Situacyja z daktarami mocna zaležyć ad taho, dzie mienavita čałaviek žyvie.
U Minsku nie ŭsio tak drenna
Pa słovach lekara, jaki niadaŭna syšoŭ z Baraŭlanskaj balnicy, va ŭstanovie nie adčuvajecca niedachopu kadraŭ.
«Niejkija vakansii, jak zaŭždy, jość, ale pra niedachop havorki nie idzie. Mahčyma, kab mnohija nie pracavali na 1,25 ci 1,5 staŭki, to karcina była b krychu inšaj, ale ž bolš hadzin u bolšaści vypadkaŭ daktary biaruć pa ŭłasnym žadańni», — kaža miedyk.
Sa słoŭ surazmoŭcy, u balnicach Minska vialikich prablem z kadrami niama, čaho nie skažaš pra vobłaść.
«U małych haradach nichto asabliva nie choča zastavacca, tamu pa vobłaści situacyja sapraŭdy vyhladaje inakš. U paliklinikach taksama jość niedachop kadraŭ, pryčym nie tolki pa vobłaści, ale i ŭ samim Minsku», — kaža surazmoŭca.
Niekatoryja vuzkija śpiecyjalisty pracujuć na dźvie palikliniki
Inšaja doktarka pracuje ŭ adnoj z paliklinik Hrodna. Ź jaje słoŭ, u ich paliklinicy stabilna nie chapaje jak daktaroŭ ahulnaj praktyki, tak i vuzkich śpiecyjalistaŭ.
«Da niekatorych vuzkich śpiecyjalistaŭ davodzicca pieranakiroŭvać pacyjentaŭ u inšyja palikliniki, dzie takija miedyki jość.
Z daktarami ahulnaj praktyki situacyja takaja, što jość składanyja ŭčastki, na jakich nichto doŭha nie zatrymlivajecca. Na takija zvyčajna staviać internaŭ, kab jany chadzili na vykliki», — kaža doktarka.
Žančyna adznačaje, što ŭ ich paliklinicy pracuje davoli šmat piensijanieraŭ.
Dla piensijanieraŭ z 2025 hoda byli palepšany ŭmovy pracy (ciapier pracujučyja piensijaniery atrymlivajuć poŭnuju piensiju, a nie ŭrezanuju). Heta byŭ adzin z krokaŭ, na jakija pajšli biełaruskija ŭłady, kab źmienšyć ahulnuju prablemu z nadachopam kadraŭ.
«Kab nie jany (piensijaniery. — NN), to nie viedaju, jak by my spraŭlalisia», — pryznajecca doktarka.
Pry hetym, jak i jaje staličny kaleha, jana adznačaje, što ŭ balnicach situacyja z ukamplektavanaściu piersanału zvyčajna lepšaja, čym u paliklinikach.
Siarod pryčyn, čamu ŭ Biełarusi nie chapaje lekaraŭ, miedyk nazyvaje mihracyju.
«U niekatorych univiersiteckich hrupach da pałovy vypusknikoŭ źjechali za miažu. Bolšaść praciahvaje pracavać pa śpiecyjalnaści, ale ŭ asnoŭnym užo ŭ Polščy i niaredka ŭ Hiermanii. Adnak možna skazać, što hety praces amal spyniŭsia. Mnohija źjechali ŭ kavidnyja časy, bo tady praz vostry niedachop miedykaŭ možna było vielmi prosta ŭładkavacca na pracu. Ale i ciapier heta mahčyma, bo niedachop lekaraŭ isnuje nie tolki ŭ Biełarusi, ale i ŭ mnohich inšych krainach», — kaža surazmoŭca.
Pa nazirańniach miedyka, apošnim časam situacyja ź niedachopam daktaroŭ u Biełarusi nie horšała. Prynamsi, kali havorka idzie pra bujnyja harady.
«Mnohija lekary paśla adpracoŭki niedzie na pieryfieryi pierabirajucca ŭ Minsk ci abłasnyja centry, tamu ŭ bujnych haradach situacyja, možna skazać, narmalnaja, čaho nie skažaš pra małyja nasielenyja punkty».
Na pieryfieryi možna stać zahadčykam ledź nie adrazu paśla ŭniviersiteta
Doktar, jaki pracuje ŭ adnoj z rajonnych balnic u Bresckaj vobłaści, skardzicca, što ŭ ich ustanovie z kadrami ŭsio składana — nie tolki z kolkaściu, ale i ź jakaściu.
«U małych rajonnych centrach z daktarami biada, kali niešta bolš-mienš surjoznaje, to davodzicca nakiroŭvać pacyjentaŭ u Brest abo Baranavičy».
Pry hetym miedyk nazyvaje małyja harady vydatnym miescam dla chutkaha karjernaha rostu.
«Pakolki zastavacca žyć tut mała chto choča, to možna stanavicca zahadčykam ledź nie adrazu paśla ŭniviersiteta, a kali zusim pašancuje, to i hałoŭnym doktaram va ŭzroście da 30 stać možna», — kaža miedyk.
Pry hetym jon pryznajecca, što heta mała kaho pryvablivaje, bo lepš być šarahovym lekaram u Minsku ci inšym bujnym horadzie, čym zahadčykam na pieryfieryi.
Metaviki mohuć vyrašyć prablemu, ale jość niuansy
U małych haradach miedycyna trymajecca pierš za ŭsio na piensijanierach i tych, kaho zasłali tudy pa raźmierkavańni.
«Miarkuju, što praz paru hadoŭ situacyja z deficytam na pieryfieryi moža stać krychu mienš napružanaj, bo apošnim časam vielmi mocna pavysiłasia dola tych, chto pastupaje ŭ VNU pa metavym nakiravańni».
Dla daviedki, za apošnija dziesiać hadoŭ kolkaść miescaŭ dla metavikoŭ u mieduniviersitetach vyrasła z 26% u 2015 hodzie da 74% u 2025-m.
«Tamu treba troški pačakać, pakul pačnuć vypuskać bolš metavikoŭ i dziakujučy im zakryvać vakansii. Ale znoŭ ža zastaniecca pytańnie ŭ jakaści kadraŭ, bo metaviki pastupajuć u mied pa sproščanaj prahramie», — tłumačyć surazmoŭca.
Dla pastupleńnia pa metavym nakiravańni nie treba zdavać CT. Dastatkova mieć siaredni bał atestata nie nižejšy za 7 bałaŭ i zdać usiaho adzin unutrany ekzamien pa śpiecyjalizavanym pradmiecie (chimija abo bijałohija ŭ zaležnaści ad abranaj śpiecyjalnaści).
Atrymlivajecca, što ŭ Biełarusi prablemu ź niedachopam kadraŭ buduć vyrašać pierš za ŭsio nie za košt pavyšeńnia zarobkaŭ i inšych stymułaŭ, a bolš praciahłaj adpracoŭkaj.
Adnak, metavaje nakiravańnie jašče nie aznačaje, što čałaviek biez varyjantaŭ adpracuje tyja 5 hadoŭ va ŭstanovie, jakaja jaho nakiravała na vučobu. Jak i raniej, niekatoryja sychodziać u dekret, kab nie treba było adpracoŭvać, abo znachodziać inšyja varyjanty.
Ciapier čytajuć
Łukašenka pakazaŭsia ŭ Amanie tolki na čaćviorty dzień vizitu — doma ŭ sułtana. Ź im Viktar i Kola12
Kamientary