Nietańjachu prosić ab pamiłavańni ŭ karupcyjnaj spravie. Za jaho zastupiŭsia i Tramp
Rasśledavańnie suprać Nietańjachu ab karupcyi viadziecca šmat hadoŭ.
Premjer-ministr Izraila Bińjamin Nietańjachu paprasiŭ ab pamiłavańni ŭ suviazi z abvinavačvańniami ŭ karupcyi. Jak paćvierdziła ŭpraŭleńnie prezidenta Icchaka Hiercaha, aficyjny zapyt ab pamiłavańni pastupiŭ jak ad samoha premjera, tak i ad jahonaha advakata, piša Bild.
Prašeńnie nakirujuć u Ministerstva justycyi, dzie składuć pravavoje zaklučeńnie, a zatym kamanda Hiercaha padrychtuje rekamiendacyju rašeńnia. Užo ciapier, adnak, administracyja prezidenta padkreślivaje, što «havorka idzie pra vyklučnaje chadajnictva z dalokasiažnymi nastupstvami».
Na praciahu mnohich hadoŭ suprać Nietańjachu viadziecca rasśledavańnie ab karupcyi. Premjera abvinavačvajuć u atrymańni raskošnych padarunkaŭ ad znajomych miljarderaŭ na sumu kala 174 000 jeŭra — siarod ich darahija ŭpryhažeńni, elitnyja cyhary i ružovaje šampanskaje. Nietańjachu zaŭsiody adchilaŭ abvinavačvańni i nazyvaŭ toje, što adbyvajecca, «palavańniem na viedźmaŭ».
Dadatkovy rezanans u spravie vyklikaŭ Donald Tramp. Prezident ZŠA zaklikaŭ Hiercaha pamiłavać Nietańjachu. Tramp napisaŭ jamu ŭ liście, što pavažaje niezaležnaść izrailskaj sudovaj sistemy, ale ličyć abvinavačvańni palityčna matyvavanymi i nieabhruntavanymi.
Dyskusija ab mahčymym pamiłavańni ŭ Izraili idzie ŭžo daŭno. Prezident Hiercah raniej zajaŭlaŭ, što nichto nie staić vyšej za zakon, ale taksama padkreślivaŭ, što budzie prymać rašeńnie zhodna sa svaim sumleńniem. Apazicyja aburanaja i ideju pamiłavańnia rezka krytykuje.
Kamientary
Nietańjachu priznajet publično? Somnievajuś .