Mikałaj Statkievič zajaviŭ, što ŭ aryšcie žychara Rudzienska Uładzimira Kondrusia vinavatyja žurnalisty.
Na svajoj staroncy ŭ Facebook jon napisaŭ nastupnaje: «Jak ja zrazumieŭ, aryšt adbyŭsia dziakujučy apazicyjnym ŚMI, jakija apaznali Uładzimiera pa 5-hadovym fota, na jakim jon hrukaŭ u niekim užo raźbitaje akno Doma ŭrada korabam dla ścioka daždžavoj vady, adarvanym ad hetaha budynka».
«Nie zrazumiełyja pavodziny tych apazicyjnych žurnalistaŭ i palitykaŭ, jakija dziejańni najbolš aktyŭnaj i rašučaj častki ŭdzielnikaŭ biełaruskaj Revalucyi Hodnaści dahetul nazyvajuć pravakacyjaj. Pry hetym jany zachaplajucca ŭkrainskaj revalucyjaj hodnaści suprać, pryznajem heta, lehitymnaha i zakonna abranaha prezidenta», — piša palityk.
«Ja nie viedaju, chto pieršym pačaŭ bić dźviery Doma ŭrada 19.12.2010 h., ale spadziajusia, što prosta mužnyja i hodnyja ludzi, a nijakija nie ahienty», — miarkuje Statkievič.
«Danosčykam na Uładzimiera Kondrusia raju nie chavacca za kanśpirałahičnyja viersii, a paprasić u jaho prabačeńnia. Taksama raju akazać jaho siamji materyjalnuju daramohu. Kali hrošaj niama, to paprasicie ŭ milicyi premiju za danos — vam naležyć», — hanić jon žurnalistaŭ.
Na fotazdymkach z akcyi Dzień Voli ŭ Minsku 25 sakavika 2016 hoda Kondrusia apaznali žurnalisty «Našaj Nivy». Jany supastavili jaho z fota, na jakich jon vyhladaje aktyŭnym ŭdzielnikam padziej Płoščy-2010. Było taksama vykazanaje mierkavańnie ab tym, što jon moh vykonvać rolu pravakatara.
19 śniežnia 2010 hoda, u dzień prezidenckich vybaraŭ, adbyłasia masavaja manifiestacyja pratestu suprać falsifikacyi vybaraŭ i za adstaŭku Alaksandra Łukašenki. Kali demanstranty dajšli da płoščy Niezaležnaści, pravakatary raspačali bićcio vokan Doma ŭrada. Na pravakacyju paddalisia taksama niekatoryja aktyvisty apazicyi. Heta stała padstavaj dla razhonu, aryštu socień ludziej i pahromu apazicyjnych asiarodkaŭ.
Fotakamiery zafiksavali tady niekalki čałaviek, jakija prynieśli «invientar» (rydloŭki, bruski) i raspačali bićcio šybaŭ.
Voś nieprykmietny mužčyna ŭ kurtcy z kapiušonam padnosić da Doma ŭrada rydloŭki.
A voś čałaviek bje vokny.
Hety čałaviek na vačach u žurnalistaŭ tady spakojna syšoŭ z płoščy Niezaležnaści ŭ kampanii niekalkich mužčyn.
I voś padčas šeścia na Dzień Voli — 2016 u abjektyŭ kamiery žurnalista «Našaj Nivy» trapiŭ nadziva padobny mužčyna. Jon byŭ navat apranuty hetaksama — u čornuju šapačku i šeruju spartovuju kurtku z tryma pałoskami na plačach.
25 sakavika hety čałaviek nie skandavaŭ łozunhaŭ razam z usimi, trymaŭsia kala kraju kałony i paźbiahaŭ kamier. Ale sam čas ad času spyniaŭsia i fatahrafavaŭ kałonu demanstrantaŭ.
Pad ciskam biełaruskaj hramadskaj dumki, Jeŭrasajuza, ZŠA aryštavanych 2010 hoda vypuścili ciaham nastupnych hadoŭ. Apošnim z turmy vyjšaŭ eks-kandydat u prezidenty Mikałaj Statkievič.
Mienavita Kondruś fihuravaŭ na fotach, jakija najčaściej vykarystoŭvalisia łukašenkaŭskimi ŚMI dla demanstracyi «biasčynstvaŭ apazicyi».
Publikacyja «NN» źjaviłasia ŭ sakaviku 2016-ha.
U žniŭni stała viadoma, što mierkavany čałaviek z fotaŭ byŭ uziaty pad vartu 14 červienia. Miarkujecca, što heta Uładzimir Kondruś, 1977 hoda naradžeńnia, žychar horada Rudziensk.
Čytajcie:
Pravakatar, jaki pačaŭ bićcio akon Doma ŭrada ŭ 2010-m, prysutničaŭ na Dni Voli — 2016 FOTY
Mužčyna, jaki pačaŭ bić vokny padčas Płoščy-2010, zatrymany za «masavyja biesparadki» i trymaje haładoŭku ŭ SIZA
Śledčy kamitet prakamientavaŭ infarmacyju ab zatrymańni za Płošču-2010 Uładzimira Kondrusia
Ciapier čytajuć
«Dyk dadomu zabiary ałkaša abascanaha i vychodžvaj». Małady zahadčyk adździaleńnia balnicy nie strymlivaje siabie ŭ vyrazach u sacsietkach16
Kamientary