«Naš cud zdaryŭsia!» Zbor na ŭkoł «Załhiensma» dla Danika z Baranavičaŭ zakryty
Ministerstva achovy zdaroŭja dadaść reštu sumy — kala 800 tysiač dołaraŭ.
Žychary nie tolki Baranavičaŭ, ale i ŭsioj Biełarusi ŭdzielničali ŭ zbory, jaki byŭ adkryty dla małoha Danika Asyki. U chłopčyka SMA 3‑ha typu, i jon maje patrebu ŭ preparacie «Załhiensma». Jaho cana — 1,8 młn dołaraŭ.
Źbirali hrošy ŭsim śvietam: prachodzili dabračynnyja łatarei, kirmašy ŭ padtrymku Danika, achviaravaŭ kožny kolki moža. Da hetaha dnia było sabrana bolš za pałovu nieabchodnaj sumy, piša «Naš kraj».
— Na tym tydni z nami źviazalisia pradstaŭniki Ministerstva achovy zdaroŭja, RNPC «Maci i dzicia», skazali, što buduć čakać nas dla zdačy analizaŭ na antycieły 14 krasavika. My pryjechali, zdali analizy. Potym adbyŭsia kansilium. My pahutaryli ź jurystam nakont zboru srodkaŭ, i nam skazali, što reštu sumy, jakoj nie chapaje, biare na siabie Ministerstva achovy zdaroŭja. Naš cud zdaryŭsia! Zbor zakryty! — padzialiłasia mama Danika Ksienija. — Skazać, što ja ščaślivaja — nie skazać ničoha.
Takuju ž nieacennuju dapamohu atrymaŭ ad Ministerstva achovy zdaroŭja i druhi baranavicki chłopčyk — Saša Astroha, jaki atrymaŭ zapavietny ŭkoł i prachodzić reabilitacyju.
Preparat dla Danika ŭžo zamoŭleny, i jon zmoža atrymać jaho ŭ najbližejšy čas.
— U mianie prosta niama słoŭ… Siońnia toj samy dzień, pra jaki my maryli kožnuju chvilinu našaha šlachu. Ja chaču skazać vielizarny dziakuj kožnamu. Za kožny repost, za kožny pieravod, za kožnaje dobraje słova ŭ kamientaryjach. Vy byli našaj aporaj, kali stanaviłasia strašna, i našaj nadziejaj, kali sił amal nie zastavałasia. Dziakuj, što nie prajšli mima, što stali našaj siamjoj i dapamahli Daniku zrabić hety najvažniejšy krok, — dziakuje Ksienija. — Biez vas my b nie spravilisia. Danik pieradaje kožnamu pramieńčyki dabra!
Zbor ža dla dla trochhadovaj Ksiušy Maisiejenki praciahvajecca. Zastałosia sabrać zusim mała — 29 tysiač dalaraŭ.
Času ŭ zapasie niašmat: u Biełarusi preparat «Załhiensma» ŭvodziać dzieciam vahoj da 13,5 kiłahrama. U Dubai hatovy ŭvieści preparat, kali dzicia važyć da 21 kiłahrama.
Infarmacyju, jak dapamahčy Ksiušy, možna znajści tut
Ciapier čytajuć
Biełaruska raspačała čelendž «40 spatkańniaŭ», ale ŭžo na siaredzinie nie chavaje rasčaravańnia ŭ mužčynach32
Kamientary