Vasilevič u roli "dobraha śledčaha"?
Pieramiena miescami dvuch jurystaŭ, badaj, usio ž maje niejki sens. Razvažaje ŭ svaim błohu Alaksandar Kłaskoŭski.
Analityki paśpieli pairanizavać užo nad kadravaj rakiroŭkaj minułaj piatnicy. Były hieneralny prakuror Mikłaševič uznačaliŭ Kanstytucyjny sud, a były kiraŭnik KS Vasilevič — naadvarot, Hienprakuraturu. Sa słoŭ Valera Karbaleviča, heta całkam u rečyščy ajčynnaj kadravaj palityki, kali "dyrektara banku možna pryznačyć dyrektaram łaźni i naadvarot".
Jašče dadajuć nakont karotkaj łaŭki zapasnych. Plus zaznačajuć, što tasavańnie kadravaj kałody patrebnaje dziela taho, kab namenklaturnym tuzam słužba miodam nie zdavałasia dy kab nie abrastali kłanavymi suviaziami.
Ale ŭ dadzienym vypadku, badaj, ci nie vyznačalnym jość imidžavy momant. Sapraŭdy, Ryhor Vasilevič dla mnohich — intelihientny, padkreślena cyvilny zakońnik u biełych (ci amal što biełych…) palčatkach. Suvoraha Piatra Mikłaševiča pryvykli bačyć u pahonach.
Zapomniłasia, u pryvatnaści, presavaja kanferencyja siłavoha tryjumviratu — Mikłaševič, Navumaŭ, Sucharenka — napiaredadni Płoščy-2006. Dakładniej, tady my jašče nia viedali, što budzie Płošča, a jany, ludzi ŭ pahonach, verbalna rabili ŭsio, kab publika sto razoŭ padumała, ci varta leźci na ražon… (Dziela spraviadlivaści adznačym, što pa-za kankurencyjaj byŭ tahačasny staršynia KHB z raspoviedam pra "metad dochłaha pacuka":) dy pahrozami pakarańnia až da rasstrełu. Mikłaševič ža, matyvujučy zabaronu na masavyja mierapryjemstvy, dyplamatyčna apelavaŭ da precedentu kryvavaj ciskaniny na Niamizie ŭ 1999 hodzie.)
Zrazumieła, što i Mikłaševič, i Vasilevič — ludzi Systemy. Ale kali pieršy ŭ vačoch Eŭropy dy našaj niezaležnaj hramady choćki-niachoćki asacyjujecca z roznymi małapryvabnymi rečami kštałtu palityčnych represijaŭ (za što i trapiŭ u śpis nievyjaznych), to druhi, jak ni kruci — z vystupam u abaronu biełaruskaj movy dy skasavańniem dazvolnaha štampu na vyjezd.
Usie viedajuć klasyčnuju hulniu ŭ złoha i dobraha śledčaha. Dyk mo' ciapierašniaja rakiroŭka musić prademanstravać Zachadu "dobraha śledčaha" na pasadzie kiraŭnika Hienprakuratury — struktury de-fakta nieparaŭnalna bolej važkaj i ŭpłyvovaj, čym KS?
Novamu jaje načalniku farmalna možna z čystaha arkuša pačynać i vyvučeńnie spraŭ tych samych palitviaźniaŭ. Eks-advakat Kazulina Ihar Rynkievič zaznačaje, što "farmulavańnie hienprakuroram Vasilevičam praŭnaj pazycyi ŭ spravie Alaksandra Kazulina z vyzvaleńniem hałoŭnaha palitźniavolenaha stała b jarkim debiutam na jahonaj novaj pasadzie…".
Kaniešnie, naiŭna ličyć, što niejki čynoŭnik u nas moža ładzić samastojnuju hulniu. Ale ŭ kantekście ciapierašniaha "renesansu" zachodniaha vektaru sapraŭdy možna čakać niejkich novych krokaŭ, zaklikanych prademanstravać asłableńnie brutalnaści režymu ŭ dačynieńni da palityčnych apanentaŭ.
Navat kali ŭ vyniku heta źviadziecca tolki da pakazalnaha vyzvaleńnia dvuch-troch čałaviek, to kadravuju rakiroŭku možna ličyć apraŭdanaj.
Uvohule ž majuć racyju tyja naziralniki, što zaznačajuć: na novaj pasadzie spadaru Vasileviču budzie značna ciažej karystacca biełymi palčatkami. Napieradzie novyja vybary dy inšyja ŭsploski palityčnych žarściaŭ, jakim naša ŭłada pryvykła davać rady vožykavymi rukavicami.
«Ja byŭ suprać, kab mianie mianiali na 20 rasijskich vajskoŭcaŭ. Nie zmoh by hladzieć u vočy ludziam, syny jakich siadziać»: pieršaje intervju eks-mera Chiersona
Kamientary