akramia kantry.

Šmat u čym pośpiechu spryjaje toje, što hetyja pieśni mohuć lohka ŭlicca ŭ płejlist pobač z trekami Eda Šyrana ci Džaścina Bibiera. Naprykład, bałada Counting My Blessings śpievaka Sefa Šlutara spačatku stała chitom u Brazilii, a zatym vybuchnuła ŭ ZŠA, dajšoŭšy da suśvietnych zorak. Sam Šlutar raskazvaŭ, što adnojčy atrymaŭ paviedamleńnie pra toje, što jahonuju pieśniu ŭ Instagram vykarystaŭ akcior Chju Džekman.

Akramia taho, adznačajecca mocnaje žanravaje pieraplacieńnie z kantry-muzykaj. Hetamu spryjaje i toj fakt, što abiedźvie industryi (jak kantry, tak i chryścijanskaja muzyka) majuć svaje štab-kvatery ŭ Nešvile (štat Teniesi) — horadzie, jaki tradycyjna ličycca centram kantry-muzyki.

Hetaje susiedstva pryvodzić da niečakanych kałabaracyj: zorka kantry Dželi Roł zapisaŭ sumiesny trek z Brendanam Łejkam. Takoje supracoŭnictva dazvalaje chryścijanskim pieśniam dasiahać značna bolšaj aŭdytoryi, pryciahvajučy ŭ tym liku tych, chto nie ličyć siabie relihijnym.

Choć dola chryścijanskaj muzyki na rynku pakul ścipłaja — kala 2% ad ahulnaha abjomu, — hety kirunak raście chutčej za mnohija inšyja. U kamientaryjach pad takimi videa ludzi časta adznačajuć: «Nie skažu, što ja relihijny, ale, kali ščyra, chryścijanskija treki ciapier sapraŭdy hučać kruta».

• 0
• 0
• 0
• 3
• 0
• 0
• 1
• 0