Zabojcu Julii Sałamacinaj asudzili na 17 hadoŭ, jaho maci na dva hady

Zabojca 18-hadovaj Julii Sałamacinaj Pavieł Cyniaŭski asudžany na 17 hadoŭ kałonii strohaha režymu, pryčym pieršyja piać hadoŭ jon pavinien pravieści ŭ turmie. Jaho maci atrymała dva hady kałonii ahulnaha režymu. Prysud byŭ vyniesieny siońnia, 5 lutaha, u sudzie Frunzienskaha rajona Minska.

Taksama z Cyniaŭskaha pastanoŭlena spahnać 1,5 młrd rubloŭ kampiensacyi, z maci — 500 miljonaŭ rubloŭ.

Kvateru Cyniaŭskaha na vulicy Čyhładze ŭ Minsku, jakuju jon zdavaŭ, pastanoŭlena kanfiskavać i puścić hrošy u zalik vypłaty maralnaj kampiensacyi. Cyniaŭskija pavinny taksama vypłacić 15 młn rubloŭ za pasłuhi advakata maci Sałamacinaj i 18 młn rubloŭ za źniščanyja rečy dziaŭčyny (adzieńnie, sumačka, upryhožańni, abutak, mabilnik).

Na sud Cyniaŭskaha pryvieźli z padbitym vokam. Nad pravym bryvom byŭ kryvapadciok. Nichto nie tłumačyŭ, što zdaryłasia.

Pavialičyć

Pry začytvańni pastanovy suda, sudździa źviartałasia da śviedčańniaŭ, dadzienych na pracesie znajomymi, susiedziami, blizkimi Cyniaŭskich.

Tak, Halina Cyniaŭskaja raniej pracavała povaram u dziciačym sadku. Jaje syn, Pavieł, časam skandaliŭ. Navat chapaŭsia za nož z krykami: «Zabju, zarežu!» Praŭda, nikoli blizka z nažom nie padychodziŭ da maci.

Z materyjałaŭ, ahučanych na sudzie, vynikaje, što trahiedyju, mahčyma, možna było papiaredzić.Cyniaŭski paprasiŭ pryjaciela, ź jakim napiaredadni zabojstva padyšli da stancyi mietro Spartyŭnaja, patelefanavać Julii Sałamacinaj. Toj patelefanavaŭ. Dziaŭčyna skazała, što da pjanaha nie pajedzie. Ale chłopiec sapraŭdny stan Cyniaŭskaha prykryŭ słovami «krychu chistajecca». Na što dziaŭčyna adkazała, što pryjedzie i sama tady vyznačyć, zastavacca joj ci nie.

Padčas abviaščeńnia prysudu adzin z narodnych zasiadacielaŭ straciŭ prytomnaść, tamu byŭ zrobleny pierapynak na 15 chvilin. Na abviaščeńnie vyraku pryjšła vialikaja kolkaść žurnalistaŭ, svajakoŭ zabitaj, pryjechali i rodnyja abvinavačanych.

Prakuror prasiŭ asudzić Cyniaŭskaha na 17 hadoŭ pazbaŭleńnia voli, a jaho maci, jakaja dapamahała rasčlanić i schavać trup, na dva hady. U svaju čarhu advakat paprasiła ŭ suda spahady dla svaich padabaronnych i pryznačyć Paŭłu Cyniaŭskamu 7 hadoŭ pazbaŭleńnia voli, a jaho maci — 1 hod.

Pradstaŭnik maci zabitaj dziaŭčyny zajaviŭ ab nieabchodnaści pierakvalifikavać spravu ŭ dačynieńni da P.Cyniaŭskaha ŭ adpaviednaści z č.2 art.139 KK i prysudzić jaho da samaha žorstkaha pakarańnia, praduhledžanaha zakonam. Vierahodniej za ŭsio, majecca na ŭvazie śmiarotnaje pakarańnie.

***

Dadamo, što Alaksandr Łukašenka na svajoj pres-kanfierencyi 29 studzienia zakranuŭ spravu Julii Sałamacinaj, vykazaŭšysia vielmi žorstka.

«Zabiŭ, rasčlaniŭ z mamaj, parezaŭ na kavałki i niedzie zakapaŭ. Staŭleńnie adnaznačnaje — da ścienki… Hetamu prabačeńnia być nie pavinna».

Łukašenka zajaviŭ, što budzie adstojvać takuju pazicyju i dalej. «Mianie nichto z hetaha nie sapchnie. Jakija b tam demakraty ŭ Jeŭropie ni kryčali, što śmiarotnaje pakarańnie admianić. U nas na refierendumie hetaje pytańnie vyrašana. Nie nam jaho vyrašać. Narod svajo mierkavańnie vykazaŭ. Jašče i tamu ŭ nas, napeŭna, nie tak bujstvujuć hetyja złačynstvy».

• 0
• 0
• 0
• 0
• 0
• 0
• 0
• 0