Tyktok kidaje vyklik «Amazonu» i stanovicca novym lidaram u internet-handli

Novy kanał elektronnaj kamiercyi TikTok Shop nabiraje papularnaść značna chutčej, čym čakałasia. Jak piša Handelsblatt, usiaho praz šeść miesiacaŭ paśla zapusku praź jaho była zroblena kožnaja dziasiataja internet-pakupka ŭ Hiermanii. Pytańnie ŭžo nie ŭ tym, ci pryžyviecca TikTok Shop, a ŭ tym, jak chutka.

Ekśpierty vyłučajuć piać asnoŭnych pryčyn, čamu TikTok tak paśpiachova kankuruje z hihantami e-commerce.

1. TikTok stvaraje novuju formu elektronnaj kamiercyi

Jak adznačajuć ekśpierty, padychod TikTok Shop procilehły padychodu inšych viadomych internet-markietpłejsaŭ. Kali apošnija absłuhoŭvajuć karystalnikaŭ, jakija ŭžo viedajuć, što šukajuć, to TikTok stvaraje efiekt adkryćcia — «discovery commerce».

Praz TikTok Shop pradajuć svaje tavary nie tolki sami brendy, ale i sotni tysiač drobnych i bujnych stvaralnikaŭ kantentu — ad błohieraŭ da viadomych asobaŭ. Hladač vypadkova bačyć videa z praduktam i moža kupić jaho adrazu ŭ dadatku, nie pakidajučy stužki.

Hetaja madel raście va ŭsim śviecie: za dva hady z momantu zapusku ŭ ZŠA i Vialikabrytanii ŭ minułym hodzie hłabalny abarot płatformy ŭžo padvoiŭsia i dasiahnuŭ $33,2 miljarda.

2. Kitajski vopyt i technałahičny bekhraŭnd

Hłabalnyja ličby nie ŭličvajuć abaroty ŭ Kitai, bo kitajskaja maciarynskaja kampanija Bytedance vykarystoŭvaje nazvu TikTok tolki dla svaich płatformaŭ za miežami ŭnutranaha rynku. U samim Kitai videapłatforma nazyvajecca Douyin.

TikTok Shop pry svajoj ekspansii ŭ Jeŭropu karystajecca vopytam Douyin. Pa słovach ekśpiertaŭ, Douyin u Kitai ŭžo źjaŭlajecca daminujučaj siłaj u elektronnym handli. Letaś jana zarabiła $490 miljardaŭ.

Kampanija-uładalnik šmat hadoŭ udaskanalvała łahistyku, apracoŭku płaciažoŭ i rekamiendacyjnyja ałharytmy. U vyniku ŭ Jeŭropie TikTok staŭ pieršaj płatformaj, dzie sacsietki i handal całkam intehravanyja — toje, što nie ŭdałosia Facebook i Instagram.

Pavialičyć

3. Achop usich pakaleńniaŭ

Doŭhi čas TikTok asacyjavaŭsia z padletkami i tancavalnymi rolikami, ale ciapier pałova karystalnikaŭ starejšyja za 30 hadoŭ. Naprykład, u Hiermanii 34% pakupnikoŭ naležać da pakaleńnia Z (narodžanyja paśla 1995 hoda), 33% — heta pradstaŭniki pakaleńnia X (narodžanyja pamiž 1960 i 1979 hadami).

U abarocie heta vidavočna jašče bolš, bo starejšaje pakaleńnie zvyčajna maje bolšuju pakupnickuju zdolnaść. Na pakaleńnie X prypadaje 36% abarotu, a na pakaleńnie Z — 32%.

4. Asartymient, jaki chutka pašyrajecca

Pijanierami prodažaŭ praz TikTok Shop u Hiermanii byli pieravažna kaśmietyčnyja brendy, takija jak Nivea abo L'Oreal, jakija i tak aktyŭnyja ŭ sacyjalnych sietkach. Spačatku hetyja brendy sapraŭdy daminavali: praz šeść tydniaŭ paśla startu ŭ Hiermanii na kaśmietyku i srodki dla dohladu prypadała 46% abarotu TikTok Shop. Adnak heta chutka źmianiłasia.

Ciapier najbolš prybytkovaj katehoryjaj tavaraŭ źjaŭlajucca kampjutary, elektronika i adpaviednyja aksesuary (kabieli, navušniki) z dolaj 20%; katehoryja pryhažości apuściłasia da 16%.

Hetamu spryjajuć i takija brendy, jak Philips. Vytvorca adkryŭ dla siabie Live-strymy — šou, dzie pradaŭcy ŭ žyvym efiry rekłamujuć tavary ciaham niekalkich hadzin. Chitom prodažaŭ Philips praz hetyja strymy stali darahija pryłady dla epilacyi koštam da 400 jeŭra.

5. Klijenty TikTok kuplajuć časta i šmat

Ekśpierty bačać nie prosta razavyja pośpiechi ad cikaŭnych klijentaŭ, a ŭstojlivy rost achopu i abarotu. Tak, adzin vytvorca charčovych dabavak naziraje ŭ svaim TikTok Shop štomiesiačny rost abarotu bolš čym na 30% z krasavika.

U tyktoku brendy vielmi vyjhrajuć dziakujučy vielizarnaj kolkaści niezaležnych stvaralnikaŭ kantentu. Kožny ź ich, demanstrujučy tavar svajoj aŭdytoryi, stvaraje efiekt sarafannaha radyjo ŭ vialikim maštabie. Naprykład, modny brend Creamy Fabrics razdaŭ tysiaču bodzi błohieram — i dasiahnuŭ siarednietydniovaha rostu prodažaŭ na 78%.

Toje, nakolki kaštoŭnymi źjaŭlajucca klijenty, jakija prychodziać praz TikTok, paćviardžajuć i ličby. U toj čas jak siaredni niamiecki internet-klijent štohod vydatkoŭvaje 2036 jeŭra, pakupniki TikTok traciać na 30% bolš — 2672 jeŭra. I robiać jany ŭ siarednim 47 pakupak na hod, što na 40% bolš za siaredni pakazčyk.

Ekśpierty adznačajuć: kali ciapierašnija tempy zachavajucca, to ŭžo ŭ hetym hodzie TikTok Shop moža stać adnym z najmacniejšych hulcoŭ jeŭrapiejskaha internet-handlu — naroŭni z hihantami, jakija vybudoŭvali svaje płatformy dziesiacihodździami.

• 0
• 0
• 0
• 1
• 0
• 1
• 1
• 0