Bieły dom abvinavaciŭ u situacyi ŭ Sieucie prychilnikaŭ «ultralevaj hłabalisckaj palityki»

U intervju Fox News Tramp zaklikaŭ amierykancaŭ źviarnuć uvahu na padziei ŭ Sieucie. Jon źviazaŭ mihracyjnuju prablemu z budučymi pramiežkavymi vybarami ŭ ZŠA i papiaredziŭ, što ŭ vypadku pieramohi demakrataŭ krainu mohuć čakać surjoznyja prablemy ź nielehalnaj mihracyjaj.

Bieły dom uskładaje adkaznaść za situacyju na prychilnikaŭ «ultralevaj hłabalisckaj palityki».

Premjer-ministr Ispanii Piedra Sančes, u svaju čarhu, zajaviŭ, što za arhanizacyjaj takich pierachodaŭ stajać mafijoznyja złačynnyja hrupoŭki, jakija zajmajucca handlem ludźmi. Jon asudziŭ ich dziejańni i zaklikaŭ da žorstkaj reakcyi.

Pavodle źviestak ispanskaha Ministerstva ŭnutranych spraŭ, kala 37,5 tysiačy čałaviek, jakija niezakonna trapili ŭ Ispaniju praź Sieutu, užo viarnulisia ŭ Maroka. U Jeŭrapiejskim sajuzie taksama padkreślivajuć, što mihrantaŭ ź Sieuty pakul nie pieravoziać u inšyja krainy Jeŭropy.

Situacyja stała jašče adnoj krynicaj napružanaści pamiž Madrydam i Vašynhtonam. Pry hetym jašče niadaŭna, 19 lipienia, padčas finału čempijanatu śvietu pa futbole ŭ Ńju-Džersi, kiraŭniki dźviuch krain demanstravali zbližeńnie paśla niekalkich hadoŭ uzajemnaj krytyki.

Adna z hałoŭnych sprečak pamiž ZŠA i Ispanijaj źviazana z vydatkami na abaronu. Ispanija pakul nie hatovaja pavialičyć ich da 5% VUP — pakazčyka, uzhodnienaha krainami NATA na samicie ŭ Haazie. Sančes raniej nazyvaŭ takuju metu nieracyjanalnaj i škodnaj. Vašynhton ža nastojvaje, što sajuźniki pavinny ŭziać na siabie bolšuju častku vydatkaŭ na abaronu, inakš ZŠA mohuć pierahledzieć svajo dalejšaje znachodžańnie ŭ aljansie.

Na mihracyjny kryzis u Sieucie taksama adreahavaŭ miljarder Iłan Mask. U sacyjalnaj sietcy X jon spačatku paraŭnaŭ padziei z epizodam ź filma «Vajna suśvietaŭ Z», dzie natoŭp zombi šturmuje ścianu. Paźniej Mask zajaviŭ, što heta byŭ žart, ale apublikavaŭ videa z prybyćciom vialikaj kolkaści mihrantaŭ da ŭźbiarežža Sieuty.

Paśla hetaha jon raźmiaściŭ videa z padobnymi kadrami sa ZŠA časoŭ prezidenctva Džo Bajdena, padpisaŭšy jaho jak prykład taho, «jak vyhladali Złučanyja Štaty pry Bajdenie». Paźniej Mask zajaviŭ, što nielehalnaja mihracyja moža nanieści surjozny ŭdar pa biudžecie Ispanii, choć nie pryvioŭ kankretnych raźlikaŭ.

Ispanskija ŭłady z takoj acenkaj nie pahadžajucca. Jany ličać, što mihracyja moža prynosić ekanamičnuju karyść krainie i Jeŭrasajuzu. Pavodle daśledavańnia Banka Ispanii, apublikavanaha ŭ minułym hodzie, ludzi, jakija naradzilisia za miažoj i pracujuć u Ispanii, zabiaśpiečyli ŭ 2022—2024 hadach ad 0,4 da 0,7% rostu ekanomiki ŭ raźliku na adnaho žychara. Za hety pieryjad siaredni rost VUP krainy składaŭ kala 2,9%.

• 3
• 1
• 0
• 0
• 1
• 0
• 0
• 0