Łukašenka ŭ Amanie ŭžo ceły dzień, ale miascovyja viedamstvy i ŚMI pra heta maŭčać
Nieaficyjny telehram-kanał pres-słužby Alaksandra Łukašenki «Puł Piervoho» paviedamiŭ pra jaho prybyćcio ŭ Maskat 28 listapada kala 19:30 pa minskim časie (kala 20:30 pa miascovym), adnak da hetaha času nijakaj dadatkovaj infarmacyi pra chod «pracoŭnaha vizitu» nie źjaviłasia ni ŭ biełaruskich dziaržaŭnych, ni ŭ amanskich ŚMI, zaŭvažyła vydańnie «Pozirk».
U paviedamleńni «Puła Piervoho» było zajaŭlena, što hościa ź Biełarusi ŭ aeraporcie sustreŭ prezident Amanskaha inviestycyjnaha ahienctva Abdulsałam Al Muršydzi. Adnak resursy hetaha viedamstva ni pra heta, ni pra vizit Łukašenki ŭ krainu ŭ cełym nie zhadvajuć.
Adsutničaje infarmacyja pra jaho prybyćcio taksama na sajtach MZS Amana, manaršaj kancylaryi. U klučavych ŚMI — Oman News Agency, Al Watan, Oman, Times of Oman, Oman Daily Observer, Muscat Daily, Oman Tribune — niama nijakaj infarmacyi, jakaja b tyčyłasia aktyŭnaści Łukašenki ŭ Amanie ci chacia b fiksavała jaho znachodžańnie ŭ krainie.
Pres-słužba Łukašenki 29 listapada raspaŭsiudziła tolki try paviedamleńni — vinšavańnie ad imia Łukašenki na adras prezidenta Paleściny Machmuda Abasa ź Mižnarodnym dniom salidarnaści z paleścinskim narodam, a taksama spačuvańni: prezidentu Indaniezii Prabava Subijanta — u suviazi sa šmatlikimi achviarami ŭ vyniku zalevaŭ i apoŭźniaŭ na vostravie Sumatra, karalu Tajłanda Machu Vačyrałanhkornu — u suviazi z achviarami ŭ vyniku pavodak.
Napiaredadni było zajaŭlena, što Łukašenka ŭ ramkach vizitu ŭ Aman maje namier «pradmietna abmierkavać» z sułtanam Chajsamam bin Tarykam al Saidam «praktyčnyja kroki ŭ raźvićcio raniej dasiahnutych damoŭlenaściaŭ i realizacyi sumiesnych prajektaŭ u roznych śfierach».
Łukašenka vylecieŭ u Aman z Mjanmy, kudy prybyŭ z dvuchdzionnym aficyjnym vizitam 27 listapada — adrazu ž paśla samitu Arhanizacyi Damovy ab kalektyŭnaj biaśpiecy, jaki prajšoŭ u Kyrhyzstanie. Paviedamlałasia, što dalej jon maje namier naviedać krainy Blizkaha Uschodu i Paŭnočnaj Afryki.
Ciapier čytajuć
U biełaruskija pašparty buduć upisvać hrupu kryvi11
Kamientary