Dziaŭčynu z Hrodna aštrafavali za ŭlotki z hańbami, jakija jany kłała na aŭto z rasijskimi ściažkami

Leninski sud Horadni pryznaŭ Volhu Krapocinu vinavataj u niezakonnym vyrabie i raspaŭsiudzie ŭlotak z tekstam «Viernitie Krym! Ruki proċ ot Ukrainy» i «Hańba zdradnikam Radzimy z «trykałoram» u zubach. Pucin vam dałoń paciśnie, jak uzdymie na štykach!». Jana kłała pieršyja pad dvorniki aŭto z rasiejskimi numarami, a druhija — na biełaruskija aŭto z rasijskimi ściažkami.

Krapocinu zatrymali 19 vieraśnia ŭ centry Hrodna pobač z hatelem «Nioman». Pry joj było 17 ulotak. Jaje kvateru pieratreśli, ale bolej ničoha nie znajšli.

U sudzie suprać Krapocinaj śviedčyŭ niechta Uładzimir Harełaŭ, jaki nibyta indyvidualny pradprymalnik. Harełaŭ nibyta ŭ domie, pobač ź jakim stajała aŭta z rasijskimi numarami, na škło jakoha Krapocina i pakłała ŭlotku. Harełaŭ patłumačyŭ sudu, što ŭbačyŭ heta z akna i vybieh za Krapocinaj. Maŭlaŭ, niekalki dzion tamu ŭ jaho pytaŭsia ŭčastkovy — ci nie bačyŭ jon, chto kładzie hetyja ŭlotki.

A pakolki Harełaŭ, jak jon patłumačyŭ sudu, vielmi šanuje ŭčastkovaha, to vybieh zatrymać dziaŭčynu.

Harełaŭ zaznačyŭ, što, maŭlaŭ, vybieh na darohu i ŭbačyŭ milicyjantaŭ u mašynie, ź jakimi i zatrymaŭ Krapocinu.

Vidać, što hety Harełaŭ čałaviek nie vypadkovy.

Milicyjanty ŭ sudzie zaśviedčyli, što zatrymlivali Krapocinu. Adzin ź ich patłumačyŭ, što tekst ulotki, jak jamu padałosia, «apazicyjnaha charaktaru», ale nivodzin dakładna tak i nie moh uzhadać, što tam było napisana.

Abodva kazali, što nibyta tekst byŭ źviazany z Majdanam.

U sudzie Krapocina nie admaŭlała, što sama nadrukavała ŭlotki ŭ internet-kaviarni, pakłała ich na škło mašyny i hetym samym sprabavała danieści da hramadzian infarmacyju pra toje, što adbyvajecca va Ukrainie. Ale jana tak i nie zrazumieła, čym jaje dziejańni adroźnivalisia ad taho, jak ludzi štodnia kładuć na tyja samyja aŭto šmatlikija rekłamnyja materyjały.

Sudziŭ Źmicier Bubienčyk, jaki raniej nie maŭ dačynieńnia da palityčnych pracesaŭ. Padtrymać Volhu pryjšli para žurnalistaŭ dy nieabyjakavych haradziencaŭ.

Sudździa začytaŭ list ź Ministerstva infarmacyi, u jakim havaryłasia, što ŭlotki nosiać masava-palityčny charaktar, ale acenki źmiestu ŭlotak nie davałasia. Pavodle rašeńnia sudu Volhu Krapocinu pryznali vinavataj u niezakonnym vyrabie i raspaŭsiudzie ŭlotak. Choć što niezakonnaha ŭ takim vyrabie i takim raspaŭsiudzie?

Krapocina z rašeńniem nie pahadziłasia i zajaviła paśla sudu: «Mnie prysudzili bolej, čym ja za miesiac atrymlivaju zarobku. Abaviazkova budu abskardžvać rašeńnie. Ja liču, što i pratakoł składzieny na mianie niezakonna, i pastanova suda taksama nie źjaŭlajecca zakonnaj, i ja budu heta abskardžvać». 

Siońnia ž u Śvisłačy (Hrodzienskaja vobłaść) pavinien byŭ adbycca sud nad miascovym aktyvistam Juryjem Hlebikam, jakoha źvinavacili ŭ arhanizacyi niesankcyjanavanaj akcyi i vykarystańni niezarehistravanaj simvoliki padčas tradycyjnaha ŭšanavańnia paŭstancaŭ Kalinoŭskaha. Juryj Hlebik u sud nie pajšoŭ: 

«Što ja, błazan, kab tam siadzieć? Niachaj vyrašajuć što chočuć, bo jany heta sami ŭsio prydumali, to niachaj sami i robiać. Ja nie liču siabie vinavatym, bo ja nikoha nie pabiŭ, ničoha ni ŭ koha nie ŭkraŭ, pjanym nidzie nie lažaŭ.

Kab nie było tak sumna, to było b śmiešna, ale ŭsio ž davoli sumna, što tak usio robicca».

• 0
• 0
• 0
• 0
• 0
• 0
• 0
• 0