Eks-kamunisty błakujuć vyłučeńnie adzinaha kandydata ad apazicyi

Biełaruskaja partyja levych «Spraviadlivy śviet» nie stanie padpisvać apošni varyjant prajekta pracedury pa vyłučeńni adzinaha kandydata ŭ prezidenty ad demakratyčnych sił. Anałahičnaje rašeńnie z boku AHP robić niemahčymym pryniaćcie apazicyjaj rašeńnia ab sumiesnym pretendencie na pasadu prezidenta na vybarach 2015 hoda.

U «Spraviadlivym śviecie» ličać, što ŭdzieł partyi ŭ Kanhresie demakratyčnych sił pa vyznačeńni adzinaha kandydata ŭ prezidenty mahčymy tolki ŭ vypadku papiaredniaha ŭzhadnieńnia asnoŭnych pałažeńniaŭ pieradvybarnaj prahramy i scenaryjaŭ udziełu apazicyi ŭ prezidenckaj kampanii 2015 hoda. Adpaviednaje rašeńnie było pryniataje biuro centralnaha kamiteta partyi 29 listapada ŭ Minsku, paviedamiŭ BiełaPAN lidar arhanizacyi Siarhiej Kalakin. 

Nahadajem, pra padpisańnie dakumienta pa pracedury abrańnia adzinaha kandydata zajavili Biełaruskaja sacyjał-demakratyčnaja partyja (Hramada), ruch «Za Svabodu», kampanija «Havary praŭdu», Partyja BNF i arhkamitet pa stvareńni partyi «Biełaruskaja chryścijanskaja demakratyja». U pieramovach ab abrańni adzinaha kandydata ŭ prezidenty ad apazicyi ŭdzielničajuć jašče dźvie struktury: «Spraviadlivy śviet» i Abjadnanaja hramadzianskaja partyja. 

«U suviazi z tym što norma ab mahčymaści vyłučeńnia delehataŭ kanresa šlacham zboru podpisaŭ dla nas nieprymalnaja, my ličym niemetazhodnym padpisańnie hetaha dakumienta», — zajaviŭ Kalakin. 

Na dumku partyi, zbor podpisaŭ moža być tolki dadatkovaj umovaj dla abrańnia delehatam kanhresa demakratyčnych sił tych hramadzian, jakija byli papiarednie abranyja na schodach žycharoŭ rehijonaŭ. «My chočam viarnucca da taho varyjantu, jaki ŭ svoj čas prapanoŭvała Biełaruskaja sacyjał-demakratyčnaja partyja (Hramada), heta značyć, što zbor podpisaŭ idzie jak dadatkovaja ŭmova. Pazicyja ab tym, što čałaviek moža źbirać podpisy nie viadoma pad što i stanavicca delehatam kanhresu, była pieršapačatkova nieprymalnaja, siońnia my paćvierdzili svaju pazicyju», — skazaŭ Kalakin. 

Adznačym, što siamiorka apazicyjnych struktur raniej damoviłasia ab tym, što rašeńnie ad jaje imia moža prymacca šlacham kansiensusu minus adzin hołas. AHP užo zajaŭlała, što nie budzie padpisvać ciapierašni prajekt pracedury abrańnia adzinaha kandydata. Takim čynam, pryniaćcie rašeńnia ab vyłučeńni adzinaha kandydata na siońnia niemahčymaje.

• 0
• 0
• 0
• 0
• 0
• 0
• 0
• 0