Тыкток кідае выклік «Амазону» і становіцца новым лідарам у інтэрнэт-гандлі

Новы канал электроннай камерцыі TikTok Shop набірае папулярнасць значна хутчэй, чым чакалася. Як піша Handelsblatt, усяго праз шэсць месяцаў пасля запуску праз яго была зроблена кожная дзясятая інтэрнэт-пакупка ў Германіі. Пытанне ўжо не ў тым, ці прыжывецца TikTok Shop, а ў тым, як хутка.

Эксперты вылучаюць пяць асноўных прычын, чаму TikTok так паспяхова канкуруе з гігантамі e-commerce.

1. TikTok стварае новую форму электроннай камерцыі

Як адзначаюць эксперты, падыход TikTok Shop процілеглы падыходу іншых вядомых інтэрнэт-маркетплэйсаў. Калі апошнія абслугоўваюць карыстальнікаў, якія ўжо ведаюць, што шукаюць, то TikTok стварае эфект адкрыцця — «discovery commerce».

Праз TikTok Shop прадаюць свае тавары не толькі самі брэнды, але і сотні тысяч дробных і буйных стваральнікаў кантэнту — ад блогераў да вядомых асобаў. Глядач выпадкова бачыць відэа з прадуктам і можа купіць яго адразу ў дадатку, не пакідаючы стужкі.

Гэтая мадэль расце ва ўсім свеце: за два гады з моманту запуску ў ЗША і Вялікабрытаніі ў мінулым годзе глабальны абарот платформы ўжо падвоіўся і дасягнуў $33,2 мільярда.

2. Кітайскі вопыт і тэхналагічны бэкграўнд

Глабальныя лічбы не ўлічваюць абароты ў Кітаі, бо кітайская мацярынская кампанія Bytedance выкарыстоўвае назву TikTok толькі для сваіх платформаў за межамі ўнутранага рынку. У самім Кітаі відэаплатформа называецца Douyin.

TikTok Shop пры сваёй экспансіі ў Еўропу карыстаецца вопытам Douyin. Па словах экспертаў, Douyin у Кітаі ўжо з'яўляецца дамінуючай сілай у электронным гандлі. Летась яна зарабіла $490 мільярдаў.

Кампанія-уладальнік шмат гадоў удасканальвала лагістыку, апрацоўку плацяжоў і рэкамендацыйныя алгарытмы. У выніку ў Еўропе TikTok стаў першай платформай, дзе сацсеткі і гандаль цалкам інтэграваныя — тое, што не ўдалося Facebook і Instagram.

Павялічыць

3. Ахоп усіх пакаленняў

Доўгі час TikTok асацыяваўся з падлеткамі і танцавальнымі ролікамі, але цяпер палова карыстальнікаў старэйшыя за 30 гадоў. Напрыклад, у Германіі 34% пакупнікоў належаць да пакалення Z (народжаныя пасля 1995 года), 33% — гэта прадстаўнікі пакалення X (народжаныя паміж 1960 і 1979 гадамі).

У абароце гэта відавочна яшчэ больш, бо старэйшае пакаленне звычайна мае большую пакупніцкую здольнасць. На пакаленне X прыпадае 36% абароту, а на пакаленне Z — 32%.

4. Асартымент, які хутка пашыраецца

Піянерамі продажаў праз TikTok Shop у Германіі былі пераважна касметычныя брэнды, такія як Nivea або L’Oreal, якія і так актыўныя ў сацыяльных сетках. Спачатку гэтыя брэнды сапраўды дамінавалі: праз шэсць тыдняў пасля старту ў Германіі на касметыку і сродкі для догляду прыпадала 46% абароту TikTok Shop. Аднак гэта хутка змянілася.

Цяпер найбольш прыбытковай катэгорыяй тавараў з'яўляюцца камп’ютары, электроніка і адпаведныя аксэсуары (кабелі, навушнікі) з доляй 20%; катэгорыя прыгажосці апусцілася да 16%.

Гэтаму спрыяюць і такія брэнды, як Philips. Вытворца адкрыў для сябе Live-стрымы — шоу, дзе прадаўцы ў жывым эфіры рэкламуюць тавары цягам некалькіх гадзін. Хітом продажаў Philips праз гэтыя стрымы сталі дарагія прылады для эпіляцыі коштам да 400 еўра.

5. Кліенты TikTok купляюць часта і шмат

Эксперты бачаць не проста разавыя поспехі ад цікаўных кліентаў, а ўстойлівы рост ахопу і абароту. Так, адзін вытворца харчовых дабавак назірае ў сваім TikTok Shop штомесячны рост абароту больш чым на 30% з красавіка.

У тыктоку брэнды вельмі выйграюць дзякуючы велізарнай колькасці незалежных стваральнікаў кантэнту. Кожны з іх, дэманструючы тавар сваёй аўдыторыі, стварае эфект сарафаннага радыё ў вялікім маштабе. Напрыклад, модны брэнд Creamy Fabrics раздаў тысячу бодзі блогерам — і дасягнуў сярэднетыднёвага росту продажаў на 78%.

Тое, наколькі каштоўнымі з'яўляюцца кліенты, якія прыходзяць праз TikTok, пацвярджаюць і лічбы. У той час як сярэдні нямецкі інтэрнэт-кліент штогод выдаткоўвае 2036 еўра, пакупнікі TikTok трацяць на 30% больш — 2672 еўра. І робяць яны ў сярэднім 47 пакупак на год, што на 40% больш за сярэдні паказчык.

Эксперты адзначаюць: калі цяперашнія тэмпы захаваюцца, то ўжо ў гэтым годзе TikTok Shop можа стаць адным з наймацнейшых гульцоў еўрапейскага інтэрнэт-гандлю — нароўні з гігантамі, якія выбудоўвалі свае платформы дзесяцігоддзямі.

• 0
• 1
• 0
• 6
• 1
• 2
• 1
• 0