Błohiery paraŭnali ceny na ježu ŭ Biełarusi, Polščy, Hiermanii i Partuhalii
Dziela ekśpierymientu jany skłali śpis, u jakim było 45 punktaŭ, i nabyli ŭsio pa im u čatyroch krainach. Jak dumajecie, dzie było najbolš tanna?
Błohiery Vadzim i Alesia Klučniki zrabili cikavy ahlad cen. Krainy abranyja nievypadkova: Biełaruś — radzima błohieraŭ, u Hiermanii jany davoli doŭha žyli, a ciapier žyvuć u Partuhalii. A Polšču dadali praz toje, što tudy emihravała šmat biełarusaŭ.
Raniej jany ŭžo rabili anałahičny ekśpierymient. Ale heta było letam 2022 hoda, kursy valut u toj čas u Biełarusi šalona skakali, tamu pry pieraliku na jeŭra atrymałasia, što ceny tam vyšejšyja, čym u Hiermanii.
Hetym razam błohiery ŭvjali novyja praviły. Pradukty treba kuplać pa pryncypie: adna kraina — adzin hipiermarkiet. U Biełarusi heta byŭ «Jeŭraopt», u Polščy — «Ašan», u Hiermanii — «Kaŭfłend» i ŭ Partuhalii — «Kantynient».
Jany imknulisia brać bolš-mienš bazavyja pradukty, bo paraŭnoŭvać ceny na vaśminoha ŭ Partuhalii i Biełarusi sensu niama. Raŭnialisia na siaredni siehmient: nie luksavaja ježa, ale i nie samaja tannaja. Staralisia nie brać tavary na akcyi, ale kali alternatyvy nie było, pieraličvali sumu ŭ čeku sa zvyčajnym koštam.
Jak sapraŭdnyja biełarusy, pačali z bulby. U Biełarusi kiłahram na momant zakupki kaštavaŭ 80 centaŭ, u Polščy — 39 centaŭ, u Hiermanii — 1,4 jeŭra i ŭ Partuhalii — 1,3 jeŭra.
A voś pieršym šokam stała cybula: kali ŭ Biełarusi kiłahram kaštavaŭ 32 centy, to ŭ Hiermanii — 1,79 jeŭra, u Polščy i Partuhalii — pa 1,05 jeŭra.
Pamidory ŭsiudy kaštujuć bolš-mienš adnolkava: ad 1,39 (Hiermanii) da 1,99 jeŭra (Partuhalija).
A voś file kurycy akazałasia samym tannym u Biełarusi — 3,85 jeŭra za kiłahram. Samym darahim — u Hiermanii, dzie za kiłahram prosiać 11,32 jeŭra.
Sa śvinoj vyrazkaj zusim inšaja situacyja. Samaja tannaja jana ŭ Partuhalii — 4,99 jeŭra, a samaja darahaja — u Hiermanii (8,99 jeŭra).
Alej samy tanny pradajecca ŭ Partuhalii (1,59 jeŭra), a samy darahi ŭ Hiermanii (2,19 jeŭra).
Kavu «Dałmajer» taniej za ŭsio nabyvać u Hiermanii (8,99 jeŭra), a daražej za ŭsio ŭ Biełarusi (16,90 jeŭra).
I voś jakija atrymalisia finalnyja ličby ŭ čeku za 45 pakupak: Biełaruś —132,08 jeŭra, Polšča — 132,46 jeŭra, Hiermanija — 158,38 jeŭra, Partuhalija — 146,91 jeŭra.
Ale situacyja vyhladaje mienš radasnaj, kali paraŭnać usio ź siaredniaj zarpłataj u hetych krainach.
Paraŭnoŭvajučy, błohiery, imavierna pamylilisia: bo pa Biełarusi jany ŭziali siarednija zarobki, a pa inšych krainach minimalnyja. Ale navat z ulikam hetaha atrymoŭvajecca, što ŭ Biełarusi ludzi mienš mohuć sabie dazvolić — u razy.
Tamu my pieraličyli.
Siaredni zarobak u Biełarusi składaje 2376 rubloŭ na ruki — atrymlivajecca pryblizna 670 jeŭra. U pieraliku na praduktovyja košyki błohieraŭ heta kala 5 košykaŭ.
U Polščy siaredniaja zarpłata nieta pryblizna 1500 jeŭra, ci kala 11 košykaŭ.
U Hiermanii siaredni zarobak na ruki kala 2850 jeŭra, ci amal 18 košykaŭ.
U Partuhalii siaredniaja zarpłata kala 1500 jeŭra, ci 10 košykaŭ.
Kamientary